كەشە بىرقاتار اقپارات قۇرالدارىندا "ۇلتتىق تەست ورتالىعىنىڭ ديرەكتورى رامازان الىمقۇلوۆ ۇلتتىق بىرىڭعاي تەستىلەۋدەن «قازاق ءتىلى» ءپانىنىڭ جوق ەكەنىن رەسمي ءمالىم ەتكەنى" جونىندە حابار تارادى. بىرقاتار ەلەكتروندى اقپارات قۇرالدارى الگى اقپاراتتى ءوشىرىپ جاتقانعا ۇقسايدى.

سول اقپاراتتارداعى رامازان الىمقۇلوۆتىڭ سوزىنە قاراعاندا، ۇلتتىق بىرىڭعاي تەستىلەۋدىڭ رەسمي بەكىتىلگەن جاڭا فورماتىندا «ماتەماتيكالىق ساۋاتتىلىق»، «وقۋ ساۋاتتىلىعى» جانە «قازاقستان تاريحى» اتتى ءۇش ءپان مىندەتتى ءپان بولىپ قالعان جانە 2 بەيىندىك ءپان قوسىلعان. ونىڭ ايتۋىنشا، «قازاق ءتىلىنىڭ» سۇراقتارى «وقۋ ساۋاتتىلىعى» دەگەن ءپاننىڭ ىشىندە ءىشىنارا كەزدەسەتىن كورىنەدى. ال، انا ءتىلى مەكتەپتەگى قورىتىندى اتتەستاتسيادا قالعان.

«مەن ورىس مەكتەبىندە وقيمىن دەلىك. سوندا، ەندى ماعان ۇلتتىق بىرىڭعاي تەستىلەۋدە قازاق ءتىلىن تاپسىرۋ مىندەتتى ەمەس پە؟» دەگەن ءجۋرناليستىڭ سۇراعىنا ءبىلىم مينيسترلىگىنىڭ وكىلدەرى «مىندەتتى ەمەس» دەپ جاۋاپ بەرگەن.

سونداي-اق،ء بىلىم مينيسترلىگى جوعارى جانە جوعارعى وقۋ ورنىنان كەيىنگى ءبىلىم بەرۋ دەپارتامەنتىنىڭ ديرەكتورى دارحان احمەتزاكيەۆ: «بۇرىن ورىس مەكتەبىندە وقيتىندار قازاق ءتىلىن تاپسىرعانىمەن، ونىڭ بالى وقۋعا تۇسەردە سانالمايتىن. مەن سىزدەرگە ايتايىن، قازاق ءتىلى بۇرىن دا ءفورمالدى تۇردە عانا تاپسىرىلدى. ەندى قازىر مۇلدە الىپ تاستادىق. قازاق ءتىلى مەكتەپ دەڭگەيىندەگى ەمتيحاندا قالدى»، - دەگەن.

«قازىر ورىس مەكتەبىندە قازاق ءتىلى، قازاق مەكتەبىندە ورىس ءتىلى وقىتىلادى. قورىتىندى اتتەستاتسيادا بۇل ەكى ءپان دە قالدى. قورىتىندى اتتەستاتسيادا ورىس تىلىندە وقىعاندار قازاق تىلىنەن ەسسە جازادى. بۇرىن دا بىرىڭعاي ۇلتتىق تەستىلەۋدە قازاق ءتىلىنىڭ بالى سانالمايتىن. ەندى جاڭا فورماتتا قازاق ءتىلى اتتەستات الۋعا تاپسىرىلاتىن بەس ەمتيحاننىڭ ىشىندە بار. ەسسەنى ءۇش ساعات جازادى. ورىس تىلىندە وقىسا - ورىس تىلىندە، قازاق مەكتەبىندە وقىسا - قازاق تىلىندە جازادى»، - دەيدى ءبىلىم جانە عىلىم مينيسترلىگى مەكتەپكە دەيىنگى جانە ورتا ءبىلىم دەپارتامەنتىنىڭ ديرەكتورى جاڭىل جونتاەۆا.

بۇل قازاق ءتىلىن مۇلدەم قاجەتسىز ەتۋدىڭ امالى ەمەس پە؟ ءبىزدىڭ ءبىلىم جانە عىلىم مينيسترلىگى ۇبت-عا بايانداردى قوسىپ، قازاق ءتىلىن قىسقارتىپ جاتۋى نەلىكتەن؟ 

وتكەن اپتالاردا Abai.kz-كە رەسمي سۇحبات بەرەمىن دەپ، ونىڭ ارتىن سيىرقۇيمىشاقتاندىرىپ جىبەرگەن ساعاديەۆتىڭ نە ويى بار؟ 

بۇل جاڭا فورمات 2017 جىلدىڭ 1 قاڭتارىنان ەنگىزىلدى ەكەن.

قالىڭ بۇقارامەن كەلىسپەي، مەملەكەتتىك ءتىلدى ءبىر جاققا ىسىرا سالعان مينيسترلىككە قاشان توقتام بولادى؟

ءشارىپحان قايسار

اباي-اقپارات