1 ءساۋىر كۇنى بىرەۋدى الداپ، نە قاتتى الدانىپ كورمەپپىن. ال ەندى بىلايعى كۇندەردە الداۋعا تۋرا كەلەتىن كەزدەر بار. كەيدە امالسىزدان، كەيدە ادەيى دەگەندەي...
ادەيى الداعانىمنىڭ ءبىرىن ايتايىن. باقىت امەتاەۆ دەگەن دوسىم بار ەكەنىن بۇرىن دا جازىپ ءجۇرمىن. الماتى وبلىسى ۇزىناعاش اۋدانىنىڭ ورتالىعىنداعى بازاردى ەتپەن قامتاماسىز ەتىپ وتىرعان بۇل ءيتتىڭ ەڭ جامان ادەتى — تەلەفون جوعالتۋ. جاڭا تەلەفون العاندا سەنىڭ ءنومىرىڭدى ىزدەپ، قايتا جازىپ قويۋ دەگەن ونىڭ ميىنا كىرمەيدى. ىزدەپ، زۆونداۋ دەگەن دە وعان «جات ادەت». ىلعي ءوزىڭ زۆوندايسىڭ. ەستيتىنىڭ ءبىر-اق جاۋاپ: «بۇل كىم ەكەن؟». تىم بولماسا، داۋىسىڭدى ايىرۋعا بولادى عوي...
مىنە، كەزەكتى رەت زۆونداپ تۇرمىن. تاعى دا سول جاۋاپ — «كىم ەكەن؟». جىنىم وينادى. كەنەت باسىما ءبىر وي ساپ ەتە قالدى:
— ءالوۋ، ماعان باقىت دەگەن ازامات كەرەك ەدى.
— مەن عوي، باقىت.
— ءوي، اينالايىن، مەن سەرىك دەگەن اعاڭ بولامىن. فينپولدا ىستەيمىن. اكەمىزدىڭ جىلىن بەرەيىن دەپ جاتىر ەك. سوعان جىلقى كەرەك بوپ. سەندە ءتاۋىر جىلقىلار بار دەگەسىن...
— ءوي، اعا، قوڭدى جىلقىنىڭ ءبارى — مەندە. قالاعانىڭىزدى الاسىز.
— ماعان ءبىر ەمەس، ەكى جىلقى كەرەك.
— ونى كەرەك بولسا دا تاۋىپ بەرەم، اعا. - باقىتتىڭ داۋسى كوڭىلدى شىقتى.
— ءتا-اك، قالاي كورەمىن بارىپ؟
— اعا، ۇزىناعاشقا كىرگەن جەردە كافەنىڭ جانىنان وڭعا بۇرىلاسىز. دو كونتسا باراسىز دا، سولعا بۇرىلىڭىز. ەكىنشى ءۇي — بىزدىكى. كوك قاقپا. ۇيدە ءىنىم، بالالار بار. قارلىعاش — كەلىنىڭىزدىڭ اتى. ەرتە بارساڭىز، سول كىسىنىڭ ءشايىن ىشە تۇرىڭىز، مەن الماتىعا شىعىپ بارا جاتىر ەم، تۋرا ەكى ساعاتتا بولام.
— اينالايىن-اۋ، مەن سول ۇزىناعاشتا تۇرمىن. ەكى ساعات دەگەنىڭ كوپتەۋ ەكەن، مەن باسقا ءبىر ۆاريانتىن قاراستىرا بەرەيىن، ەندەشە. 
— اعا، مىنە، الماتىنىڭ كولتسوۆويىنان بۇرىلىپ جاتىرمىن. تۋرا 20 مينۋتتا بولام، ەشقايدا كەتپەڭىز.
15 مينۋت وتكەسىن، سمس جىبەردىم: ء«وي، سەن قىرعىزدان مال ۇرلاپ اكەلىپ، ساتاتىن وڭباعان ەكەنسىڭ عوي. قوي، ونداي ۇرلىق مالدى المايمىن...». تەلەفونىم شىر ەتە قالدى:
— سەرىك اعا، مەن تۇسىنبەي قالدىم...
— تۇسىنبەيتىن نەسى بار؟! باۋكەسپە ەكەنسىڭ عوي. ەرتەرەك بىلگەنىمدى ايت، ايتپەسە، اكەمنىڭ جىلىنا ۇرلىق مال سويايىن دەپ تۇر ەكەنمىن. قۇداي ساقتاپتى...
