2015 جىلدىڭ 11 ساۋىرىنەن قازنەتتە بالاماسى جوق «قازاقيا 2015» بايقاۋىنا قاتىسۋشىلار ءوز باعىتىنداعى العاشقى ستانساسى – الماتى قالاسىندا بايقاۋ ساپارىن باستاپ كەتتى. ىرىكتەۋدەن وتكەن بلوگەرلەر توبى الدىن الا قۇرعان جوسپارلارى بويىنشا ءار ستانسادان الەۋمەتتىك جەلىلەردە پوست جازۋلارى ءتيىس.

«قازاقيا 2015» – قازاقستاننىڭ بىرنەشە وبلىسى مەن قالاسىن  قامتيتىن بلوگ-ساپار. شارت بويىنشا بايقاۋعا قاتىسۋشىلار 12 كۇن ىشىندە 12 ستانسانى (الماتى، سارىوزەك، ۇشتوبە، اياگوز، ريددەر، سەمەي، اقسۋ-2, ەكىباستۇز، تەمىرتاۋ، جاڭاارقا، جەزقازعان، استانا) باسىپ وتەدى. بلوگ-ساپاردىڭ ماقساتى – ەلىمىزدى جاڭا قىرىنان تانىتىپ، قازاقتىلدى ينتەرنەت كەڭىستىكتى ساپالى ماتىندىك، بەينە، فوتو، اۋديو كونتەنتپەن تولىقتىرۋ. 

بايقاۋدىڭ جۇلدە قورى – 1 ميلليون تەڭگە.

بايقاۋعا ىرىكتەۋ 26 ناۋرىزدان باستالىپ، العاش ءوتىنىش بىلدىرگەن 50 شاقتى ادامنان ەكىنشى كەزەڭگە 26-سى ءوتتى، ال ءۇشىنشى كەزەڭگە 10 قاتىسۋشى عانا قالدى. شويىن جولدا بولاتىن ساپار 11 ءساۋىر مەن 22 ءساۋىر ارالىعىنا جوسپارلانعان.

ساياحات بارىسىندا جازىلعان قاتىسۋشىلاردىڭ ەڭبەگى الەۋمەتتىك جەلىلەردەگى (اسىرەسە، فەيسبۋك) جازباسىنىڭ تارتىمدىلىق يندەكسى (پوست، ءبولىسۋ، لايك، پىكىر) ەسكەرىلە وتىرىپ، قازىلار القاسىنىڭ قورىتىندى شەشىمىمەن انىقتالادى. قاتىسۋشىلار جازباسىنىڭ فورماتىنا (فوتورەپورتاج، سۇحبات، ۆيدەو، ت.س.س.) شەكتەۋ قويىلمايدى.

جوباعا Altel 4G GSM كومپانياسى دەمەۋشىلىك ەتۋدە.

qazaqia2015@gmail.com

www.qazaqia2015.kz