بۇگىن وڭتۇستىك قازاقستاندا ەل تاۋەلسىزدىگىنىڭ 25 جىلدىعىنا ارنالعان «تاۋەلسىزدىك - تۇعىرىم» اتتى سالتاناتتى شاراسى ءوتتى.

شىمكەنتتەگى «كورمە» ورتالىعىندا ۇيىمداستىرىلعان جيىنعا قر پرەمەر-ءمينيسترىنىڭ ورىنباسارى – قر اۋىل شارۋاشىلىعى ءمينيسترى اسقار مىرزاحمەتوۆ، وبلىس اكىمى جانسەيىت تۇيمەباەۆ، وبلىستىق ءماسليحات دەپۋتاتتارى مەن باسقارما باسشىلارى، زيالى قاۋىم وكىلدەرى مەن ارداگەرلەر، ساياسي پارتيا فيليالدارىنىڭ جەتەكشىلەرى مەن ۇكىمەتتىك ەمەس جانە قوعامدىق ۇيىمدار جەتەكشىلەرى، ءتۇرلى سالا قىزمەتكەرلەرى جانە باق وكىلدەرى، جالپى سانى 1 مىڭنان استام ادام قاتىستى.

سالتاناتتى دۋماندا ءسوز باستاعان وبلىس اكىمى ج.تۇيمەباەۆ ىنتىماقتى ۇران، تاتۋلىقتى تۋ ەتكەن بەيبىت حالقىمىزدىڭ ۇلىق مەرەكەسىمەن قۇتتىقتاپ، تاۋەلسىزدىك ۇعىمىنا كەڭىنەن توقتالدى.

«تاۋەلسىزدىك كۇنى – بار عۇمىرىن بوستاندىق ءۇشىن كۇرەسكە ارناعان بوزداقتاردىڭ جانكەشتى ەڭبەگى مەن ەرەن ەرلىگىن ەسكە الاتىن قاستەرلى مەرەكە. تاريحتان الار ءتالىم مول. ءبىز وتكەنىمىزگە قۇرمەتپەن قاراپ، بولاشاعىمىزعا سەنىممەن كوز تىككەن حالىقپىز. الەمدىك قاۋىمداستىقتىڭ اجىراماس بولشەگى رەتىندە تاۋەلسىز ەل اتانۋ تەك بيىك مارتەبە عانا ەمەس. سونىمەن قاتار، وراسان زور جاۋاپكەرشىلىك جۇگىن ارتاتىندىعىن دا ءبىز جاقسى تۇسىنەمىز»، - دەدى وبلىس اكىمى.

مۇنان سوڭ، ايماق باسشىسى مەملەكەتتىك جانە قوعامدىق قىزمەتتە سىڭىرگەن ەڭبەگى، ەلدىڭ الەۋمەتتىك-ەكونوميكالىق جانە مادەني دامۋىنا، حالىقتار اراسىنداعى دوستىق پەن ىنتىماقتاستىقتى نىعايتۋعا قوسقان ەلەۋلى ۇلەسى ءۇشىن بىرقاتار قىزمەتكەرلەرگە مەملەكەتتىك ناگرادالار تاپسىردى. اتاپ ايتقاندا، وڭىرىمىزدەگى 42 ازامات «قۇرمەت» وردەنىمەن، ءىىى دارەجەلى «ەڭبەك داڭقى» وردەنىمەن، «ەرەن ەڭبەگى ءۇشىن» جانە «شاپاعات» مەدالدارىمەن ماراپاتتالدى. سونىمەن بىرگە، ايماعىمىزداعى ءبىلىم بەرۋ (50 جولداما), دەنساۋلىق ساقتاۋ (50 جولداما) جانە مادەنيەت (10 جولداما) سالاسىنىڭ قىزمەتكەرلەرى – جالپى سانى 110 ادامعا تۇركياعا بارىپ، تاجىريبە الماسۋ ءۇشىن وبلىس اكىمىنىڭ جولداماسى تاپسىرىلدى.

سونىمەن قاتار، شارا بارىسىندا وبلىس اكىمى جانسەيىت تۇيمەباەۆ قر پرەمەر-ءمينيسترىنىڭ ورىنباسارى – قر اۋىل شارۋاشىلىعى ءمينيسترى اسقار مىرزاحمەتوۆكە «قازاقستان مەن تۇركيا دوستىعىن جانە ىنتىماقتاستىعىن نىعايتقانى ءۇشىن» مەدالىن تابىستادى.

