جۋىردا وزبەكستان رەسپۋبليكاسى ستاتيستيكالىق كوميتەتىنىڭ حالىق ساناعى بويىنشا مالىمەتتەرى جاريالاندى. وندا 2017 جىلدىڭ 1 قاڭتارىندا كورشى مەملەكەت حالقىنىڭ سانى 32 ملن 121 مىڭعا جەتكەنى حابارلاندى. وسى مالىمەت بويىنشا جەرگىلىكتى حالىق – وزبەكتەر 1-ورىندى يەلەنگەن. بۇرىن 2-ورىننان مىزعىماي كەلگەن ورىستار 4-ورىنعا تۇسكەن. ال 2-ورىنعا تاجىكتەر، 3-ورىنعا قازاقتار ورنالاسقان. بۇگىنگى تاڭدا وزبەكستانداعى قازاقتار سانى – 1 ملن 093 مىڭ.

وزبەك ەلىنىڭ كەيبىر شاھارلارىندا – تاشكەنتتە، ناۋايىدا، نۇكىستە، جىزاقتا قازاق مادەني ورتالىقتارى جۇمىس ىستەيدى. بۇدان باسقا، ەلدەگى بىرقاتار ءىرى وقۋ ورىندارىندا – تاشكەنت مەملەكەتتىك پەداگوگيكالىق ۋنيۆەرسيتەتىندەگى، ناۋايى پەداگوگيكالىق ينستيتۋتىنداعى، نۇكىس مەملەكەتتىك ۋنيۆەرسيتەتىندەگى قازاق فيلولوگياسى فاكۋلتەتى نەمەسە قازاق ءتىلى جانە ادەبيەتى بولىمىندە قازاق ستۋدەنتتەر قازاق تىلىندە ءبىلىم الۋدا.

الايدا، سوڭعى جىلداردا وزبەكستانداعى ەڭ جاسى ۇلكەن وقۋ ورىندارىنىڭ ءبىرى – نيزامي اتىنداعى تاشكەنت مەملەكەتتىك پەداگوگيكالىق ۋنيۆەرسيتەتىندەگى (تاشمپۋ) جاعدايدى جاقسى دەۋ قيىن. ۋنيۆەرسيتەتتە (بۇرىنعى پەداگوگيكالىق ينستيتۋت) جارتى عاسىردان اسا جۇمىس ىستەپ كەلگەن قازاق فيلولوگياسى فاكۋلتەتى قازىر شەت تىلدەر فاكۋلتەتىنىڭ قازاق ءتىلى جانە ادەبيەتى بولىمىنە اينالدىرىلعان.

2016-2017 وقۋ جىلىندا تاشمپۋ جاڭا مەكەنجايعا كوشۋىنە بايلانىستى شەت تىلدەر فاكۋلتەتى قۇرامىنداعى قازاق ءتىلى جانە ادەبيەتى كابينەتىنە نەبارى ءبىر بولمە بەرىلگەن. اۋماعى 20 شارشى مەتر عانا بولمەدە بارلىق كافەدرا مۇعالىمدەرى سىعىلىسىپ جۇمىس ىستەۋگە ءماجبۇر. ول ول ما، كابينەتكە قازاق اقىندارىنىڭ، جازۋشىلارىنىڭ، عۇلامالارىنىڭ پورترەتتەرىن ءىلىپ قويۋعا رەكتورات قاتاڭ تىيىم سالىپتى. ەڭ وكىنىشتىسى، جاڭا وقۋ جىلىندا قازاق ءتىلى جانە ادەبيەتى بولىمىنە ستۋدەنتتەر قابىلدانعان جوق. بۇگىندە پەدۋنيۆەرسيتەتتىڭ قازاق ءتىلى جانە ادەبيەتى ءبولىمىنىڭ 2-3-4-كۋرستارىندا نەبارى 52 ستۋدەنت وقيدى. ستۋدەنتتەردىڭ ازدىعىنا بايلانىستى كافەدرالاردا شتات قىسقارتىلۋدا. قازىر بولىمدە 3 مۇعالىم قالعان. ءبىر كەزدەردە جاستارعا بارلىق وقۋ پاندەرىنەن قازاق مۇعالىمدەر ساباق بەرگەن بولسا، بۇگىن باسقا كافەدرالاردان كەلگەن مۇعالىمدەر ستۋدەنتتەرگە وزبەك تىلىندە ساباق بەرۋدە.

Abai.kz