قىزىلوردا وبلىسىنىڭ اكىمى قىرىمبەك كوشەرباەۆ وبلىستىق ءماسليحاتتىڭ سەسسياسىندا ءوڭىردىڭ جەتىستىكتەرى مەن وزەكتى ماسەلەلەر تۋرالى باياندادى.

– وكىنىشكە قاراي، بايقوڭىر قالاسىنىڭ بيۋدجەتى تەك اعىمداعى ماسەلەلەردى شەشۋگە باعىتتالۋدا. رەسەي فەدەراتسياسى سوڭعى جىلدارى قالانى دامىتۋعا قاتىستى ءىس-شارالاردى قارجىلاندىرۋدى قاراستىرۋدى مۇلدەم جاۋىپ قويدى دەسەك تە بولادى. ءبىز كەشەن نىساندارىن جالعا بەرگەنىمىزبەن قالا اۋماعىندا تۇراتىن ءوز ازاماتتارىمىزدى جالعا بەرگەن جوقپىز، ولار ءۇشىن قاي كەزدە دە جاۋاپتىمىز. سوندىقتان، بايقوڭىر قالاسىندا تۇراتىن قازاقستان رەسپۋبليكاسىنىڭ ازاماتتارىنىڭ ءومىر ءسۇرۋ دەڭگەيىنىڭ  تومەندەۋىنە جول بەرمەس ءۇشىن ءبىز بىرقاتار شارالاردى قولعا الۋدامىز.

وبلىس اكىمى ايتىپ وتكەندەي، رەسەي فەدەراتسياسىنىڭ يۋريسديكتسياسى جاعدايىندا قازاقستاننىڭ بارلىق ەلدى مەكەندەرىنىڭ دامۋىنا سەپتىگىن تيگىزىپ وتىرعان مەملەكەتتىك باعدارلامالاردىڭ مۇمكىندىكتەرىن قالانى دامىتۋعا پايدالانا الماي وتىر.

– ءبىزدىڭ بارلىق ارەكەتتەرىمىز ۇكىمەتارالىق كەلىسىمدەردە رەگلامەنتتەلگەن. سوندىقتان، 8 شىلدە كۇنى ماسكەۋ قالاسىندا وتكەن بايقوڭىر قالاسىنىڭ رەسەي فەدەراتسياسى تاراپىنان جالعا الىنۋ جاعدايلارىندا الەۋمەتتىك جانە ينجەنەرلىك ينفراقۇرىلىمىن قولداۋعا جانە دامىتۋعا قازاقستاندىق تاراپتىڭ  قاتىسۋ مۇمكىندىگى تۋرالى «بايقوڭىر» كەشەنى بويىنشا قازاقستان - رەسەي ۇكىمەتارالىق كوميسسياسىنىڭ سوڭعى ء(تورتىنشى) وتىرىسىنىڭ شەشىمى ءبىز ءۇشىن ماڭىزدى بولدى. اتالعان ماسەلەنى ءبىز بىرنەشە مارتە كوتەردىك، - دەپ اتاپ ءوتتى ق.كوشەرباەۆ.

بۇل جاعداي قالانى جالدىق مارتەبەدەن بىرتە-بىرتە شىعارۋعا مۇمكىندىك بەرەدى.

abai.kz