ءوز كەزەگىندە، بارشا وڭتۇستىك جۇرتشىلىعىن ەگەمەندىكتىڭ مەرەيلى تويىمەن قۇتتىقتاپ، الداعى ۋاقىتتا دا وسىناۋ قاستەرلى مەرەكەنى ماڭگىلىككە ساقتاۋعا شاقىرعان  اسقار يسابەكۇلى ەلىمىزدىڭ بارلىق سالالاردا جەتكەن جەتىستىكتەرىنە جەكە-جەكە توقتالىپ، رەسپۋبليكامىزدىڭ وسىناۋ دامۋ بەلەسىندە وڭتۇستىك قازاقستان وبلىسىنىڭ ۇلەسى وراسان ەكەنىن جەتكىزدى.

«تاۋەلسىزدىك جىلدارى قازاقستان ەكونوميكالىق، ساياسي، الەۋمەتتىك دامۋدا تولاعاي تابىستارعا جەتتى. ستاتيستيكالىق مالىمەتتەرگە سۇيەنسەك، وسى مەرزىم ىشىندە الەۋمەتتىك سالاداعى جۇمىسسىزدىق دەڭگەيى 3 ەسەگە قىسقارىپ، حالىقتىڭ جان باسىنا شاققانداعى كىرىسى 10 ەسەگە ۇلعايدى. جالپى ىشكى ءونىم كولەمى 300 اقش دوللارىنان 11 مىڭ اقش دوللارىنا جەتىپ، تۇرعىنداردىڭ ورتاشا ءومىر ءسۇرۋ ۇزاقتىعى 72 جاسقا دەيىن جەتىپ وتىر»، - دەدى ا.مىرزاحمەتوۆ.

مەرەكەلىك دۋمان بارىسى «تاۋەلسىزدىك تۇعىرىم» تەاترلاندىرىلعان سازدى-حورەوگرافيالىق قويىلىمىمەن جالعاسىپ، «ايبارى مىقتى قازاقستان»، «نۇرىن شاشقان - وڭتۇستىك»، «اسەم قالا استانا»، «ەل بىرلىگى – تاۋەلسىزدىك تىرەگى» جانە «بىرلىگى جاراسقان – ماڭگىلىك ەل» سازدى-حورەوگرافيالىق قويىلىمدارىنا ۇلاستى. سونداي-اق، مەرەكەدە تۇركيالىق كومپوزيتور، ءانشى، بۇگىنگى سالتاناتتى ءىس-شارانىڭ قوناعى ورحان چاكماكتىڭ ورىنداۋىندا «نۇرسۇلتان نازارباەۆ» ءانى مەن ب.ورالۇلىنىڭ «قازاق ەلى وسىنداي»، ا.اسانوۆتىڭ «ماڭگىلىك ەل ءۇشىن» اندەرى ورىندالدى.

مەرەكەلىك شارانىڭ قورىتىندى ساتىندە وڭتۇستىك قازاقستان وبلىسى اكىمىنىڭ ىقىلاس گۇلى تاپسىرىلدى.

تاۋەلسىزدىكتىڭ 25 جىلدىعى شىن مانىندەگى بۇكىلحالىقتىق ۇلىق مەرەكەگە اينالدى.

وسى ورايدا، وبلىستا اتقارىلعان اۋقىمدى جۇمىستاردىڭ بىرقاتارىن اتاپ وتسەك.

قازان ايىندا استانا قالاسىندا وڭتۇستىك قازاقستان وبلىسىنىڭ كۇندەرى «قۋاتتى ءوڭىر – قۋاتتى قازاقستان» دەگەن اتپەن جوعارى دەڭگەيدە وتكىزىلدى. 21 قاراشادان باستاپ «ۇلى دالا ەلى – تاۋەلسىزدىكتىڭ 25 نەگىزى» جۇلدىزدى 25 كۇن» اتتى باستى مەرەكەلىك ءىس-شارالار بارلىق اۋداندار مەن قالالاردا وتكىزىلۋدە. مەرەكەلىك شارالاردان اۋىلداعى اعايىننىڭ شەت قالماۋى دا باستى نازاردا. اۋىل تۇرعىندارىنىڭ مەرەكەلىك كوڭىل-كۇيدى سەزىنىپ، بەلسەندىلىكتى، پاتريوتتىق قۇلشىنىس پەن ۇمتىلىستى بيىكتەتە ءتۇسۋى ءۇشىن «ونەرىم ساعان، اۋىلىم!» اتتى باستاما كوتەرىلدى. وبلىس ورتالىعىنداعى بارلىق مادەنيەت مەكەمەلەرىنىڭ ۇجىمدارى اۋداندار مەن اۋىلدارعا، شالعاي ەلدى مەكەندەرگە گاسترولدىك ساپارمەن بارۋدا.

«شالعاي ەلدى مەكەن تۇرعىندارىنا مەديتسينالىق كومەك كورسەتۋ» اكتسياسى مەن اۋىلشارۋاشىلىق جانە باسقا دا تۇرمىستىق تاۋارلار جارمەڭكەلەرى جۇيەلى تۇردە ۇيىمداستىرىلىپ كەلەدى.

