قازاقستان رەسپۋبليكاسىنىڭ

ءبىلىم جانە عىلىم ءمينيسترى

ا.ب.ءسارىنجىپوۆ مىرزاعا

حات

قادىرلى اسلان باكەنۇلى!

مەنىڭ جۇمىس ورنىما الماتى وبلىسى، قاراساي اۋدانىنداعى جاڭاتۇرمىس ورتا مەكتەبىنىڭ مۇعالىمى ايمان ساعيدۋللاەۆا ىزدەپ كەلىپ جولىعىپ، اكىمشىلىك قۇرىلىم قىزمەتكەرلەرىنە ءتيىستى جۇمىستاردىڭ بارلىعى دەرلىك مۇعالىمدەرگە ارتىلعانى، ەلىمىزدە سايلاۋ ناۋقانى بولا قالسا، ۇگىت-ناسيحات جۇمىستارىنا، ءۇي-ءۇيدى ارالاپ، مەكەن-جاي بويىنشا ادام تۇگەندەۋگە، مەكتەپكە بالا سانىن انىقتاۋعا، اسكەرگە  شاقىرتۋعا، قانشا مالىڭ، نەشە ءۇيىڭ، كولىگىڭنىڭ ماركاسى مەن ءنومىرى قانداي ەكەنىن انىقتاۋعا جاپپاي مۇعالىمدەر جەگىلەتىنى جانە تولىپ جاتقان انشىلەردىڭ كونتسەرتتەرىنىڭ بيلەتىن وتكىزۋ مۇعالىمدەرگە جۇكتەلەتىنى،  بارلىق قارسىلىق «جۇمىستان كەت» دەگەن سوزبەن باسىلاتىنى جايلى اشىنا ايتتى.     

سونىمەن قاتار، سول ۋاقىتتا الماتى وبلىسى قاراساي اۋدانى ءبىلىم بولىمىنە قاراستى بۇكىل اۋدان مەكتەپتەرى مۇعالىمدەردى جول بويىنداعى قوقىستاردى تازالاپ، اعاشتاردى كەسىپ، اكتەگەن سەنبىلىككە  ناۋرىز ايىنىڭ 26-28 ارالىعىندا جانە ءساۋىر ايىنىڭ 4-نەن 13-نە دەيىن شىعارىلعان.  

ءوزىم باسقاراتىن «جالىن» جۋرنالىنىڭ ءجۋرناليستى جاننا يمانقۇلعا ايمان ساعيدۋللاەۆانىڭ  باسىنداعى ءحالدى  انىقتاپ، ماقالا جازىپ، باسپاعا دايىنداۋعا تاپسىرما بەردىم. «مۇعالىمدەردىڭ مۇشكىل ءحالى. ولاردى بيلىكتىڭ قولبالاسى بولۋدان قالاي قۇتقارامىز؟» «جالىن» جۋرنالىنىڭ 4 سانىندا جانە «قازاقستان زامان» گازەتىندە جاريالاندى. ال، «جاس الاش» گازەتىنىڭ №44 سانىندا «مۇعالىم – مەملەكەتتىڭ قۇلى ەمەس» دەگەن تاقىرىپتا ايمان ساعيدۋلاەۆامەن جاساعان سۇحبات جاريالاعان. «دات» گازەتىندە ءابدىراشيت باكىرۇلىنىڭ «ايمان ساعيدۋللاەۆا فەنومەنى» دەگەن ماقالادا ا.ساعيدۋللاەۆا كوتەرگەن ماسەلەنى ءبىلىم جانە عىلىم مينيسترلىگى ءبىلىپ جۇرەتىن ماسەلە ەكەنىن جەتكىزگەن. «اشىق الاڭ»، ء«تورتىنشى بيلىك» «مۇعالىمدەردىڭ مۇشكىل ءحالى» ماقالاسىن جاريالادى. abai.kz, ult.kz, qamshy.kz سايتتارىن دا جاريالاعان بۇل ماقالاعا قاتىستى پىكىرلەردى وقىماي كەتپەڭىز. 

ەڭ العاش ۇلكەن دەڭگەيدە كوتەرىلگەن ۇستازدار قاۋىمىنىڭ قۇقىعى تاپتالۋىنا قارسى بۇل باتىل باستاما قازىر قوعامدا  قوزعاۋ تۋعىزدى. مۇنداي جاعدايلاردى ءبىرىنشى رەت ەستىپ جۇرگەن جوقپىز. نەمەسە بۇل تەك ايمان ساعيدۋلاەۆانىڭ باسىنداعى جاعداي ەمەس.   ءبىز سىزگە «مۇعالىمدەردىڭ مۇشكىل ءحالى» دەگەن ماقالانى ءتۇسىنىپ قايتا وقىپ شىعۋعا كەڭەس بەرەمىز. وندا كوتەرىلگەن ماسەلەلەر تەك ءبىر مەكتەپ نە ءبىر اۋدانداعى جاعداي ەمەس. سەبەبى بۇل ماقالانى قولداپ، پىكىر بىلدىرگەن ادامداردا ەسەپ جوق. وزەكتىلىگى بولماسا،  اقپارات قۇرالدارى ءبىر-بىرىنەن كوشىرىپ باسپاس ەدى.

