استانادا جىلسايىنعى حالىقارالىق «دارابوز - 2015» بايگەسىنىڭ قورىتىندىسى بويىنشا ۇزدىك بالالار جازۋشىلارىنىڭ ەسىمدەرى بەلگىلى بولدى. ۇلتتىق اكادەميالىق كىتاپحانادا بولعان ءىس شاراعا قر مادەنيەت جانە سپورت ءمينيسترى ارىستانبەك مۇحامەديۇلى باستاپ، ءماجىلىس دەپۋتاتتارى، قر مادەنيەت جانە قوعام قايراتكەرلەرى، قازاقستان جازۋشىلار وداعىنىڭ مۇشەلەرى قاتىستى. مينيستر ءوز كەزەگىندە قر ۇلتتىق اكادەميالىق كىتاپحاناسىنىڭ فويەسىندە  بالالار ادەبيەتىنىڭ كىتاپ كورمەسىن تاماشالادى.

بالالار ادەبيەتىنە ارنالعان ح مەرەيتويلىق بايگە 20-ساۋىردەن باستاپ 20-مامىرعا دەيىن جالعاسىپ، بايگە قورىنا 500-گە تارتا شىعارما كەلىپ تۇسكەن بولاتىن. ادەبي بايگەنىڭ جەڭىمپازى اتانعان جەتى لاۋرەاتتىڭ «دارابوزى» 1 000 000 تەڭگە كولەمىندەگى اقشالاي جۇلدەگە يە بولدى. ادەبي شىعارمالاردى باعالاۋ بارىسىندا ولاردىڭ ادەبي-كوركەمدىك جاعى، باياندالۋ رەتى، اۆتوردىڭ ءتىل بايلىعى جانە باسقا دا ماسەلەلەر ەسكەرىلدى.

قۋانىشى مەن قاسىرەتى قاتار جۇرەتىن ءومىردىڭ كىشكەنتاي كورىنىستەرى ارقىلى تاربيەلىلىك ماعىناسى زور ۇلكەن ماسەلەلەردى كوتەرە بىلگەن پەرنەباي دۇيسەنبين «ەسەن-ساۋ ءجۇرىڭىزشى، اسىل اتا!» شىعارماسىندا قازاقى ءداستۇر، ۇلكەنگە قۇرمەت، قايىرىمدىلىق، ادامگەرشىلىك سىندى دۇنيەلەردى  اينالىپ وتپەگەن. سۇراپىل سوعىستا قايرالعان اقساقالدىڭ  قاتاڭ دا تۇيىق  مىنەزىنىڭ استارىندا جاسىرىنىپ  جاتقان جىلىلىقتى ويدا-جوقتا بايقاپ، اتانىڭ ءار ءسوزىن  وي ەلەگىنەن وتكىزىپ، بالا جۇرەگىمەن سەزىنگەن نەمەرەنىڭ جان تەبىرەنىستەرى.  كوركەمدىك جاعىنان دا كىشكەنتاي وقىرمانىن ەستەتيكالىق اسەرگە بولەي الاتىن شىعارما  ادىلقازىلار شەشىمىمەن باس جۇلدەگە لايىق دەپ تانىلدى.

اۆتور ءوز سوزىندە وسى شىعارما ارقىلى جاسوسپىرىمدەردىڭ ۇلكەنگە قۇرمەتىن، اتا داستۇرگە ادالدىعىن ناسيحاتتاعىسى كەلگەنىن ايتادى.

باس جۇلدە يەگەرىنە ارنايى «دارابوز» سىيلىعى مەن ديپلومدى، 1 ملن. تەڭگە سەرتيفيكاتىن "Zhersu يوك" جشس باقىلاۋ كەڭەسىنىڭ توراعاسى باۋرجان وسپانوۆتىڭ ءوزى تابىستادى.    

- قازاق دەگەن ۇلتتىڭ ماڭدايىنا بىتكەن ءبىر قۇندىلىعى بولسا - ول اتا-ءداستۇرى مەن اتا-تاريحى. سول تاريحتان تاعىلىم الىپ، اتا-سالتىن قاستەرلەپ وسكەن ەل قۋاتتى، ماڭگىلىك ەلگە اينالارى ءسوزسىز. وسى قۇندىلىقتارىمىزدى وسكەلەڭ ۇرپاققا كىتاپ ارقىلى امانات ەتۋ - ءوزىمنىڭ مىندەتىم دەپ سانايمىن. وسى جوبا ارقاسىندا ازدى-كوپتى اقىن جازۋشىلاردىڭ تۇساۋى كەسىلىپ، قولداۋلار الدى. بىرنەشە مىڭ شىعارمالار دۇنيەگە كەلىپ، بالالاردىڭ جان ازىعىنا اينالارلىق تۇشىمدى دۇنيەلەر جارىق كوردى. «كاۋسار بۇلاق»، «چيستىي رودنيك» كىتاپتارى بالاقايلاردىڭ كوزايىمىنا اينالدى دەپ ويلايمىن. بالاقايلار ادەبيەتىنىڭ وركەندەۋىنە سەپتىگىمىزدى تيگىزىپ، وسى يگى ىسكە سەپتىگىمىزدى تيگىزۋ مەن ءۇشىن ۇلكەن مارتەبە،  - دەدى سالتاناتتى شارادا ءسوز العان وسپانوۆ باۋىرجان مىرزا.

