ونەر عانا ەمەس، ءومىردىڭ ءوزى شىنايى باسەكەلەستىك بولعان جاعدايدا عانا داميدى. مۇحتار اۋەزوۆ اتىنداعى قازاق مەملەكەتتىك اكادەميالىق دراما تەاترى جىل سايىن وتكىزىپ كەلە جاتقان «تەاتر كوكتەمى» فەستيۆالى ەڭ الدىمەن ونەر ۇجىمدارى اراسىنداعى وسى باسەكەلەستىكتى قالىپتاستىرۋعا باعىتتالعان دەسەك، قاتەلەسە قويمايمىز.

ۇلىستىڭ ۇلى كۇنى – ناۋرىز مەرەكەسى قارساڭىندا قازاق ونەرىنىڭ قارا شاڭىراعى سانالاتىن اۋەزوۆ تەاترىندا فەستيۆالدىڭ تۇساۋى كەسىلگەن بولاتىن. اتالمىش بايقاۋدىڭ اشىلۋىنا وراي وتكىزىلگەن ءباسپاسوز ءماسليحاتىن اشقان تەاتردىڭ ديرەكتورى ەرلان ءبىلال  بيىلعى فەستيۆال قازاقستاننىڭ حالىق ءارتىسى، كسرو مەملەكەتتىك سىيلىعىنىڭ لاۋرەاتى، پروفەسسور حاديشا بوكەەۆانىڭ 100 جىلدىعىنا ارنالاتىنىن ايتا كەلىپ، حالىقارالىق دارەجەدە وتكىزىلىپ وتىرعان فەستيۆالدىڭ قازىلار القاسىمەن تانىستىرعان.  بۇل جولى بايقاۋعا قاتىساتىن قويىلىمداردى  قازاق ونەرىنىڭ اقساقالى، كسرو حالىق ءارتىسى – ءاسانالى ءاشىموۆ، گرۋزيادان كەلگەن ونەرتانۋ دوكتورى، بلوگەر – لاشا چحارتيشۆيلي، ونەرتانۋ دوكتورى، ازەربايجان ۇلتتىق اكادەمياسىنىڭ ساۋلەت جانە ونەر ينستيتۋتىنىڭ تەاتر، كينو جانە تەلەۆيدەنيە ءبولىمىنىڭ مەڭگەرۋشىسى – ۆيتادي گافاروۆ، قازاقستاننىڭ ەڭبەك سىڭىرگەن قايراتكەرى، استانا جاستار تەاترىنىڭ كوركەمدىك جەتەكشىسى – نۇرقانات جاقىپباي، قازاقستاننىڭ ەڭبەك سىڭىرگەن قايراتكەرى، م.اۋەزوۆ اتىنداعى مەملەكەتتىك اكادەميالىق دراما تەاترىنىڭ ادەبيەت ءبولىمىنىڭ مەڭگەرۋشىسى – ءاليا بوپەجانوۆالار باعالايتىن بولادى. ءداستۇر بويىنشا قازىلار القاسىنىڭ مۇشەلەرى جۋرناليستەرگە فەستيۆال تۋراسىندا مالىمەتتەر بەرىپ، قويىلعان سۇراقتارعا جاۋاپ بەردى.

ناۋرىز ايىنىڭ 13 – 18 ارالىعىندا وتەتىن «تەاتر كوكتەمى – 2017» فەستيۆالىنە بيىل بەس سپەكتاكل قاتىسپاقشى. اتاپ ايتقاندا، ع. مۇسىرەپوۆتىڭ «اقان سەرى – اقتوقتى» تراگەدياسى، م. وماروۆانىڭ «اقتاستاعى احيكو» دراماسى، ر. كۋنيدىڭ «ماني – ماني» كومەدياسى، ق. مۇراتتىڭ «باقىت كىلتى» دراماسى، م. وماروۆانىڭ «كومبە ناننىڭ ءدامى» دراماسى كورەرمەندەر مەن قازىلار نازارىنا ۇسىنىلاتىن بولادى. فەستيۆال 18 ناۋرىزدا مارەسىنە جەتىپ، ح. بوكەەۆانى ەسكە الۋ كەشىمەن قورىتىندىلانادى.

قۋات قايرانباەۆ، «جەتىسۋ»

Abai.kz