«9 ماۋسىمدا استانا قالاسىندا تۇرعىن ءۇي قۇرىلىس جيناق بانكى جانىنداعى قوعامدىق كەڭەستىڭ وتىرىسى وتەدى»، – دەپ حابارلايدى كەڭەس توراعاسى سەيىتقازى ماتاەۆ.

– كەزەكتى كوشپەلى وتىرىسىمىزدى استانا قالاسىندا وتكىزۋدى ۇيعاردىق. سوڭعى كەزدەرى قوعامدىق كەڭەستىڭ اتىنا «ساۋران جانە №24 كوشەلەرى اراسىنداعى كوپ پاتەرلى تۇرعىن ءۇي كەشەنى» قۇرىلىسىنىڭ كەشەۋىلدەۋىنە قاتىستى كوپ شاعىم ءتۇسىپ وتىر. بۇل نىساندا حالىقتىڭ بارلىق ساناتىنا ارنالعان 242 پاتەر بار. بۇل ءۇي ءبىر جارىم جىل بۇرىن پايدالانۋعا بەرىلۋى ءتيىس ەدى. بىراق ادامدار پاتەرلەرىن ءالى كۇنگە دەيىن كۇتىپ ءجۇر، – دەيدى س.ماتاەۆ.

استانا قالاسىنىڭ اكىمى ادىلبەك جاقسىبەكوۆكە وسى وتىرىسقا قاتىسۋعا شاقىرعان حات الدىن الا جىبەرىلدى.

- ءبىز قۇرىلىستىڭ نەلىكتەن كەشىگىپ جاتقانىن ايقىنداۋىمىز كەرەك. ازاماتتارىمىزدىڭ پاتەر كىلتىن قاشان الاتىنىن دا سول جەردە انىقتاۋعا ءتيىسپىز. سونىمەن بىرگە، وڭىرلەردى دامىتۋ باعدارلاماسى بويىنشا ەلوردادا سالىنىپ جاتقان ۇيلەردىڭ ساپاسىن دا تەكسەرە كەتەمىز. قازىر قۇرىلىس سالۋشىلاردىڭ، اكىمدىكتىڭ، تۇرعىن ءۇي قۇرىلىس جيناق بانكىنىڭ جانە بانك كليەنتتەرىنىڭ تىعىز بايلانىستا بولىپ، بىرگە جۇمىس ىستەگەنى ابزال، – دەپ اتاپ ءوتتى قوعامدىق كەڭەس جەتەكشىسى.

ونىڭ سوزىنە قاراعاندا، قوعامدىق كەڭەس مۇشەلەرى قۇرىلىس الاڭىنا بارىپ، كەشەننىڭ جاي-كۇيىن ءوز كوزدەرىمەن كورمەك. وسى نىسانداعى جۇمىستىڭ ساپاسىنا دا باعا بەرەدى. سونىمەن قاتار، مەملەكەتتىك باعدارلاما بويىنشا پاتەر ساتىپ العىسى كەلەتىن ازاماتتارمەن كەزدەسىپ، پىكىر الماساتىن بولادى.

قوسىمشا سۇراقتارىڭىزدى قتقجب جانىنداعى قوعامدىق كەڭەستىڭ os@hcsbk.kz. ەلەكتروندى مەكەنجايىنا تىكەلەي جىبەرە الاسىزدار.

اباي-اقپارات