سونىمەن قاتار، بيىلعى جىلى «بالالار ادەبيەتىنە قوسقان ۇلەسى ءۇشىن» اتتى ارنايى سىيلىق تاعايىندالدى.  جوبا تاريحىندا العاش رەت ۇسىنىلعان سىيلىققا مۇزافار الىمباەۆ لايىق دەپ تانىلىپ، قر مادەنيەت ءمينيسترى ارىستانبەك مۇحامەديۇلى سىيلىقتى كورنەكتى جازۋشىنىڭ اتىنان كەلگەن نەمەرەسىنە ءوز قولىمەن تابىستادى.

سالتاناتتى شارادا لاۋرەاتتاردىڭ ەسىمدەرىمەن قاتار،  «اتامۇرا»، ء«داۋىر»  باسپالارىنىڭ وكىلدەرى، بالالار كىتاپشاسىن شىعارۋ ءۇشىن كەلىسىم شارتقا وتىراتىن اۆتورلاردى جاريالادى. اتالعان باسپا ۇجىمدارىنىڭ پىكىرى بويىنشا ۇزدىك دەپ تانىلعان شىعارمالار جارىق كورىپ، بالالارعا بازارلىق بولماق. ۇكىلى شىعارمالاردىڭ ءبىرى بولىپ بەكبولات ادەتوۆتىڭ ء«بىر تامشى جاس» شىعارماسى مەن  قايىربەك شاعىردىڭ «سيقىرلى كىتاپ نەمەس تاريحقا ساياحات» پوەماسى تانىلدى.

«دارابوز-2015» سىيلىعىن تابىستاۋ سالتاناتى بارىسىندا كەش قوناقتارىنىڭ نازارىنا بالالار شىعارماشىلىعىنان كونتسەرتتىك باعدارلاما مەن ءداستۇرلى فۋرشەت ۇسىنىلدى. 

ەستەرىڭىزگە سالا كەتەيىك، بالالار جازۋشىلارىنىڭ اراسىندا وتەتىن جىلسايىنعى حالىقارالىق «دارابوز 2015» بايگەسى «ZHERSU» ينۆەستيتسيالىق وندىرىستىك كورپوراتسياسىنىڭ دەمەۋشىلىگىمەن، قازاقستان جازۋشىلار وداعىنىڭ قولداۋىمەن جانە «باۋىرجان» قايىرىمدىلىق قورىنىڭ ۇيىمداستىرۋىمەن

 وسىمەن ونىنشى مارتە وتكىزىلىپ وتىر. بيىلعى جىلى شىعارمالار قازاق جانە ورىس تىلدەرىندە قابىلداندى. جالپى جۇلدە قورى  3 000 000 تەڭگەنى قۇرادى.

بايگە لاۋرەاتتارى:

پەرنەباي دۇيسەنبين  «ەسەن-ساۋ ءجۇرىڭىزشى، اسىل اتا!» شىعارماسى ءۇشىن گران-ءپريدى جەڭىپ الدى.

مۇزافار الىمباەۆقا – «بالالار ادەبيەتىن دامىتۋعا قوسقان ۇلەسى ءۇشىن» سىيلىعى بەرىلدى.

سونىمەن:

1-ورىن - قايىربەك شاعىر سەمەيعازىۇلى «سيقىرلى كىتاپ» پوەماسى ءۇشىن;

1-ورىن - دجۋماگەلدينوۆا داريا  «مالەنكي مۋجچينا» شىعارماسى ءۇشىن;

2-ورىن - مەيىرجان جىلقىباي  «ساياق» شىعارماسى ءۇشىن;

2-ورىن -  كلەپيكوۆا ەلەنا «سكازكا و پويۋششەم بارحانە» شىعارماسى ءۇشىن;

3-ورىن - ادىلبەك ىبىرايىمۇلى «ماڭگىلىك فورمۋلاسى» شىعارماسى ءۇشىن;

3-مەستو – نازارباەۆا گۋلسىم  «يستوري يز دەتستۆا» شىعارماسى ءۇشىن جۇلدەلەردى ءوزارا ءبولىستى.

Abai.kz