بۇگىن ءوڭىر باسشىسى ب.اتامقۇلوۆ پەن «قازاقستاننىڭ تۇرعىن ءۇي قۇرىلىس جيناق بانكى» اق باسقارما توراعاسى ا.جۇماعۇلوۆ 2015-2019 جىلدارعا ارنالعان «نۇرلى جول»  ينفراقۇرىلىمدىق دامىتۋدىڭ مەملەكەتتىك باعدارلاماسى اياسىندا ىنتىماقتاستىق تۋرالى مەموراندۋمعا قول قويدى. بۇل تۋرالى وقو اكىمىنىڭ ءباسپاسوز قىزمەتى حابارلايدى.

«2016 جىلى تەك قانا شىمكەنت قالاسىندا ەمەس، سونىمەن قاتار، تۇركىستان، كەنتاۋ قالالارىندا جانە ماقتارال اۋدانىندا حالىقتىڭ تىعىز ورنالاسۋىنا بايلانىستى، كوپقاباتتى كرەديتتىك تۇرعىن ۇيلەردى سالۋ جوسپارلانىپ وتىر. وسى جىلداردا كوپتەگەن ناتيجەلەرگە قول جەتكىزدىك. قانشاما تۇرعىندار، سونىڭ ىشىندە كوپتەگەن جاستار باسپاناعا يە بولدى»، - دەدى ايماق باسشىسى.

وقو-داعى وسى كرەديتتىك تۇرعىن ءۇي قۇرىلىسىنا جەرگىلىكتى اتقارۋشى ورگاندار جەلىسىمەن ۇلتتىق قوردان 4,4 ملرد. تەڭگە ءبولىندى. بۇل قاراجاتقا 558 پاتەرلى 11 ءۇي سالىناتىن بولادى. تۇرعىن ءۇيدىڭ جالپى اۋماعى 31,5 مىڭ ش.م. قۇرايدى. بانك سالىمشىلارىنا تۇرعىن ءۇيدىڭ 1 ش.م. 140 000 تەڭگەمەن وتكىزىلەدى.

ءوز كەزەگىندە، «بايتەرەك دەۆەلوپمەنت»  اق جەلىسى بويىنشا  جالپى اۋماعى  25 مىڭ  ش.م. اساتىن 432 پاتەرلى 6 ءۇي تۇرعىزىلىپ، 1 ش.م. ءۇشىن 180 مىڭ تەڭگەمەن بەرىلەتىن بولادى. 

«وزدەرىڭىزگە بەلگىلى، جىل باسىندا مەملەكەت باسشىسى نۇرسۇلتان نازارباەۆ تۇرعىن ءۇي قۇرىلىس جيناق جۇيەسىنىڭ تيىمدىلىگىن ەسكەرە كەلىپ، كرەديتتىك تۇرعىن ءۇي قۇرىلىسىنا 149 ملرد. تەڭگە ءبولۋدى تاپسىرعان ەدى. قازىرگى تاڭدا قاراجات وڭىرلەر بويىنشا ءبولىنىپ جاتىر. تۇرعىزىلعان ۇيلەردى ءوز سالىمشىلارىمىزعا وتكىزە وتىرىپ، ء بىز قاراجاتتىڭ ءار ەكى جىل سايىن اينالىمدىلىعىن قامتاماسىز ەتەمىز»، - دەپ ءتۇسىندىردى تۇرعىن ءۇي قۇرىلىس جيناق بانكى باسقارماسىنىڭ توراعاسى  ايباتىر جۇماعۇلوۆ.

سونداي-اق، تۇرعىن ءۇي قۇرىلىس جيناق بانكى «شىمكەنت سيتي» جوباسىن جۇزەگە اسىرۋعا قىزىعۋشىلىق تانىتىپ وتىر. قازىرگى ۋاقىتتا وسى اۋقىمدى قۇرىلىستىڭ سالىناتىن اۋماعى انىقتالىپ، جەرگىلىكتى بيلىك بارلىق قاجەتتى ينجەنەرلىك كوممۋنيكاتسيالاردى قاراستىرىپ جاتىر. بانك ء«وز ءۇيىم» جەكەمەنشىك كريزيسكە قارسى باعدارلاماسى اياسىندا سالىنعان تۇرعىن ۇيلەردى وتكىزۋگە نيەتتى. جيىندا بانك جەتەكشىلىگى ء«وز ءۇيىم» باعدارلاماسى بويىنشا شىمكەنت قالاسىنىڭ اكىمدىگىمەن دە ىنتىماقتاستىق مەموراندۋمىن ءتۇزدى.

ايتا كەتەيىك، «قازاقستاننىڭ تۇرعىن ءۇي قۇرىلىس جيناق بانكى» اق-نىڭ وڭتۇستىك-قازاقستان وبلىسىنداعى فيليالى 2005 جىلدان بەرى جۇمىس ىستەيدى. وسى ۋاقىت ارالىعىندا تۇرعىن ءۇي قۇرىلىس جيناق بانكى جەلىسى بويىنشا تۇرعىن ءۇيدىڭ مەملەكەتتىك باعدارلامالارى اياسىندا  جالپى اۋماعى 256,6 مىڭ ش.م. قۇرايتىن 3 227 پاتەرلى 126 تۇرعىن ءۇي پايدالانۋعا بەرىلدى.

اعىمداعى جىلى وڭىرلەردى دامىتۋدىڭ 2020 جىلعا دەيىنگى باعدارلاماسى  اياسىندا  «جاس وتباسىلارعا ارنالعان تۇرعىن ءۇي» باعىتى بويىنشا 216 پاتەرلى 2 ءۇي جالعا بەرىلەدى. 

جالپى، وڭتۇستىك قازاقستان وبلىسى بويىنشا 34 مىڭنان استام، سونىڭ ىشىندە شىمكەنت قالاسىندا 20 مىڭنان استام ازامات مەملەكەتتىك تۇرعىن ءۇي قورىنان باسپانا الۋ كەزەگىندە تۇر.

اباي اقپارات