قازاقستاننىڭ قورعانىس ءمينيسترى يمانعالي تاسماعامبەتوۆ باق-قا بەرگەن سۇحباتىندا «تەرروريزممەن كۇرەس ماسەلەسىندە قازاقستان كورشىلەس ەلدەردەن كومەك سۇرامايدى، وعان مۇقتاجدىق جوق. قازاقستان ءوز پروبلەمالارىن شەشۋگە قاۋقارلى» دەپ كەسىپ ايتقان. بۇل تۋرالى «Abai.kz» پورتالى «365info.kz» سايتىنا سىلتەمە جاساپ حابارلايدى.

2016 جىلدىڭ شىلدەسىندە اقتوبە مەن الماتى قالالارىندا ورىن العان تەرروريستىك اكتىلەردەن سوڭ، شەتەلدىك باق ءام ولاردىڭ ساراپشىلارى قازاقستانداعى جاعدايدى تۇراقتاندىرۋعا رف اسكەر كىرگىزۋى مۇمكىن دەگەن سىڭايلى پىكىرلەر ايتا باستاعان («ەششە ودين ەكسپەرت يز روسسي پروروچيت ۆۆود ۆويسك ۆ كازاحستان»,«روسسيسكي سپەتسناز موگ بى پريتي ۆ كازاحستان — پرەدلوجەنيە ەكسپەرتا», «11 سيۋرپريزوۆ، كوتورىە موجەت پرەپودنەستي ميرۋ كرەمل»)

ارينە، رەسەيدىڭ مۇنداي جاعدايلاردى ءوز پايداسىنا شەشۋگە اككى ەكەنىن ۋكراينا، سيرياداعى جاعدايلاردان كورىپ-ءبىلىپ ءجۇرمىز. بۇل ەل ىشىندە قىزۋ تالقى تۋدىرىپ، كوپشىلىكتىڭ كوكەيىنە كۇدىكتى وي تۋعىزعانى جاسىرىن ەمەس. ال 1-تامىز كۇنى الماتىدا جۋرناليستەرمەن كەزدەسۋ وتكىزگەن ەلىمىزدىڭ قورعانىس ءمينيسترى بۇل سۇراقتارعا جاۋاپ بەرگەن.

- كەز كەلگەن سىلتاۋمەن قازاقستان اۋماعىنا رەسەي ءوز اسكەرىن كىرگىزۋى مۇمكىن دەگەن قاۋەسەت جالعان. مەيلى ول – تەرروريزم بولسىن، مەيلى تەرروريستىك اكتى نەمەسە باسقاسى بولسىن، رەسەيدىڭ اسكەر كىرگىزۋى مۇمكىن ەمەس جاعداي. بۇل ماسەلە ەكى ەل مينيسترلىگىنىڭ اراسىندا قوزعالعان دا جوق، تالقىلانعان دا جوق، بۇل تۋرالى اڭگىمە وربىگەن دە جوق. قازاقستان تەرروريزممەن كۇرەسۋدە رەسەي فەدەراتسياسىنىڭ اسكەري-ساياسي باسشىلىعىنا مۇقتاج ەمەس. 

تەرروريزممەن كۇرەستە نەمەسە قانداي دا ءبىر توتەنشە جاعدايلار تۋىنداعاندا قازاقستان ارمياسى وعان توتەپ بەرۋگە قاۋقارلى. ءبىز اقتوبە مەن الماتىداعى شەتىن وقيعالار كەزىندە كورشىلەرىمىزدىڭ بىرىنەن دە كومەك سۇراعان جوقپىز.

ءتىپتى كەرەك بولاتىن بولسا، اسكەري-ترانسپورتتىق ۇشاقتار ۇلتتىق گۆارديا ساربازدارىن كەز كەلگەن نۇكتەگە ءدال تۇسىرە الادى. ۇلتتىق گۆارديانىڭ، ۇلتتىق قاۋىپسىزدىك كوميتەتىنىڭ، ىشكى ىستەر مينيسترلىگىنىڭ ارنايى مامانداندىرىلعان جاساقتارى بار. سوندىقتان، كورشى ەلدىڭ ارمياسىن «كومەك كورسەتۋ» دەگەن سىلتاۋمەن كىرگىزۋى مۇمكىن دەگەن اڭگىمەنىڭ ءوزى ارتىق، بەكەر ءسوز، - دەيدى قر قورعانىس ءمينيسترى يمانعالي نۇرعاليۇلى.

نۇرگەلدى ابدىعانيۇلى

Abai.kz