تاۋەلسىزدىكتىڭ 25 جىلدىعى قارساڭىندا 25 سپورت الاڭشاسى ەل يگىلىگىنە پايدالانۋعا بەرىلىپ، 25 ەلدى مەكەن تۇرعىندارىنا اۋىزسۋ مەن تابيعي گاز، 17 ەلدى مەكەننىڭ ەلەكتر جۇيەسى جاڭارتىلدى.

سونىمەن قاتار، 500 مىڭ شارشى مەتر تۇرعىن ءۇي پايدالانۋعا بەرىلىپ، 4 مىڭنان استام وتباسى تۇرعىن ۇيمەن قامتاماسىز ەتىلدى.

مەرەكە قارساڭىندا وبلىستا 35 ءبىلىم وشاعى، 4 بالاباقشا، 2 سپورت كەشەنى، 2 سۋ قويماسى، 8 مادەنيەت ءۇيى، 1 ەمحانا، 1 ارنايى حالىققا قىزمەت كورسەتۋ ورتالىعى، 1 مۇگەدەكتەرگە ارنالعان پسيحونەۆرولوگيا ديسپانسەرى تاپسىرىلدى.

تاۋەلسىزدىكتىڭ ەڭ باستى جەتىستىگى – حالىقتىڭ ىنتىماق-بىرلىگى مەن قوعامنىڭ تۇراقتىلىعى. مەملەكەتتىڭ سىندارلى ساياساتتىڭ ارقاسىندا ەلىمىزدە ەتنوسارالىق جانە كونفەسسياارالىق تولەرانتتىلىقتىڭ كەرەمەت ۇلگىسى قالىپتاستى.

ءاربىر ازاماتتىڭ ەتنيكالىق جانە ءدىني ەرەكشەلىگىنە قاراماستان اتا زاڭىمىزدا كەپىلدىك بەرىلگەن ازاماتتىق قۇقىقتارى مەن بوستاندىقتارىن تولىق پايدالانا الاتىنداي ەرەكشە سەنىم مەن ءوزارا تۇسىنىستىك ورنادى.

جاسامپازدىقتىڭ 25 جىلىندا قازاقستان كوپتەگەن ءىرى حالىقارالىق ۇيىمدارعا مۇشە بولىپ، ولاردىڭ بىرقاتارىنا توراعالىق ەتتى. ەلىمىزدىڭ وزگەلەرمەن تەرەزەسى تەڭەلىپ، قۇقىقتىق-دەموكراتيالىق، زايىرلى ءارى ىرگەتاسى بەرىك مەملەكەتتەر شوعىرىنا قوسىلدىق. ەلىمىزدىڭ تۇڭعىش پرەزيدەنتى نۇرسۇلتان ءابىشۇلى نازارباەۆتىڭ كورەگەن باسشىلىعىمەن بۇگىندە قازاقستان ورتالىق ازياداعى كوشباسشى مەملەكەتكە اينالدى.

قازاقستان حالىقارالىق ارەنالاردا زور جەتىستىكتەرگە قول جەتكىزىپ كەلەدى. سونىڭ ءبىر ايعاعى كەلەر جىلى ەلوردامىز - استانادا «ەكسپو» حالىقارالىق كورمەسىنىڭ وتەتىندىگى جانە ەلىمىزدىڭ بىرىككەن ۇلتتار ۇيىمى قاۋىپسىزدىك كەڭەسىنىڭ مۇشەسى بولاتىندىعىن ايتۋعا بولادى.

مەملەكەتىمىزدىڭ دامىپ، وركەندەۋى جولىندا وڭتۇستىك قازاقستان وبلىسىنىڭ تۇرعىندارى دا ايانباي ەڭبەك ەتىپ كەلەدى. ەلباسى وبلىسىمىزعا كەلگەن ساپارلارىندا ناقتى تاپسىرمالار بەرىپ، ونىڭ جۇزەگە اسىرىلۋىن قاداعالاپ، وڭىرىمىزگە دەگەن ەرەكشە قامقورلىعىن كورسەتەدى. اتقارىلىپ جاتقان جۇمىستاردىڭ ناتيجەسىندە وڭتۇستىك قازاقستان وبلىسى الەۋمەتتىك-ەكونوميكالىق دامۋ بويىنشا جوعارى كورسەتكىشتەرگە جەتتى.

بيىل برازيليانىڭ ريو-دە-جانەيرو قالاسىندا وتكەن جازعى وليمپيادا ويىندارىندا وبلىس سپورتشىلارىنىڭ 1 كۇمىس، 1 قولا مەدال ەنشىلەپ، ەل مەرەيىن اسىرعانى دا تاۋەلسىزدىكتىڭ تورقالى تويىنا لايىقتى تارتۋ بولدى دەپ ايتا الامىز.

Abai.kz