بالالاردى قورعاۋ كۇنىنىڭ قارساڭىندا شىمكەنت قالاسىندا 1979 جىلى اسانباي اسقاروۆتىڭ ۇيىتقى بولۋىمەن سالىنعان بالالار تەمىرجولى قايتا جاڭعىرتۋدان ءوتىپ، ەل يگىلىگىنە پايدالانۋعا بەرىلگەن بولاتىن. 

بۇعان دەيىنگى قانشاما باسشىلاردىڭ ءتىسى باتپاعان بالالار تەمىرجولىنىڭ قالىپقا كەلتىرۋ جۇمىستارىن "تۇرعىن-ءۇي" جشس اتقارعان. ۇزىن-ىرعاسى 26 كۇندە لوكوموتيۆتى قايتا شويىن جولعا قوندىرعان سەرىكتەستىك باسشىسى مۇحتار مۇحامبەتجان اعىنان جارىلىپ رەسپۋبليكالىق باق-قا سۇحباتتار بەرىپتى. ءجون-اق. 
وبلىس باسشىسى اسقار مىرزاحمەتوۆ باستاپ، قالا باسشىسى دارحان ساتىبالدى قوشتاپ، بالالار تەمىرجولىنىڭ جوندەۋ جۇمىستارى اتالمىش سەرىكتەستىككە تاپسىرىلىپتى. ءسىرا، باسشىلىق تا اناۋ-مىناۋعا سەنىم بىلدىرمەسى انىق. تاۋلىگىنە 16-18 ساعاتتان جۇمىس جاسادىق دەپ ء"سۇيىنشى" سۇراعان مۇحتار مۇحامبەتجان دا، سەرىكتەستىك قىزمەتكەرلەرى دە الدارىنا ۇلكەن ماقسات قويىپ، سول ماقساتقا جەتۋ جولىندا تاباندىلىقپەن ەڭبەك ەتكەندىگى كورىنىپ تۇر. ماقتانۋعا تۇرارلىق ءىس. 
سونىمەن...
سونىمەن، حالىقتىڭ قۋانىشىندا شەك جوق. ۇل-قىزىن بالالار تەمىرجولىنا قاراي سۇيرەگەن اتا-انالاردا قيساپ بولمادى. شامامەن، 300-گە جاقىن اتا-انا پەرروندا جاعا جىرتىسۋعا دەيىن باردى. ءوز بالالارىنىڭ قىزىق كورگەنىن، جاقسى اسەر العانىن قالاعانى سونشالىق، سەرىكتەستىك باسشىسىنىڭ جاعاسىنا جارماسقاندارى دا بولدى. دەگەنمەن، مۇحتاردىڭ يدەولوگيامەن اينالىسىپ جۇرگەنىنە شيرەك عاسىرعا جۋىقتاعانى تاعى بار. ماسەلە ايقاي-شۋسىز شەشىمىن تاپتى. 
ورتالىق ستاديوننان دەندروساياباق اراسىندا اتوي سالاتىن تەمىرجول لوكوموتيۆىنىڭ جالپى جول ءجۇرۋ اۋماعى 8 شاقىرىمدى قۇرايدى. مەجەگە جەتكەن بويدا بولاشاق پاتريوتتارعا دەندروساياباق اۋماعىندا سەرۋەندەۋگە، ءىشىن ارالاپ قىزىقتاۋعا مۇمكىندىك جاسالعان. 8 شاقىرىمدىق جولدى كۇنىنە 3 رەت باعىندىراتىن تەمىرجول لوكوموتيۆىنىڭ اتاعى دارداي بولعانىمەن، سۇيرەگەنى 2-اق ۆاگون. ءسىرا، بابالارىمىزدىڭ "ايداعانى بەس ەشكى، ىسقىرىعى جەر جارادى",- دەگەنى قۇددى ءبىر وسى بالالار تەمىرجولى لوكوموتيۆىنە ارنالعانداي-اق. ە، مەيلى...
شويىن جول اشىلماي تۇرىپ سەرىكتەستىك قىزمەتكەرلەرى جولدىڭ احۋالىن بايقاۋ ماقساتىندا بىرنەشە رەت لوكوموتيۆپەن ءارلى-بەرلى "ىسقىرىپ" وتكەن بولاتىن. شىمكەنتتەگى حالىقتىڭ تىعىز ورنالاسقاندىعىن وزدەرىڭىز دە جاقسى بىلەسىزدەر. 8 شاقىرىمدىق شويىن جولدىڭ ماڭايىندا قانشاما ازاماتتار ءتۇتىن تۇتەتىپ وتىرعاندىعى تاعى بار. ولار "ىسقىرىقتى" ەستىگەن، جۇيتكىگەن پويىزدى كورگەن، سوسىن 1-ماۋسىم بالالاردى قورعاۋ كۇنى بىلايعىشا ايتقاندا "بۇلاقتىڭ باسىنا" بالالارىن ەرتە ەلگەن... بىراق، 2 ۆاگونعا ارى كەتكەندە 70-80 بالا عانا سيادى. ال، ويلانىڭىزدار...
بيلىك تاراپىنان بۇل ماسەلەگە ازىرشە ەشقانداي نازار اۋدارۋدىڭ بولماي تۇرعانى دا بايقالادى. بالالارىمىزدىڭ، ۇرپاعىمىزدىڭ جايىن ويلاپ، قالالىق اكىمشىلىك تەمىرجولدى اشقان ەكەن، ەندەشە: «قايىر قىلساڭ ءبۇتىن قىل» دەيمىز ءبىز.
مۇمكىن، مۇحتار مۇحامبەتجان ءالى كۇنگە ۆاگوننىڭ جەتىسپەۋشىلىگىن العا تارتىپ، باسشىلىققا ارنايى ات باسىن بۇرماعان دا شىعار. ايتكەنمەن دە، اكىم-قارالار ءوز مىندەتتەرىن ورىنداپ، «ورنىن باسا المايتىن» ورىنباسار-سىماقتارىن ماڭىزدى جۇمىستارعا «ايتاقتاپ» وتىرعاندارىنا قارنىم اشادى. بەلگىلى جاعداي: بالالار تەمىرجولىنىڭ اشىلۋ سالتانتىنا كەلگەن قالا اكىمىنىڭ ورىنباسارى: «بالالار تەمىرجولىنىڭ جاعدايى – 5, ءتىپتى -- 6 »،- دەپ ايتقانىنا ەش كۇماندانبايمىن. ءومىر عوي...
پەررون ماڭىندا بالالارىنىڭ قۋانىشقا بولەنگەنىن ساعاتتاپ كۇتكەن اتا-انالاردى اياعاندىقتان ايتىپ وتىرمىن، بۇل جايلاردى. ايتپەسە، قالا نەمەسە وبلىس اكىمى مەنىڭ قايءبىر ەكى تۋىپ ءبىر قالعانىم دەيسىزدەر؟.. 
الداعى ۋاقىتتاردا، اگاراكي، مەن ايتقان سوزدەر باسشىلىقتىڭ قۇلاعىنا جەتە قالسا، ماسەلە وڭ شەشىمىن تابار دەگەن نيەتتەمىن… وقىعاندارىڭىزعا راحمەت!

تالشىن ەستەميروۆا،
شىمكەنت قالاسىنىڭ تۇرعىنى.

Abai.kz