شاردارا اۋدانىندا ەل تاۋەلسىزدىگىنىڭ 25 جىلدىعىنا وراي جاڭادان بالىق زاۋىتى ىسكە قوسىلدى. ۇدەمەلى يندۋستريالدى-يننوۆاتسيالىق دامۋ باعدارلاماسى اياسىندا 200 ملن. تەڭگەگە قۇرىلىس جۇمىستارى جۇرگىزىلگەن جاڭا عيماراتتىڭ اشىلۋ سالتاناتىنا وبلىس اكىمى جانسەيىت تۇيمەباەۆ قاتىسىپ، قۇتتىقتاۋ ءسوز سويلەدى.

«قۇرمەتتى شاردارالىقتار! مەرەكە قارساڭىندا 40 ادامدى جۇمىسپەن قامتىعان جاڭا زاۋىت اشىلىپ جاتىر. ەلدىڭ الەۋمەتتىك-ەكونوميكالىق جاعدايىن ارتتىراتىن بۇل جۇمىس ورنى قۇتتى بولسىن. زاۋىتتىڭ ىسكە قوسىلۋىنا مۇرىندىق بولعان جەكە كاسىپكەر تالعات جالعاسباەۆقا العىسىم شەكسىز. ول ءوز ءونىمىمىزدى ۇقساتىپ، الىس جانە شەت ەلگە شىعارىپ وتىر. ولاي بولسا، جاڭا كاسىپورىن يگىلىكتەرىڭىزگە جۇمىس ىستەي بەرسىن دەگىم كەلەدى، - دەگەن جانسەيىت قانسەيىتۇلى ءبىر توپ ارداگەرلەرمەن بىرگە جاڭا عيماراتتىڭ لەنتاسىن قيدى.  

كاسىپورىن باسشىسى تالعات جالعاسباەۆ وبلىس اكىمىنە زاۋىتتىڭ ءىشى-سىرتىن كورسەتىپ، بالىق وڭدەۋ پروتسەسىمەن تانىستىردى. تەڭىز جاعاسىنان بوي كوتەرگەن بالىق وڭدەۋ كاسىپورنىندا بالىق ەتى مەن تۇزدالعان جانە قاقتالعان بالىق ونىمدەرى وندىرىلەدى. ال جىلدىق قۋاتتىلىعى 600 مىڭ توننا بالىق ونىمدەرىن قۇرايدى.

باسەكەگە قابىلەتتى بالىق ونىمدەرىن شىعارىپ، ەلىمىزدىڭ ازىق-تۇلىك قاۋىپسىزدىگىن قامتاماسىز ەتۋگە باعىتتالعان بۇل زاۋىتتىڭ ماڭىزى زور ەكەنىن ايتقان ايماق باسشىسى كاسىپورىن جۇمىسىنا ساتتىلىك تىلەدى.  

ايتا كەتەيىك، بۇعان دەيىن اۋداندا ەكى بالىق وڭدەۋ زاۋىتى جۇمىس ىستەپ كەلگەن بولاتىن. «حاميت» ستك-ءى مەن «شاردارا بالىق – 1» بالىق وڭدەۋ زاۋىتتارى بيىلعى جىلى ەسەپتى مەرزىمدە 3700 تن. بالىق ونىمدەرىن ءوندىرىپ، الىس-جاقىن شەت ەلدەرگە ەكسپورتقا شىعارىپ وتىر.

شاردارا اۋدانىنا جۇمىس ساپارى بارىسىندا اكىم شاردارا سۋ ەلەكتر ستانساسىنىڭ جۇمىسىمەن دە تانىستى.   

Abai.kz