بەكىتىلگەن ساباق كەستەسىنە قاراماي، مۇعالىمدەردىڭ  تىكەلەي قۇزىرەتىنە جاتپايتىن جۇمىستى جاساتىپ، وقۋشىلارعا باعدارلاماعا ساي ءبىلىم بەرىلمەيتىنى تاعى بار. مۇعالىم بىتپەيتىن سەنبىلىكپەن سارساڭدا جۇرگەندە ولاردىڭ ساباعىن وتكىزۋگە جوعارعى سىنىپ وقۋشىلارى مىندەتتەلەدى ەكەن. بۇل نەتكەن باسسىزدىق؟  مۇنان سوڭ، وقۋشىدان قانداي ءبىلىم تالاپ ەتىمىز؟

ازاتتىق راديوسىندا جاريالانعان اسىلحان ماماشۇلىنىڭ «مۇعالىمدەر ءشوپ ورىپ، كوشە تازالاعانىن دا ايتادى» دەگەن ماقالاسىندا مۇعالىمنىڭ مىندەتىنە كىرمەيتىن قىزمەتكە ەرىكسىز جۇمىلدىرىلعان الماتى وبلىسى جامبىل اۋدانى ۇزىناعاش اۋىلىنداعى تۇرار رىسقۇلوۆ اتىنداعى ورتا مەكتەپتە تاريح پانىنەن ساباق بەرەتىن ايبوسىن ادىربەكوۆتىڭ جان-ايقايى دا كوتەرىلىپ وتىرعان ماسەلەنى قۋاتتاي تۇسەدى. كەيبىر اشىنعان مۇعالىمدەر اقپارات بەتىندە اتى-ءجونىن بۇركەمەي، شىندىقتى جايىپ سالعان.

تىعىرىققا تىرەلگەن، قوعامنىڭ نازارىن اۋدارعان مۇعالىمدەر ماسەلەسىن شەشۋ الدىمەن ءبىلىم جانە عىلىم مينيسترلىگىنىڭ تىكەلەي قورعاۋىندا، قولداۋىندا بولۋى قاجەت.

قالماحانبەت مۇقامەتقاليدىڭ ء«بىلىم سالاسىن باسقارۋدى ورتالىقتاندىرۋ قاجەت پە؟» http://jetysunews.kz/?p=1609  – اتتى ماقالاسىندا كەلتىرگەن دالەلدەر مەن دەرەكتەردەن ۇققانىمىز «مەكتەپتەردى اۋداندىق، وبلىستىق اكىمدىك قاراماعىنان بوساتىپ تىكەلەي ءبىلىم جانە عىلىم مينيسترلىگىنە قاراتىپ، ورتالىقتاندىرسا» دەگەن ۇسىنىس ايتقان. بۇنى دا وقىپ كورسەڭىز بولادى.

شىمكەنت قالاسىنداعى ا.س.ماكارەنكو اتىنداعى №41 مەكتەپ-ليتسەيدىڭ تاريح ءپانى مۇعالىمى، قازاقستان جۋرناليستەر وداعىنىڭ مۇشەسى، ءومىر شىنىبەكۇلىنىڭ مىنانداي پىكىرى وسى ويدى قۋاتتاي تۇسكەن ەكەن: ء«سارىنجىپوۆ وبلىستىق ءبىلىم باسقارمالارىن اكىمشىلىكتەن مينيسترلىك قۇزىرەتىنە وتكىزىپ الۋى كەرەك!»

وسى ۇسىنىسقا بايلانىستى فەيسبۋك پايدالانۋشىسى سۋلتان سۋلەەۆ ەسىمدى ازامات بىلاي دەپتى: «مۆد، پروكۋاتۋرا، كنب، سوتتار ءبارى استاناعا باعىنادى دا مەكتەپتى عانا جەرگىلىكتى اكىمدەرگە ەنشىلەپ قويعان.»

قازاقستان رەسپۋبليكاسىنىڭ 2007 جىلعى 27 شىلدەدەگى N 319 ءبىلىم تۋرالى زاڭى 51 بابىنىڭ 4 تارماعىندا «قازاقستان رەسپۋبليكاسىنىڭ زاڭدارىندا كوزدەلگەن جاعدايلاردى قوسپاعاندا، پەداگوگ قىزمەتكەرلەردى وزدەرىنىڭ كاسىپتىك مىندەتتەرىن ورىنداۋ مەن بايلانىسى جوق جۇمىس تۇرلەرىنە تارتۋعا جول بەرىلمەيدى.»

بۇل زاڭنىڭ كۇنى بۇگىنگە دەيىن ەسكەرىلمەي كەلە جاتقانى ۇلكەن كىنا ەمەس پە؟

جوعارى دە ايتىلعان ماسەلەلەردەن وڭ شەشىم شىعارار دەپ سىزگە سەنىم ارتامىز.

«جالىن» جۋرنالىنىڭ باس رەداكتورى،

رەسپۋبليكالىق «مەملەكەتتىك ءتىل»

قوعامدىق قوزعالىسىنىڭ توراعاسى،

قازاقستاننىڭ حالىق جازۋشىسى                                                                            م.شاحانوۆ 

Abai.kz