سەنبى كۇنى وتىرار اۋدانىندا، ارىستان باپتا جەرلەنگەن قوڭىرات ىشىندەگى اۋليە قۇربان اتادان تارايتىن 5 رۋ (كەيدە 6 رۋ دەپ تە ايتىلادى) ەلدىڭ يگى جاقسىلارى اتانىڭ كەسەنەسىنىڭ توبەسىندەگى قاڭىلتىردى التىنمەن اپتاۋ تۋرالى سولاقاي شەشىم قابىلداپتى. وزدەرى سول كۇنى "قوردا اقشا از، قاي جاعىنا جەتكىزەرىمىزدى بىلمەيمىز" دەپ وتىردى. مەن جەكسەنبى كۇنى استا سويلەگەن سوزىمدە "ارينە، قورداعى اقشا سىزدەردىكى، نە ىستەيمىن دەسەڭىزدەر دە ەرىك وزدەرىڭىزدە، دەگەنمەن، سول 18 ملن.تەڭگەنى 18 دارىندى بالانى وقىتۋعا جۇمساساڭىزدارشى" دەگەن ۇسىنىس ايتتىم. قاسقا مەن جايساڭدارعا ءسوزىم ۇناماي قالدى ما، بىلمەيمىن... بىراق، مەشىتتىڭ كۇمبەزىن، كەسەنەنىڭ كۇمبەزىن التىنمەن اپتاۋ كىمگە كەرەك؟ الماتىداعى ورتالىق مەشىتتى جاڭىلىسپاسام ۆ.حراپۋنوۆ حريستياندارشا التىنمەن اپتاتقاننان كەيىن جۇقپالى اۋرۋداي جايىلىپ بارا جاتقان، ودان بەرى اقتوبە مەن استانادان كورىنىس تاپقان وسى تەرىس ۇردىسكە توسقاۋىل قويۋعا بولماي ما؟ اسىرەسە، كەسەنەنىڭ كۇمبەزىن التىنداعاننان ءولى ارۋاققا نە پايدا؟ تىرىلەرگە ونىڭ قاجەتى قانشا؟! قوعامعا، ەڭ باستىسى بولاشاققا ول ءىس نە بەرەدى؟ بىزدە كەسەنەنىڭ توبەسىنە التىن جاپقاننان باسقا پروبلەما اتاۋلىنىڭ ءبارى شەشىلىپ، ەلدىڭ وقىعان، توقىعان، لاۋازىمدى قىزمەت اتقارعان مىرزالارىنا باسقا اينالىسار ەشتەڭە قالماعانى ما سوندا؟ قوجا-احمەت ياسساۋي كەسەنەسىنىڭ توبەسىنە ءامىر-تەمىر بايقۇستىڭ اقىلى جەتكەنىمەن التىنى جەتپەي قالعان ەكەن-اۋ...
يسلام دا بۇنداي ءۇردىستى قولداماسا كەرەك. وسىنىڭ قاجەتتىگىن ءتۇسىندىرىپ بەرەر ءدىني باسقارمادا باسشى، عۇلاما مولدا نەمەسە ءدىنتانۋشى تابىلار ما ەكەن؟..
ومىرزاق اقجىگىت

وڭتۇستىك قازاقستان وبلىسى.

رەداكتسيادان: اۆتوردىڭ پىكىرى رەداكتسيانىڭ كوزقاراسىن بىلدىرمەيتىندىگىن ەسكەرتەمىز.

Abai.kz