دونەتسك حالىق رەسپۋليكاسى جانە لۋگانسك حالىق رەسپۋبليكاسى بولىپ  ءۇي ىشىنەن ءۇي تىككەن جىكىشىلدەر قول كوتەرىپ ۋكراينا مەملەكەتىنىڭ جەرى مەن حالقىنىڭ تۇتاستىعىن مويىنداي باستادى. الايدا، زورلىقپەن جاسالعان  دحر، لحر  بيلىگى ەلدىڭ شىعىس ايماعىن كيەۆكە تۇتاس بەرە سالۋدى ار كورىپ، وزدەرىنىڭ تالاپتارىن كولدەنەڭ تارتىپ وتىر. سونداعىسى سول باياعى – ورىس ءتىلى. دحر مەن لحر-دا ورىس ءتىلى بيلىك ءتىلى رەتىندە ساقتالۋى كەرەك دەيدى باتىس الەمى سەپاراتيستەر دەپ تانىعان جىكىشىلدەر توبى.  تابيعي رەسۋرستاردى پايدالانۋ قۇقىعى دا دحر مەن لحر بيلىگىندەگى حالىقتىڭ ۇلەسىندە قالۋى ءتيىس دەيدى ولار. سونداي-اق،  الگى «حالىقتىق رەسپۋبليكالاردىڭ» قازىرگى باسشىلارى  يگور پلوتينتسكي مەن الەكساندر زاحارچەنكو قىزمەتتەرىن جالعاستىرا بەرۋى قاجەت دەگەندى ايتادى.  ۋكراينا كونستيتۋتسياسىنا وزگەرىستەر ەنگىزۋ جونىندە كەلىسسوزگە اتتاندىرعان ەلشىلەرى ارقىلى جاڭاعى ەكەۋى دحر مەن لحر-ءدىڭ ۋكرايناعا قايتا قوسىلۋى ءتيىس اۋداندارىنا ەرەكشە مارتەبە بەرىلۋى قاجەت دەسىپتى. ول اۋدانداردا «حالىقتىق ميليتسيا» قۇرىلۋى ءتيىس ەكەن.

وسى توڭىرەكتەگى كەلىسسوزدەر رەسمي كيەۆ پەن جىكشىلدەر اراسىندا وتكەن اقپان ايىنان بەرى باستالعان بولاتىن. جىكشىلدەردىڭ ۇسىنىسىن جوعارى رادا قولداعانىمەن پرەزيدەنت پەتر پوروشەنكو بۇنداي مامىلەنى ادا-كۇدە مويىندامايتىندىعىن بىلدىرگەن بولاتىن. پەتر پوروشەنكو دونەتسك وبلىسى مەن لۋگانسك وبلىسىندا ۋكراينا زاڭىنا باعىنعان سايلاۋلار وتكەن جاعدايدا عانا كەيبىر اۋداندارعا ەرەكشە مارتەبە بەرىلەدى دەپ وتىر.

سونىمەن،  ۋكراينانىڭ 8 وبلىسىن ءبولىپ الىپ، «نوۆوروسسيا» جاساۋ، ۋكراينانى بولشەكتەۋ، ايدالادا قالدىرۋ دەيتىن كرەمل قۇرعان جوسپار ۇشپاعىنا جەتپەي اياقتالىپ قالعانعا ۇقسايدى. سوندا، 6 جارىم مىڭ ادامنىڭ قانى نە ءۇشىن توگىلدى؟ نە ءۇشىن ولار جەر جاستاندى؟ ەل نەگە بوسىپ، اۋىپ كەتتى؟ جازىقسىز جاندار نە ءۇشىن زار كەشتى؟ بۇل سۇراقتارعا  قۇدايى كورشىمىزدىڭ تاراپىنان ەندى جاۋاپ تابۋ دا قيىن شىعار؟

ايتپاقشى، بۇل وتكەندە جازعانىمىزداي ۇلكەن جەتتىلىك ءسامميتىنىڭ العاشقى جەمىسى بولۋى ابدەن مۇمكىن. سانكتسيالاردىڭ سالقىنى تيگەن كسرو دا كەزىندە مۇرتتاي ۇشقان بولاتىن.

Abai.kz