بۇگىن وڭتۇستىك قازاقستاندا ەل تاۋەلسىزدىگىنىڭ 25 جىلدىق مەرەيتويىنا ارنالىپ جارىق كورگەن «تاۋەلسىزدىك تەبىرەنىستەرى» شىعارمالار جيناعى مەن «تاۋەلسىزدىكتىڭ 25 جۇلدىزدى ءساتى» فوتوالبومىنىڭ، «قازاقستان جولى: ۇلت كوشباسشىسىمەن بىرگە 25 جىل بەيبىتشىلىك پەن جاسامپازدىق» حالىقارالىق عىلىمي-تاجىريبەلىك كونفەرەنتسياسىنىڭ ەڭبەكتەرىنەن جيناقتالعان ءۇش كىتاپتىڭ تۇساۋكەسەر ءراسىمى ءوتىپ، جاڭا تۋىندىلاردىڭ كورمەسى ۇيىمداستىرىلدى. سونىمەن بىرگە، وسى كۇنى كەلۋشىلەر نازارىنا ەگەمەندىك جىلدارىندا ەلباسىمىزدىڭ وڭتۇستىككە جاساعان ساپارلارى مەن وڭىردە اتقارىلعان يگىلىكتى ىستەر باياندالعان «تاۋەلسىزدىك تۇعىرىم» دەرەكتى ءفيلمى تۇڭعىش رەت ۇسىنىلىپ، تانىستىرىلدى.

«وتىرار» وبلىستىق عىلىمي-امبەباپ كىتاپحاناسىندا وتكەن شاراعا وبلىس اكىمى جانسەيىت تۇيمەباەۆ پەن زيالى قاۋىم وكىلدەرى، وبلىس ارداگەرلەرى مەن مادەنيەت جانە ونەر مەكەمەلەرىنىڭ قىزمەتكەرلەرى، جوعارى وقۋ ورىندارىنىڭ وقىتۋشىلارى، عالىمدار جانە باق وكىلدەرى قاتىستى.  

سالتاناتتى شارادا ءسوز باستاعان وبلىس اكىمى جانسەيىت تۇيمەباەۆ شيرەك عاسىرلىق وسىناۋ ۇلى دۋماندا مۇنداي شىعارماشىلىق تۋىندىلاردىڭ جاسالىپ، كەيىنگى ۇرپاققا ەستەلىك رەتىندە قالۋى ماڭىزدى ەكەنىنە توقتالدى. سونداي-اق ءوڭىر باسشىسى تۇڭعىش پرەزيدەنتىمىز نۇرسۇلتان نازارباەۆ بەينەلەنگەن 10 مىڭ تەڭگەلىك جاڭا قاعاز اقشانىڭ العاشقى بانكنوتىن كوپشىلىك نازارىنا ۇسىندى.  

«تاۋەلسىزدىك جىلدارىندا ەلباسىنىڭ ەلگە سىڭىرگەن ەڭبەگى وراسان. سوندىقتان  وسىنداي شەشىم قابىلدانىپ وتىر. مۇندا پرەزيدەنتتىڭ پورترەتى. استانانىڭ بويتۇمارى سانالاتىن «بايتەرەك». ەلدىگىمىزدىڭ ەلورداسى. ىنتىماعى جاراسقان كوپۇلتتى xالقىمىزدىڭ ورتاق شاڭىراعى – قازاقستان كارتاسى. تاۋەلسىزدىكتىڭ 25 جىلدىعىنا تارتۋ رەتىندە شىعارىلاتىن 10 مىڭ تەڭگەلىك جاڭا اقشا ەلىمىزدىڭ تاريحىنان سىر شەرتەدى»، - دەدى جانسەيىت قانسەيىتۇلى.  

بانكنوتتىڭ ەكىنشى بەتىندە «قازاق ەلى» مونۋمەنتىندەگى كيەلى سامۇرىق قۇس، ء«ومىر اعاشى» كورىنىس تاپقان. بۇل – تاريحي تامىرى تەرەڭنەن باستاۋ الاتىن ەگەمەندى ەلدىڭ بەينەسى.

