قاسيەتتى رامازان ايى قۇتتى بولسىن!
ەرجان قاجى مالعاجىۇلى،
قازاقستان مۇسىلماندارى ءدىني
باسقارماسىنىڭ توراعاسى، باس ءمۇفتي
اسا قامقور، ەرەكشە مەيىرىمدى اللانىڭ اتىمەن باستايمىن!
قۇرمەتتى مۇسىلمان باۋىرلار، وتانداستار!
بارشامىزدى قاسيەتتى رامازان ايىنا امان-ەسەن جەتكىزگەن اللا تاعالاعا سانسىز شۇكىرلەر بولسىن. سىزدەردى مۇباراك رامازان ايىنىڭ كەلۋىمەن قۇتتىقتايمىن!
رامازان – ون ەكى ايدىڭ سۇلتانى، بەرەكەلى دە كەشىرىمى مول اي. كۇندەلىكتى تىرشىلىك قامىمەن جۇرەتىن پەندەنىڭ جۇرەگىنە بۇل ايدا يمان نۇرى قۇيىلادى. ويتكەنى، ورازا ادامدى تاقۋالىققا تاربيەلەيدى. سابىرلىق، قايىرىمدىلىق، مەيىرىمدىلىك، باۋىرمالدىق سەكىلدى ادامدىق اسىل قاسيەتتەر ارتىپ، يمان كۇشەيەدى. ادامنىڭ يمانى كۇشەيگەن سايىن ارسىزدىقتان ارىلا باستايدى. رامازان – اللانىڭ مەيىرىمى توگىلىپ، جۇماقتىڭ ەسىگى ايقارا اشىلاتىن، يماندى كۇشەيتۋگە مۇمكىندىك بەرىلگەن بەرەكەلى اي. بۇل – جاراتۋشى يەمىزدىڭ ۇلى سىيى ءارى نىعمەتى.
ساۋاپتار ەسەلەنىپ جازىلاتىن ايدا جاسالعان قايىرلى ءىستىڭ قايتارىمى ادام بالاسى ءۇشىن قۇپيا-سىر. ءتىپتى، اۋىز بەكىتۋشىگە بەرىلەتىن سىي مەن ساۋاپ، قۇرمەت پەن ماراپات پايعامبارلار مەن پەرىشتەلەرگە دە بەلگىسىز.
قۇدسي حاديستە اللا تاعالا: «ورازا – تەك مەن ءۇشىن. ونىڭ سىيىن (ساۋابىن) ءوزىم عانا بەرەمىن...», – دەپ، ورازانىڭ قادىرى مەن قاسيەتىن، ءمانى مەن ماڭىزىن بايانداعان.
قادىرلى اعايىن!
شاراپاتى مەن شاپاعاتى مول ايدا كۇنالى ىستەردەن باس تارتىپ، ساۋاپ جيناۋعا، ىشكى دۇنيەمىزدى تازارتۋعا، جاراتۋشىنىڭ رازىلىعىنا بولەنۋگە اسىعايىق!
مەيىرىمدىلىك، كەشىرىمدىلىك، يگىلىك، يماندىلىق ءھام ادامگەرشىلىك قۇندىلىقتار سالتانات قۇرعان قوعامنىڭ قاشان دا بولاشاعى باياندى، كەلەشەگى كەمەل.
رامازاننىڭ قادىرىن جاقسى تۇسىنگەن ساحابالار ورازاعا التى اي قالعان ساتتەن باستاپ: «راببىمىز، ءبىزدى رامازان ايىنا امان-ەسەن جەتكىزە گور!» – دەپ دۇعا ەتكەن. پەندەنىڭ وسى ايدا ۇستاعان ورازاسى، قوسىمشا قۇلشىلىقتارى، وزگەلەرگە جاساعان قايىرىمدىلىعى، بارلىق ساۋاپتى امالدارى ەسەلەنىپ جازىلادى.
ورازا – كۇندىز تەك ءىشىپ-جەۋدەن ءوزىن شەكتەۋ دەگەن ءسوز ەمەس. ورازا – رۋحتىڭ ازىعى، ءتاننىڭ شيپاسى. رامازان جان مەن ءتاندى رۋحاني تازارتاتىن، مۇسىلمان ءۇشىن ۇلكەن سابىر مەكتەبى. اۋزى بەرىك جاندار ادەپ بىلمەس پەندەلەردىڭ وزىنە جاساعان كەيبىر وعاش ءىس-ارەكەتتەرىن كورىپ، تۇرپايى سوزدەرىن ەستىسە دە: «مەن ورازامىن»، – دەگەن ءبىر اۋىز سوزبەن ناپسىسىنە توقتاۋ سالىپ، سابىر ساقتايدى. ال سابىر يەسىنە بەرىلەتىن سىي – ءجاننات.
دەنساۋلىعىنا بايلانىستى نەمەسە كارىلىك جەتىپ ورازا ۇستاۋعا شاماسى جەتپەگەن ادامدار اۋىز بەكىتكەن كىسىلەرگە اۋىزاشار بەرسە، ول دا – ۇلكەن ساۋاپ. پايعامبارىمىز مۇحاممەد (اللانىڭ وعان يگىلىگى مەن سالەمى بولسىن): «اللا تاعالا ەڭ بولماسا ءبىر ءتۇيىر قۇرما، ءتىپتى ءبىر ۇرتتام سۋمەن بولسا دا قامقورلىق جاساعانعا ساۋاپ جازادى…» – دەگەن.
بيىل ماۋسىم-شىلدە ايلارىنا تۇسپا-تۇس كەلگەن رامازاندا اۋىز بەكىتۋگە كۇننىڭ ىستىعى كەدەرگى كەلتىرمەيدى دەپ سەنەمىز. سەبەبى، ورازانىڭ رۋحاني ءدامىن تاتقان جان اللانىڭ تەڭدەسسىز سىيىنان شەت قالعىسى كەلمەيتىنى حاق.
قادىرلى قاۋىم!
راقىم ايى – رامازان قۇتتى بولسىن! قاسيەتتى ايدا ۇستاعان ورازامىز، جاساعان دۇعا-تىلەكتەرىمىز، قۇلشىلىق-عيباداتتارىمىز، ءاربىر قايىرلى امالدارىمىز قابىل بولعاي! اللا تاعالا وتباسىمىزعا اماندىق، جۇمىسىمىزعا بەرەكە-بىرلىك ءناسىپ ەتكەي! تاۋەلسىزدىگىمىز تۇعىرلى، مەملەكەتىمىزدىڭ مەرەيى ارقاشان ۇستەم بولعاي! ءاۋمين!
