سونىمەن بيىلعى ۇبت ناۋقانى دا اياقتالىپ، قورتىندىسى جاريالانىپ جاتىر. ورتاشا بالل 79,4-ءتى قۇرادى دەپ حابارلايدى ءبىلىم جانە عىلىم مينيسترلىگى. الدىمەن دەرەكتەرگە كوز جۇگىرتىپ وتەيىك: 

«2-8 ماۋسىم ارالىعىنداعى ۇبت قورىتىندىسى بويىنشا، 2015 جىلعى ۇبت تاپسىرۋدىڭ ورتاشا بالى 79,4-ءتى قۇرادى، بۇل 2014 جىلعىدان (76,9) 2,5%-عا جوعارى. سونداي-اق، وسى جىلى 100 بالدان جوعارى ۇپاي العان وقۋشىلار سانى دا 2,4%-عا ۇلعايعان. ولاردىڭ سانى – 14420 (17,4 %). 2014 جىلى 100 بالل جيعانداردىڭ قاراسى  13137 (15%)» بولعان ەدى. 

ۇبت-دا 125 بالدان جوعارى بالدى 5 تۇلەك الدى. ولار: تارازداعى №45 قازاق كلاسسيكالىق گيمنازياسىنىڭ، ەلوردالىق №59 مەكتەپ-ليتسەيىنىڭ، بقو تەرەكتى اۋدانى ء«ۇمىت» لينگۆيستيكالىق گيمنازياسىنىڭ، وقو تۇلكىباس اۋدانىنداعى ءۇش تىلدە وقىتاتىن دارىندى بالالارعا ارنالعان مامانداندىرىلعان مەكتەپ-ينتەرناتىنىڭ جانە الماتىلىق №90 ليتسەيدىڭ مەكتەپ بىتىرۋشىلەرى.

2014 جىلى جوعارى 125 بالدى ءتورت وقۋشى جيناعان بولاتىن.

جالپى بيىلعى تەستىلەۋگە 87 782 وقۋشى قاتىسىپتى. بۇل جالپى تۇلەكتەر سانىنىڭ 71%-ىن قۇرايدى; ولاردىڭ ىشىندە مەملەكەتتىك تىلدە ءدارىس پەن تاربيە بەرەتىن مەكتەپتى بىتىرگەن تۇلەكتەر سانى – 62 384, ورىسشا مەكتەپتى تاۋىسقاندار – 25 398.

اعىمداعى جىلدان باستاپ قازاقستاندىق مەكتەپ بىتىرۋشىلەردىڭ اتتەستاتتارىنا ۇبت بالى مەن وقۋشىنىڭ جىلدىق باعاسىنىڭ اراسىنداعى ورتاشا باعا ەنەدى.

كورىپ وتىرعاندارىڭىزداي، قازاق مەكتەبىن بىتىرگەن تۇلەكتەر سانى ورىس مەكتەپتەرىنەن ەكى ەسە ارتىق. جانە ءبىر ايتا كەتەرلىگى 125 بالدى تەك قازاق تىلىندە ءبىلىم بەرەتىن مەكتەپتەردە وقىعان شاكىرتتەر يەلەنگەن كورىنەدى. ەندى، وسىدان كەيىن مىنا كەرباققان جۇرت "قازاق مەكتەپتەرى ناشار ءبىلىم بەرەدى" دەپ قالاي ايتار ەكەن؟ مەيلى، ايتا بەرسىن، كىم نە دەسە دە، قازاق مەكتەپتەرىن بىتىرگەن تۇلەكتەر ءوز قاتارىنان قارىشتاپ وزىپ كەلەدى. الايدا، جىل سايىن جوعارى وقۋ ورىندارىنا بولىنەتىن كۆوتاعا قاراساڭىز، ءبىز جوعارىدا كەلتىرگەن مالىمەتتەرگە ساراپتاما جاساپ، شەشىم قابىلدانبايتىنىن بىلە تۇسەر ەدىڭىز... بيىل قالاي بولار ەكەن؟ كورەمىز.

Abai.kz