كەشە ماقتارال اۋدانى اكىمىنىڭ اپپاراتىندا ماقتا شارۋاشىلىعىنىڭ بۇگىنى جانە بولاشاعى ماسەلەسىندە بەيرەسمي جينالىس بولىپ ءوتتى. جيىنعا اۋدان اكىمى عالىم يسمايلوۆ، وقو اۋىل شارۋاشىلىعى باسقارماسىنىڭ باسشىسى سەرىك تۇربەكوۆ جانە قازاق ماقتا شارۋاشىلىعى عىلىمي-زەرتتەۋ ينستيتۋتىنىڭ باسشىلارى، ماقتا زاۋىتتارى مەن پۋنكتتەرىنىڭ وكىلدەرى قاتىستى.                                           

ماقتارال اۋدانى اۋماعىندا ماقتا تۇقىمى شارۋاشىلىعىن دامىتۋ، ماقتا ءونىمىن ۇلعايتۋ ماسەلەلەرى قاراستىرىلعان جيىندا قازاق ماقتا شارۋاشىلىعى عىلىمي-زەرتتەۋ ينستيتۋتىنىڭ باسشىسى يبادۋللا ۇمبەتاەۆ ماقتا تۇقىمى شارۋاشىلىعىن ۇيىمداستىرۋداعى نەگىزگى كەمشىلىكتەردى اتاپ كورسەتتى. ونىڭ ايتۋىنشا، تۇقىم ەگىلەتىن ەگىستىكتەردىڭ بىتىراڭقىلىعى، تۇقىمدىق القاپتاردا اگروتەحنيكالىق تالاپتاردىڭ ساقتالماۋى، ماقتا قابىلداۋ كەزىندە زاۋىتتاردا ەليتالىق جانە رەپرودۋكتسيالىق دايىندالعان ماقتانىڭ بەلگىسىز تاۋارلىق ماقتالارمەن ارالاسۋى – ماقتا سورتىنىڭ كەلەشەگىن جويادى ەكەن. سونىمەن قاتار، كوپ سورتتىلىق (تۇقىمنىڭ زاۋىتتا ارالاسىپ كەتۋى), ماقتا زاۋىتتارىنىڭ سەبىلەتىن تۇقىمدى دايىنداۋعا جانە دايىنداۋعا ارنالعان ارنايى جابدىقتارمەن جابدىقتالماۋى دا تۇقىم شارۋاشىلىعىن دامىتۋدا كەدەرگى جاساپ جاتقانىن عالىم اتاپ ءوتتى.

وقو اۋىلشارۋاشىلىعى باسقارماسىنىڭ باسشىسى سەرىك تۇربەكوۆ «ماقتا شارۋاشىلىعىن كووپەراتسيالاۋ مەحانيزمى» جوباسىن ۇسىندى. جوبا بويىنشا ماقتا زاۋىتتارى مەن شارۋالاردى بىرىكتىرىپ «اكتسيونەرلىك قوعام (اق)» قۇرۋ كەرەكتىگى ايتىلدى جانە وسى ارقىلى زاۋىتتا اكتسياسى بار شارۋالاردىڭ زاۋىتتى باسقارۋ مۇمكىندىكتەرى اشىلادى. «ۇسىنىلىپ وتىرعان ماقتا شارۋاشىلىعىن كووپەراتسيالاۋ مەحانيزمىنىڭ ارتتىقشىلىعى شارۋالار زاۋىتپەن بىرىگىپ تۇپكىلىكتى ناتيجەگە قول جەتكىزۋگە ىنتالى بولادى جانە قايتا وڭدەۋ كاسىپورىندارى قاجەتتى شيكىزاتپەن تۇراقتى تۇردە قامتاماسىز ەتىلەدى. ءارى قاراي وقو توقىما ءوندىرىسى كاسىپورىندارىمەن ءوزارا ءتيىمدى كووپەراتسيالاۋ مۇمكىندىگى بار» - دەيدى سەرىك تۇربەكوۆ.

Abai.kz