قازاقستاننىڭ سولتۇستىك وبلىسىندا قالا مەن كوشە اتاۋلارىن قازاقشالاۋعا قارسى شىققان ازامات سوتتالۋدا، دەپ حابارلايدى «31 ارنا».

«قازاقستاننىڭ قالالارى مەن كوشە اتاۋلارىن قازاقشاعا وزگەرتەتىن بولسا رەفەرەندۋم وتكىزەمىز» دەپ لەپىرگەن پەتروپاۆل تۇرعىنىنىڭ ۇستىنەن قىلمىستىق ءىس قوزعالىپتى.

پەتروپاۆلدىڭ 37 جاستاعى تۇرعىنى يگور چۋپرين. ول قر قىلمىستىق كودەكسىنىڭ 174 بابى، «ۇلتارالىق ارازدىقتى قوزدىرۋ» بويىنشا ايىپتالعان. الەۋمەتتىك جەلى ارقىلى ۇلتارالىق جانە دىنارالىق ارازدىق تۋدىرتىپ، سەپاراتيستىك باستامالار كوتەرگەنى ءۇشىن ەندى ول زاڭ الدىندا جاۋاپ بەرەتىن بولادى.

سوتتا ايتىلعانداي 37 جاستاعى يگور چۋپرين 2014 جانە 2015 جىلدارى ءوزىنىڭ "Bكونتاكتە" الەۋمەتتىك پاراقشاسىندا حالىق اراسىنداعى الاۋىزدىقتى تۋدىراتىن جازبالاردى ۇنەمى ۇزدىكسىز جاريالاپ وتىرعان. اسىرەسە، پەتروپاۆلداعى اۋىلدار مەن كوشە اتاۋلارىنىڭ قازاق تىلىنە وزگەرۋىنە قارسى بولىپ، "ۆكونتاكتە" پاراقشاسىندا وزىنە جاقتاستار ىزدەگەن. اتالمىش جازبالار كوپتەگەن جەلى قولدانۋشىلارىنىڭ نارازىلىعىن تۋدىرعان.

- مەنىڭ "ويانىڭدار، رەفەرەندۋم" دەگەنى قاتتى جانىما باتتى. مەن بۇنى وزىمە ۇلتتىق قاۋىپ رەتىندە قابىلدادىم، دەدى كۋاگەرلەردىڭ ءبىرى دانيار ابجىكەەۆ. قازىر قازاقستاننىڭ بىرنەشە ايماعىندا كوشە اتاۋلارىن قازاقىلاندىرۋ جۇمىستارى جۇرگىزىلىپ جاتقانى بەلگىلى. ايدىڭ باسىندا استاناداعى ءبىرسىپىرا اتاۋلار وزگەرگەن بولاتىن. ال كۇنى كەشە عانا الماتىداعى جەتى كوشەنىڭ اتىن وزگەرتۋ تۋرالى شەشىمدى قالا باسشىسى باۋىرجان بايبەك شىعارعان-تىن.

Abai.kz