— ءوي، اعا، ونى كىم ايتىپ ءجۇر؟
— ەل ايتىپ جاتىر. وڭباعان ەكەنسىڭ عوي. قالاي بويلارىڭا سىڭەدى، ءا، ارامنان تاپقان تابىس؟! ءوي، كورگەنسىز.
— اعا، مەنى ولاي قورلاماڭىز. ءوزىڭىز الام دەپ الىپ... ادامدى اۋرەگە سالىپ... شارۋامدى تاستاپ، ۇشىپ كەلدىم ەمەس پە؟ سوزىڭىزدە تۇرمايتىنىڭىز بار...
— ەندى سەن شارۋاسىنان قالدى دەپ ارام مال سويمايمىن عوي مەن. اكەم — بەس ۋاقىت نامازى تۇگەل تاقۋا ادام بولاتىن...
— اعا، مەن دە ناماز وقيتىن اداممىن (جانى قىسىلسا كەرەك، باقىت وتىرىكتى سوعىپ جىبەردى. راس، بىرنەشە جىلدان كەيىن نامازعا جىعىلدى. اللا ساۋابىن مولىنان جازعاي — ب.ب). جۇرت ايتا بەرەدى. كورە المايتىندار عوي...
— ءاي، شپانا، ەندى مەنىمەن ءسوز تالاستىرايىن دەدىڭ بە؟ ۇرى ەكەنىڭدى، ۇيىمداسقان توبىڭ بار ەكەنىن ماعان سەنىمدى ادامدار ايتىپ وتىر. مىنا استى وتكىزىپ الايىن، سوسىن ءىسىم سەنىمەن بولسىن... توز-توز قىلىپ قاڭعىتىپ جىبەرمەسەم، اتىمدى باسقا قوي. نالوگ تا تولەمەيدى دەيدى عوي سەنى...
باقىت ءۇنسىز قالدى. مەن دە تەلەفوندى وشىرە سالدىم. ىلە شىمكەنتتەگى كەنجەگە زۆوندادىم: «باقىتتىڭ ءحالىن ءبىلشى». «نە بوپ قالدى؟». «جاي، شۇعىل زۆوندا». 5 مينۋتتان كەيىن كەنجە قايتا سوقتى. ىشەك-سىلەسى قاتىپ تۇر: «سەنىڭ ءىسىڭ بە؟ اناۋ ومىردەن ءتۇڭىلىپ وتىر. كوپتەن بەرى جىلقىم وتپەي تۇرعاسىن، ەكەۋىن الام دەگەسىن، شارۋامدى تاستاپ جەتىپ كەلىپ ەم... فينپولدا ىستەيتىن كىسى ەكەن، باسىما پالە بولماسا بولدى...» — دەيدى...»
تاعى تەلەفون سوقتىم.
— اللو، سەرىك اعا. - باقىتتىڭ جارىقشاقتانعان داۋسىندا ءالسىز ءبىر ءۇمىت بار.
— ەي، قايداعى سەرىك؟
— جاڭا وسى تەلەفوننان زۆوندادىڭىز عوي. ەكى جىلقى الام دەپ...
— قايداعى سەرىك، قايداعى جىلقى؟ مەن — باۋىرجانمىن، اقتوبەدەن.
— ءوي، اكەڭنىڭ... ادام ءوستىپ تە قالجىڭداي ما ەكەن. بار شارۋامنان قالىپ... قايتىپ اينالىپ كەلىپ...
— ءوز وبالىڭ وزىڭە. مەنى تانىماي نە كورىندى ساعان؟
— كەتشى-ەي. - باقىت اۋزىن تولتىرىپ ءبىر بوقتادى دا، ترۋبكانى تاستاي سالدى.
ىلە-شالا، كەنجە حابارلاسا كەرەك، قازاقستاننىڭ تۇكپىر-تۇكپىرىنەن ءبىزدىڭ قۋلار باقىتقا تەلەفون سوعا باستايدى: «اللو، بۇل — باقىت پا ەكەن؟ سەرىك دەگەن اعاڭ عوي. ەكى جىلقى كەرەك ەدى...».
...كەلەسى جولى قوڭىراۋلاتقاندا، تەلەفون تۇتقاسىن كوتەرگەن باقىت بىلاي دەدى: «اسسالاۋماعالەيكۋم، باۋكە!»

باۋىرجان باباجانۇلى.

(جازبا اۆتوردىڭ facebookتەگى پاراقشاسىنان الىندى)