وڭتۇستىك قازاقستان وبلىسىنان شىعارىلاتىن وتاندىق ءونىم - "بال تەكستيل" كىلەمدەرى شۆەيتساريانىڭ جەنەۆا قالاسىندا وتكەن حالىقارالىق كونۆەنتسيادا ۇزدىك ساپا اتالىمى بويىنشا «التىن جۇلدىز» (ISAQ جۇلدەسى) يەلەندى.

ساپا مەن يننوۆاتسياداعى جەتىستىكتەرگە قول جەتكىزگەن كومپانيالار مەن ۇيىمدارعا تابىستالاتىن ISAQ جۇلدەسىن الۋ سىنىندا كىلەم فابريكاسى كوشباسشىلىق پەن ۇيىمداستىرۋشىلىق قابىلەتى، ساپا مەن ونىمدىلىك، كومپانيانىڭ بەدەلى مەن نارىقتا تاۋار ساتۋعا قولايلى ورتا قالىپتاستىرۋى، تەحنولوگيا، يننوۆاتسيا جانە ءوسىم ساتىلارى بويىنشا جەڭىسكە جەتىپ، ۇزدىك دەپ تانىلعان. ال قۇرمەتتى حالىقارالىق جۇلدەنى وتاندىق كومپانيانىڭ جەتەكشىلىگىنە تابىستاعان سوڭعى 30 جىلدان بەرى الەمنىڭ 179 ەلىندە ءار سالانىڭ كوشباسشىلارىن انىقتاپ، ماراپاتتاپ كەلە جاتقان «Business Initiative Directions» كومپانياسى بولىپ تابىلادى.

«بال تەكستيل» كىلەم فابريكاسى، ازىرگە، قازاقستاندا تەڭدەسى جوق سەرىكتەستىك بولىپ تابىلادى. ءوز جۇمىسىن 2013 جىلى «يندۋستريالاندىرۋ كارتاسى» باعدارلاماسى اياسىندا باستاعان بۇل ءوندىرىس ورنى تەك كىلەم توقۋمەن عانا ەمەس، «BCF»، «Heat-Set»، «Frize» ماركالى پوليپروپيلەن جىپتەرىن يىرۋمەن دە اينالىسۋدا.

قاجەتتى شيكىزات تۇركيا، بانگلادەش، ءۇندىستان جانە باسقا دا ەلدەردەن تىكەلەي جەتكىزىلەدى. كىلەمدەر بەلگيالىق جوعارى تەحنولوگيالىق «Michel Van De Wiele» قوندىرعىلاردا توقىلادى. ال سينتەتيكالىق پوليپروپيلەن جىپتەرى گەرمانيا مەن فرانتسيا ەلدەرىنەن جەتكىزىلگەن. «Oerlikon Neumag»، «Allma Volkmann»، «SUPERBA» فيرمالارىنىڭ زاماناۋي قۇرىلعىلارىندا يىرىلەدى.

«بال تەكستيلدىڭ» كىلەم جانە كىلەم ونىمدەرىن شىعارۋ قۋاتتىلىعى – جىلىنا 5 ملن. شارشى مەتردەن استام. ال، پوليپروپيلەن ءجىبىن ءيىرۋ قۋاتتىلىعى – جىلىنا 4000 توننانى قۇرايدى. بۇگىندە مۇندا 245 ادام جۇمىسپەن قامتىلعان.

«بال تەكستيل» ونىمدەرىن قازاقستاننىڭ بارلىق قالالارىندا كەزدەستىرۋگە بولادى. ەلىمىزدەگى رەسمي تاراتۋشىلاردىڭ قاتارى 400 دەن اسقانى – وسىنىڭ دالەلى. سونىمەن قاتار، تۇراقتى تۇردە تاپسىرىس بەرىپ، ونىمدەردى الاتىن 20-دان استام شەتەلدىك سەرىكتەستەرى بار.

2016 جىلى «بال تەكستيل» شۆەدتىك يكەا مەن ەەس-ءتىڭ وزگە دە كومپانيالارىمەن كەلىسىمگە كەلۋدىڭ ناتيجەسىندە، ەكسپورت كولەمىن 20-30 پايىزعا ۇلعايتتى. ەندى «قازاقستاندا جاسالعان» دەگەن بەلگىسى بار كىلەمدەردى انگليا، گەرمانيا جانە رەسەيدىڭ ءىرى ساۋدا ماركەتتەرىنەن كەزدەستىرۋگە بولادى.

وقو اكىمىنىڭ ءباسپاسوز قىزمەتى