بيىلعى پرەزيدەنتتىك سايلاۋدا ينتەرنەت-تەحنولوگيالار باسىمدىق تانىتۋدا.

بيىلعى پرەزيدەنتتىك سايلاۋدىڭ وزگە سايلاۋلاردان باستى ايىرماشىلىعى – سايلاۋالدى ناۋقاندا ينتەرنەت-تەحنولوگيالاردىڭ باسىمدىعى. ءار ءتۇرلى ينتەرنەت-تەحنولوگيالار سايلاۋ ءۇردىسىن قىزىقتى ءارى تارتىمدى ەتۋگە باعىتتالعان. قازىرگى سايلاۋ ناۋقانىندا بەلسەندى سيپاتقا يە بولىپ كەلە جاتقان ينتەرنەت-تەحنولوگيالاردىڭ ءبىرى – كوممەرتسيالىق ەمەس، مەملەكەتتىك ەمەس election2015.kz سايتى. بۇل سايتتىڭ مەملەكەت نە پارتيا وكىلدەرىمەن ەمەس، ازاماتتاردىڭ قولداۋىمەن پايدا بولعانىن ەرەكشە اتاپ ءوتۋ كەرەك.

بۇل سايت قىزىقتى سايلاۋالدى ساراپتاما، بەينەماتەريالدار مەن الەۋمەتتىك سەرۆيستەردەن سايلاۋالدى تاقىرىپ بويىنشا جاڭالىقتاردى جيناقتاۋعا باعىتتالعان. سونىمەن قاتار، سايتتا وقىرماندار كانديداتتاردىڭ ساياسي پلاتفورماسىن تالقىلاپ، سايلاۋعا قاتىستى ءوزىنىڭ پىكىرلەرىن بەرە الادى. بۇل قوعامداعى ازاماتتى بەلسەندىلىكتى جوعارلاتۋعا وزىندىك سەپتىگىن تيگىزەدى.

پرەزيدەنتتىك سايلاۋ ناۋقانىنا ارنالعان ارنايى سايتتىڭ پايدا بولۋى – سايلاۋ تەحنولوگيالارىنىڭ جاڭا دەڭگەيگە يە بولعانىن كورسەتەدى. بۇل سوڭعى جىلدارى كوپتەگەن مەملەكەتتەردىڭ سايلاۋ ناۋقانىندا ورىن العان ترەندتەردىڭ ءبىرى. مىسالعا، 4 ساۋىردە ۇلىبريتانيادا دا 7 مامىردا وتەتىن پارلامەنتتىك سايلاۋعا ارنالعان ارنايى سايت قۇرىلعان بولاتىن.

سونداي-اق، ينتەرنەت-تەحنولوگيالار ارقىلى تەك سايلاۋ تۋرالى عانا اقپارات بەرىپ قانا قويماي، قوعامداعى ازاماتتاردىڭ ەلەكتورالدى مادەنيەتىن دە دامىتۋعا بولادى. مىسالعا، ناۋرىز ايىندا باستاۋ العان «EL.kz» الەۋمەتتىك جەلىسى ارقىلى جۇرگىزىلىپ جاتقان «سەنىڭ داۋىسىڭ – سەنىڭ بولاشاعىڭ» پوستەرلەر بايقاۋى وسى ماقساتقا باعىتتالعان.

الۋا جولدىبالينا، ساياساتتانۋشى.

Abai.kz