جاقىندا ۇكىمەتتىڭ شەشىمىمەن بىرىڭعاي زەينەتاقى قورىنداعى 117,5 ميلليارد تەڭگە داعدارىستان دال-دالى شىققان ەكونوميكانىڭ جىرتىعىن جاماۋعا جۇمسالاتىنى ايتىلدى. ونىڭ 15 ميللياردقا جۋىعى ەندىگى جىلى ەلوردادا وتەتىن ەكسپو-2017 كورمەسىنىڭ عيماراتتارىن سالۋعا بولىنەتىنى دە ءمالىم بولعان.

سونىمەن ول نە قىلعان عيماراتتار؟ وتكەندە ساۋداگەر سماعۇلوۆ ەلباسىنىڭ الدىندا ەسەپ بەرىپ، ءبىر عيماراتقا ات تابا الماي، «نۇر پلازا»، «مەگا پلازا» دەپ ماندىراپ ەدى. ەندى سۇراق؟ ەل ىشىندە ەكسپو-عا قاتىستى الىپ-قاشپا اڭگىمەلەردىڭ ءورىپ جۇرگەنى بەلگىلى. سوندا ۇكىمەت سماعۇلوۆتىڭ ساۋداسىن جۇرگىزۋ ءۇشىن حالىقتىڭ قارجىسىن ونىڭ پلازالارىنا جۇمساماق پا؟  وسى رەتتە «radiotochka.kz» پورتالىنىڭ ەكسپو تەرريتورياسىندا نە سالىنىپ جاتقانىن انىقتاعان بەينەبايانىن كورسەتە كەتەلىك.

باسىلىمنىڭ رەسمي ساۋالىنا «Mega Center Development» جاۋاپ بەرىپ، ەكسپو اۋماعىندا ساۋدا ويىن-ساۋىق ورتالىعىنىڭ سالىنىپ جاتقانىن جانە وعان بزجق قارجىسى تارتىلعانىن ايتقان.

سونداي-اق، رەسمي جاۋاپتا بىلاي دەپ جازىلىپتى: «ەكسپو-2017» تەرريتورياسىندا سالىنىپ جاتقان Mega Silk Way ساۋدا ويىن-ساۋىق ورتالىعىنىڭ قۇرىلىسىنا قوسىمشا اقشا تارتىلدى. ول اقشا نارىقتىق جاعدايدا «بايتەرەك دەۆەلوپمەنت» اق-دان الىنىپ وتىر. كەپىلدىك قويىلعان، جانە ول قاراجاتتار قايتارىلادى».

دەسە دە دەرەككوزدەرى قاراجات سوماسىن «كونفەدەنتسيالدى» بولعاندىقتان جاسىرىپ قالعان.

تەك بەلگىلى بولعانى حالىقارالىق كورمە اۋماعىندا ويىن-ساۋىق كەشەنىن سالىپ جاتقانىن «Mega Center Development» جاسىرماپتى.

ەستەرىڭىزدە بولسا، بيىلعى جىلدىڭ 14-ناۋرىزى كۇنى «استانا» ارناسىنان سۇحبات بەرگەن قازاقستان دامۋ بانكى باسقارماسىنىڭ ورىنباسارى ەلانا كوگاي حانىم بزجق-دان قوماقتى قارجى ەكسپو قۇرىلىسىنا جۇمسالاتىنىن ايتقان ەدى.

«قازاقستاننىڭ دامۋ بانكى ەحرو-2017-ءنىڭ  ءبىر جوباسىن قارجىلاندىرۋدى كوزدەپ وتىر.بۇل - Mega Silk Way كەشەنى»،-دەيدى تەلەارنا ءتىلشى.

ال كوگاي حانىمنىڭ ايتۋىنشا، «بايتەرەك» حولدينگىنىڭ ەنشىلەس ۇيىمى دامۋ بانكىنەن كومەك سۇراپ كەلگەن.

قوش، «مەگا» رەسمي تۇردە ەكسپو جوباسى ەمەس دەلىك. ال كوگاي حانىمنىڭ سوزىنە نازار اۋدارساڭىز، «جوبالاردىڭ ءبىرىن» قولداۋعا جانە «كەرەك» دەيدى.

«بۇل جەردە «بايتەرەكتىڭ» وزگە ەنشىلەس كومپانياسى – «بايتەرەك دەۆەلوپمەنت» تارتىلىپ وتىر. بۇل "ەكسپو-2017" كورمەسىنىڭ ءتۇرلى جوبالارىنا قاتىسىپ جۇرگەن كومپانيا. سوندىقتان، دامۋ بانكى ارقىلى MEGA Silk Way قۇرىلىسىن قولداۋدى سۇراپ وتىر. اۋەلدە 15 ميلليارد تەڭگە دەپ جوسپارلانعانىمەن، بولىنەتىن سوما ودان از بولۋى دا مۇمكىن»،-دەپتى كوگاي حانىم.

ەستەرىڭىزگە سالا كەتەيىك، جاقىندا قازاقستاننىڭ دامۋ بانكى قازاقستاندىقتاردىڭ زەينەتاقى قورىنان 15 ميلليارد تەڭگەگە جۋىق قارجىنى «ەكسپو-2017» قۇرىلىسىنا جۇمسايتىنىن مالىمدەگەن بولاتىن.

كەيىن «استانا ەكسپو-2017» ۇك-نىڭ قوعاممەن بايلانىس دەپارتامەنتىنىڭ ديرەكتورى سەرگەي كۋيانوۆ بولىنەتىن قارجىنىڭ ويىن-ساۋىق كەشەندەرىنە ەمەس، ناقتى ەكسپو جوباسى اياسىندا سالىناتىن عيماراتتار قۇرىلىسىنا جۇمسالاتىنىن مالىمدەگەن. ال جەكەلەگەن جوبالاردىڭ حالىقارالىق كورمەگە ەش قاتىسى جوق ەكەندىگىن ايتقان. مۇنداي جەكەلەگەن ينۆەستيتسيالىق جوبالاردىڭ ىشىندە نۇرلان سماعۇلوۆتىڭ مەگا ساۋدا ويىن-ساۋىق كەشەنى دە بار ەكەن.

نۇرگەلدى ابدىعانيۇلى

Abai.kz