بۇرىن فۋتبولدان رەسەي قۇراما كومانداسىنىڭ كاپيتانى بولعان اندرەي ارشاۆين بۇل كۇندەرى الماتىنىڭ "قايراتىندا" دوپ تەۋىپ جۇرگەنىن سپورتسۇيەر قاۋىم جاقسى بىلەدى.

سول ارشاۆين جۋرناليستەرگە بەرگەن سۇحباتىندا: "ماعان الماتى ۇنايدى. مۇندا ءبارى تاماشا. دوستارىم دا كوپ. شىنىمدى ايتسام، ورىسشا سويلەمەيتىن ەلدەرگە بارعىم كەلمەيدى. ال قازاقستاندا بۇل تۇرعىدان قيىندىق جوق. مۇندا ءبارى ورىسشا سويلەيدى. تۋرا رەسەي سياقتى", - دەپتى.

ءبىز شىندىعىندا رەسەي سەكىلدىمىز بە؟ بۇل سوزىمەن فۋتبولشى نەنى ايتپاق بولىپ وتىر؟ قازاقستاننىڭ مەملەكەتتىك ءتىلى بار تاۋەلسىز ەل ەكەنىن مويىندامايتىنىن با؟ قازاقستانداعى حالىقتىڭ 82 پايىزى مەملەكەتتىك تىلدە سويلەيتىنى تۋرالى رەسمي اقپارات بار. ارشاۆين سول رەسمي دەرەكتەردى جوققا شىعارىپ، ءوز استاناسىن سالعان، ءوز ەلباسىن تورگە وزدىرعان قازاقستاندى الەمگە تەنتەك بالاداي قاۋىپ ءتوندىرىپ وتىرعان رەسەيگە ۇقساتقانى قاي ساسقانى؟

قازاقستان رەسەيگە ۇقسامايدى.

بۇل جەردە رەسەيدەگىدەي شوۆينيزم جوق.

بۇل جەردە جيرونوۆكي سەكىلدى وزگە ەلدىڭ مەملەكەتتىك تۇتاستىعىنا قاۋىپ توندىرەتىن قۋىرشاق ساياساتكەرلەردى شاممەن ىزدەسەڭىز دە تاپپايسىز.

بۇل جەردە قىرىمدى باسىپ الۋدى دۇرىس دەپ سانايتىن حالىق تۇرمايدى. 

بۇل جەردە الەمدى وزىنە جاۋ سانايتىن، اتوم بومباسىمەن جۇرتتىڭ بارىنە سەس كورسەتۋدى عانا بىلەتىن ايۋ توتەمدى ۇلت ەمەس، قوناقجاي قازاق حالقى تۇرادى.

سول قوناقجايلىلىقتى ارشاۆين تۇسىنە الماسا، نە دەمەك كەرەك؟

ونىڭ اينالاسىنداعى از ساندى حالىق ورىسشا سويلەدى ەكەن دەپ، قازاقستاندى رەسەيگە ۇقساتا سالۋ - ساۋاتسىزدىق. 

ءبىزدىڭ ايتپاعىمىز وسى عانا...

ءشارىپحان قايسار

Abai.kz