قر ۇلتتىق مۋزەيىندە «قۋاتتى ءوڭىر – قۋاتتى قازاقستان» وڭتۇستىك قازاقستان وبلىسى كۇندەرىنىڭ العاشقى شاراسى «شىرايلى وڭتۇستىكتىڭ شەجىرەسى» وبلىستىق بەينەلەۋ ونەرى مۋزەيى كورمەسىنىڭ سالتاناتتى اشىلۋىمەن باستالدى. مەرەيتويلىق شارانىنىڭ تۇساۋىن كەسكەن وبلىس اكىمىنىڭ ورىنباسارى ۇلاسبەك سادىبەكوۆ كورمەگە كەلۋشىلەرگە العىسىن ءبىلدىرىپ، تاۋەلسىزدىك تويىمەن قۇتتىقتادى.

جىلجىمالى كورمەگە كەلۋشىلەر بۇل كۇنى تاريحي كەزەڭدەر سۋرەتتەلگەن 120 كارتينالار مەن گرافيكا جانە گوبەلەندەردى تاماشالادى. ونەر تۋىندىلارىندا، نەگىزىنەن، حاندىق داۋىردەن باستاۋ الىپ، قازاق ەلىنىڭ ماڭىزدى وقيعالارىن باياندايتىن، قازاقستانداعى 1916 جىلعى ۇلت-ازاتتىق كوتەرىلىس، ۇلى وتان سوعىسى، بەيبىت ءومىر، وندىرىستىك دامۋ، الەۋمەتتىك تۇرمىستىڭ كوتەرىلۋى، اۋىل شارۋاشىلىعى ەڭبەككەرلەرى بەينەلەنگەن.

سونىمەن قاتار، شارا اياسىندا قر ەڭبەك سىڭىرگەن قىزمەتكەرى، اقىن ءحانبيبى ەسەنقاراقىزىنىڭ «جۇزدەسەيىك...» شىعارماشىلىق كەشى ءوتتى. «الاش» سىيلىعىنىڭ، «پاراسات» وردەنىنىڭ يەگەرى ح.ەسەنقاراقىزى ەل ەگەمەندىگىنىڭ شيرەك عاسىرلىق تويىنا وراي ۇيىمداستىرىلعان ەسەپ بەرۋ كەشىندە سياسى كەپپەگەن جاڭا تۋىندىلارىمەن استانا جۇرتشىلىعىن تانىستىرىپ، وقىرماندارمەن سىرلاستى.

بۇل كۇندەرى وبلىس دەلەگاتسياسى استانا حالقىنا ءوڭىردىڭ تاريحى، مادەنيەتى مەن نەگىزگى جەتىستىكتەرىن تانىستىرىپ، وتاندىق تاۋار وندىرۋشىلەردىڭ ءونىمىن ۇسىنادى.

وقو اكىمىنىڭ ءباسپاسوز قىزمەتى