وڭتۇستىك قازاقستان وبلىسىنىڭ اكىمى جانسەيىت تۇيمەباەۆ شىمكەنتتەگى ونەركاسىپ ورىندارىن ارالاۋ جۇمىستارىن ودان ءارى جالعاستىردى. بۇل تۋرالى «وقو اكىمىنىڭ ءباسپاسوز قىزمەتى» حابارلايدى.

ەڭ الدىمەن، ءوڭىر باسشىسى Gold ماركالى اليۋمين پروفيلدەرىن شىعاراتىن «Gold Aluminum» جشس-ىندە بولىپ، زاۋىتتان شىعارىلىپ جاتقان ونىمدەردى ارالاپ كوردى. جىلدىق قۋاتتىلىعى 6 مىڭ تونناعا دەيىن جەتەتىن زاۋىتتا وندىرىلەتىن ونىمدەردىڭ 20 پايىزى رەسەي مەن قىرعىزستانعا ەكسپورتتالادى. 200-گە جۋىق ادامدى جۇمىسپەن قامتىعان كاسىپورىندا شىعارىلاتىن ونىمدەر نارىقتا ەڭ تومەن باعامەن ۇسىنىلادى.

مۇنان سوڭ وبلىس اكىمى ورداباسى اۋدانى، بادام ەلدى مەكەنىندەگى اۋماعى 200 گەكتاردان اساتىن «بادام» قازاق-تۇرىك يندۋستريالدى ايماعىنا بارىپ، ونداعى ىسكە اسىرىلىپ جاتقان جوبالاردىڭ جۇمىسىمەن تانىستى. بولاشاقتا مۇندا تراكتورلار مەن ەكسكوۆاتورلار، قۇرىلىسقا قاجەتتى زاتتار مەن ليفت، باۋ-باقشاعا ارنالعان اربالار، دوڭعالاقتار، سونىمەن بىرگە، كەڭسە جانە ءۇي جيھازدارىن شىعاراتىن 17 جوبا بويىنشا ونەركاسىپ ورىندارى جۇمىسىن باستاماق. ايتا كەتەتىن جايت، مۇندا بيۋدجەتتىك 1 تەڭگەگە 26,2 تەڭگە جەكە ينۆەستيتسيا تارتىلعان.

وسىنداي ونەركاسىپ ورىندارىنىڭ ءبىرى – اۋىل شارۋاشىلىعى تەحنيكالارى مەن تراكتورلار شىعاراتىن «Kaz Kioti» زاۋىتى. ءبىر جىلدا 1600 دانا تەحنيكا شىعارۋعا قاۋقارلى سەرىكتەستىكتە 300 ادام جۇمىس ىستەيدى. وتكەن جىلى جۇمىسىن باستاعان زاۋىتتا بۇگىنگە دەيىن 167 تراكتور جاساپ شىعارىلىپ، وبلىستاعى شارۋاشىلىقتارمەن قاتار، كورشى تارازعا ساۋدالانعان. بولاشاقتا مۇنداعى تەحنيكالار رەسەي اسۋى دا مۇمكىن.

يندۋستريالدى ايماقتاعى تىنىس-تىرشىلىككە قانىق بولعان ايماق باسشىسى ج.تۇيمەباەۆ ونداعى كاسىپورىنداردىڭ كەستەگە سايكەس مەرزىمىندە تاپسىرىلۋى قاجەتتىگىن ەسكەرتىپ، ونداعى ينفراقۇرىلىم جايىن رەتكە كەلتىرۋدى مىندەتتەدى. سونداي-اق، شىمكەنت قالاسىنىڭ ورتالىعىندا ورنالاسقان كاسىپورىنداردى شاھار ماڭىنا كوشىرىپ، ساۋدا اينالىمىن جاقسارتۋ ماقساتىندا ايماقارالىق əرىپتەستىكتى نىعايتۋ كەرەكتىگىن ايتتى. سونداي-اق، ول وسى ماسەلە جونىندە ۇكىمەتكە «شىمكەنت ساۋدا-كورمە ورتالىعىن» قۇرۋ يدەياسىن ۇسىنعانىن جەتكىزدى.

ونەركاسىپ ورىندارىمەن تانىسۋ كەزىندە جانسەيىت قانسەيىتۇلى «بورتە ميلكا» ءسۇت تاۋارلى فەرماسىندا بولدى. جىل باسىندا اشىلعان شارۋاشىلىقتا اسىل تۇقىمدى ءسۇتتى باعىتتاعى «گولشتەين» تۇقىمىنان قازىرگى تاڭدا 272 باس ساۋىن سيىر بار. كۇنىنە 30 ليترگە دەيىن ءسۇت بەرەتىن فەرمادا جىلىنا 6-7 مىڭ ليتر اعارعان الۋ كوزدەلۋدە. ول ءۇشىن تاياۋدا تاعى دا 200-دەن استام ءىرى قارا اكەلۋ جوسپارلانۋدا. ءسۇت تاۋارلى فەرمانىڭ بارلىق جابدىقتارى شۆەيتساريالىق قۇرىلعىلارمەن قامتاماسىز ەتىلگەن.

ساپار بارىسىندا وبلىس اكىمى اۋماعى 112 گا بولاتىن ساۋدا-لوگيستيكالىق ورتالىعىندا بولدى. بۇل ورتالىقتا شارشى مەترى 242,5 مىڭ قۇرايتىن 8 ينۆەستيتسيالىق جوبا جۇزەگە اسىرىلۋدا. مۇندا «بيزنەستىڭ جول كارتاسى-2020» باعدارلاماسى اياسىندا «باتىس قىتاي - باتىس ەۋروپا» حالىقارالىق اۆتودالىزىنە قوساتىن جول، تەمىر جول تۇيىعى، قۋاتتىلىعى 10 مۆت بولاتىن ەلەكتر ستانساسى، ورتالىقتاندىرىلعان گاز جانە سۋ قۇبىرلارىنىڭ قۇرىلىستارى جۇرگىزىلگەن.

زاماناۋي كەشەندەگى سالىنىپ جاتقان قۇرىلىستاردىڭ جۇمىسىمەن تانىسقان ايماق باسشىسى ساۋدا-لوگيستيكالىق ورتالىعى اۋىل شارۋاشىلىعىنا بەيىمدەلگەن وڭتۇستىك ءوڭىرىنىڭ ەكونوميكاسىنا وڭ ىپقالىن تيگىزىپ، وبلىس ءونىمىن دۇنيەجۇزىلىك نارىققا شىعارۋعا زور مۇمكىندىك بەرەتىنىن اتاپ ءوتتى. سونىمەن قاتار، ءتيىستى مەكەمە باسشىلارىنا اتالعان ورتالىقتىڭ اۋماعىن ۇلعايتۋدى جۇكتەدى.

Abai.kz