ءبىزدىڭ ءبىلىم جانە عىلىم مينيسترلىگى "بۇيرەكتەن سيراق شىعارۋعا" شەبەر-اق! ەندى تۇلەكتەر جوعارعى وقۋ ورنىنا ءتۇسۋ ءۇشىن ەرمەك تۇرسىنوۆتىڭ ءاربىر سۇحباتىن وقۋعا، بايان ەسەنتاەۆا (ماقساتقىزى) مەن نۇرتاس ادامباەۆتىڭ سىني پىكىرلەرىن قالت جىبەرمەي قاداعالاۋعا ءتيىس ەكەن.

قازاقستاننىڭ رەسمي باس گازەتى "ەگەمەن قازاقستان" سوڭعى ۋاقىتتا بۇقاراشىل باسىلىمعا اينالدى. بۇرىن سوڭدى بولماعان تىڭ باستاما جاساپ، تالاپكەرلەرگە ارناپ، ۇلتتىق بىرىڭعاي تەستىلەۋدىڭ سۇراقتارىن جاريالاپ وتىراتىن بولدى. گازەت ىشىندەگى بۇل كىتاپشاداعى سۇراقتارمەن ەندى مىڭداعان تالاپكەر دايىندالاتىن بولادى.

بىراق، بۇل تىڭ باستاما ەكىنشى جاعىنان ءبىلىم جانە عىلىم مينيسترلىگىنىڭ ولقىلىقتارىن دا تايعا تاڭبا باسقانداي كوز الدىمىزعا اكەلە قوياتىن بولدى. مىسالى، "ەگەمەن قازاقستاننىڭ" 1 ناۋرىزىنداعى سانىنداعى (سۋرەتتەگى) سۇراققا قاراڭىزشى.    

قازاقستاننىڭ بۇكىل ءباسپاسوزىن جاۋلاپ الىپ، كۇنى-ءتۇنى ىشكەن-جەگەنىن جىر قىلاتىن "جۇلدىزدارىمىز" ەندى عىلىمي اينالىمعا اۋىز سالا باستاپتى. 

ەرمەك تۇرسىنوۆ - رەجيسسەر. بىراق، ونىڭ تۋىندىلارى ۇبت-دا سۇراق بولاتىنداي دەڭگەيگە جەتكەن جوق دەپ ويلايمىز. ال، بايان ماقساتقىزى مەن نۇرتاس ادامباەۆقا قاتىستى جاق اشپاۋدى ءجون سانايمىز. ءبىزدىڭ بالالار، مەكتەپ وقۋشىلارى،  ولاردىڭ تۋىندىلارىن عىلىم دەپ تانيتىن بولسا، وندا تولىق رۋحاني داعادىرس پەن  ستاگناتسياعا جەكتەن ەكەنبىز!

ۇبت-دا ءدال وسىنداي تۇسىنىكسىز ءھام كۇلكىلى سۇراقتىڭ ءجۇرۋى ءبىلىم مينيسترلىگىنىڭ "بىلىمسىزدىگىن" كورسەتە تۇسكەندەي. ولار ەندى ۇبت سۇراقتارىن گازەتتەردەگى سۇحباتتار نەگىزىندە دايىنداۋعا كىرىسكەن سەكىلدى. 

مۇنداي مازاقى ىستەرگە قاشانعى شىداۋعا بولادى؟ ايتىڭىزشى، ساعاديەۆ مىرزا!

ءشارىپحان قايسار

Abai.kz