«ەلباسى مەن تاۋەلسىزدىك ەگىز ۇعىم. ويتكەنى قازاقستانداعى قايبىر جەتىستىك تە ۇلت كوشباسشىسىنىڭ جانقيارلىق ەرلىگىمەن، ەلدىڭ ەرەن ەڭبەگىمەن تىكەلەي بالانىسىپ جاتىر. مۇنى سىزدەر تاۋەلسىزدىكتىڭ 25 جىلدىق مەرەيتويىنا وراي وبلىسىمىزدا شىعارىلىپ وتىرعان بۇگىنگى كىتاپتاردان دا ايقىن اڭعارا الاسىزدار»، - دەدى ج.تۇيمەباەۆ.

وبلىس اكىمى كىتاپحانا باسشىلىعىنا تۇركيا ەلىنەن ارنايى جولدانعان  ەلباسى تۋرالى بىرنەشە جۋرنال مەن كىتاپتاردى دا تارتۋ ەتتى. تۇرىك ەلىنىڭ سازگەرلەرى ازىرلەگەن ەلباسى تۋرالى اندەر جيناعىن دا ارنايى تانىستىردى.

«تاۋەلسىزدىك تەبىرەنىستەرى» كىتابىندا ءوڭىرىمىزدىڭ ايتۋلى قالامگەرلەرىنىڭ تۋىندىلارى جيناقتالىپ، جاريالانعان. «قازىعۇرت» باسپاسىنان 1000 دانامەن جارىق كورىپ، تۇساۋى كەسىلگەن جيناق «پوەزيا»، «پروزا»، «پۋبليتسيستيكا» اتتى ءۇش بولىمنەن تۇرادى.

«تاۋەلسىزدىكتىڭ 25 جۇلدىزدى ءساتى» كىتابىندا – وڭتۇستىك قازاقستان وبلىسىنىڭ شيرەك عاسىرداعى جەتىستىكتەرى باياندالادى. مۇندا وڭىردەگى ءار سالا بويىنشا 25 جىلدىق كورسەتكىشتەر پاش ەتىلىپ، وبلىس حالقىنىڭ وسى شيرەك عاسىر ىشىندەگى تار جول، تايعاق كەشۋدەن ءوتىپ، نەبىر قيىندىققا قايىسپاي ەتكەن ەڭبەگى، توگىلگەن ماڭداي تەرى، قول جەتكەن جەتىستىگى قامتىلادى.

ال ءۇشىنشى باسىلىم - «قازاقستان جولى: ۇلت كوشباسشىسىمەن بىرگە 25 جىل بەيبىتشىلىك پەن جاسامپازدىق» حالىقارالىق عىلىمي-تاجىريبەلىك كونفەرەنتسياسىنىڭ قۇندى ەڭبەكتەرىنەن جيناقتالعان كىتاپتا تاياۋدا مۇحتار اۋەزوۆ اتىنداعى وڭتۇستىكتىك قازاقستان مەملەكەتتىك ۋنيۆەرسيتەتىندە وتكەن حالىقارالىق عىلىمي كونفەرەنتسياداعى عىلىمي ماقالالار ورىن العان. وندا اقش، كانادا، يرلانديا، وڭتۇستىك، كورەيا، رەسەي فەدەراتسياسى سىندى مەلەكەتتەر عالىمدارىنىڭ ورتاق تالقىعا تۇسكەن 300-دەي باياندامالارىن وقۋعا بولادى.  

«تاۋەلسىزدىك - تۇعىرىم» دەرەكتى فيلمىندە قر پرەزيدەنتى ن.نازارباەۆتىڭ وبلىسقا جاساعان ساپارلارى مەن وڭىرىمىزدە اتقارىلعان يگىلىكتى ىستەرگە قاتىستى ازىرلەنگەن. ەلباسى وڭتۇستىككە 40-تان استام رەت ساپار جاساسا، تەك تۇركىستان قالاسىنىڭ وزىنە 13 رەت اتباسىن بۇرىپ، وندا 6 رەت مەملەكەت باسشىلارىمەن رەسمي كەزدەسۋلەر وتكىزىپتى. فيلمدە ەلباسىنىڭ سول كەزدەردەگى بەلگىلى ءبىر قوعامدىق قۇبىلىستار مەن وقيعالارعا بايلانىستى بىلدىرگەن پىكىرلەرى مەن ايتقان ويلارى كورسەتىلگەن. ەڭبەك وڭتۇستىك قازاقستان وبلىسى اكىمدىگىنىڭ تاپسىرىسى بويىنشا «ساق» كينوستۋدياسىندا جاسالعان.

Abai.kz