استانا قالاسىندا قازاقستان رەسپۋبليكاسىنىڭ تۇڭعىش پرەزيدەنتى – ۇلت كوشباسشىسىنىڭ كىتاپحاناسىندا «بەيبىتشىلىك پەن جاسامپازدىق ديالوگى» اتتى قازاقستان مەن رەسەي زيالىلارى فورۋمىنىڭ وتىرىسى ءوتتى.

ءىس-شارانى «قازاقستان رەسپۋبليكاسىنىڭ تۇڭعىش پرەزيدەنتى – ۇلت كوشباسشىسىنىڭ كىتاپحاناسى» مەملەكەتتىك مەكەمەسىنىڭ قولداۋىمەن «قازاقستان ازاماتتىق اليانسى»، «ەۋرازيالىق مونيتورينگ» تالدامالىق زەرتتەۋلەر ورتالىعى (قازاقستان رەسپۋبليكاسى), «سەۆەر-يۋگ» ساياسي ورتالىعى (رەسەي فەدەراتسياسى), «ەۋرازيالىق زەرتتەۋلەر ينستيتۋتى» دامۋ قورى (رەسەي فەدەراتسياسى) ۇيىمداستىردى. وعان قازاقستان رەسپۋبليكاسى پارلامەنتى ءماجىلىسى مەن رەسەي فەدەراتسياسى مەملەكەتتىك دۋماسىنىڭ دەپۋتاتتارى، قوعامدىق جانە ارداگەرلىك ۇيىمداردىڭ جەتەكشىلەرى، اكادەميالىق قاۋىمداستىق، جاستار ۇيىمدارى مەن باق وكىلدەرى، سونىمەن قاتار قازاقستان مەن رەسەيدىڭ الدىڭعى قاتارلى ساراپشىلارى مەن تانىمال قوعام جانە ساياسي قايراتكەرلەرى قاتىستى.

قازاقستان پرەزيدەنتى اكىمشىلىگى جەتەكشىسىنىڭ ورىنباسارى باعلان مايلىباەۆ فورۋم قاتىسۋشىلارىن قۇتتىقتاپ، ءسوز سويلەدى.

جيىن قاتىسۋشىلارى اتاپ وتكەندەي، قازاقستان پرەزيدەنتى ن.ءا.نازارباەۆتىڭ سارابدال ساياساتىنىڭ ارقاسىندا تاۋەلسىزدىك جىلدارى قازاقستان ەكونوميكالىق قۋاتتى، ساياسي تۇراقتى مەملەكەت رەتىندە ءساتتى دامۋدا. ەلدە ۇلتارالىق جانە كونفەسسياارالىق كەلىسىمنىڭ بىرەگەي مودەلى قالىپتاستى. جىل سايىن قازاقستاننىڭ حالىقارالىق ساحناداعى بەدەلى ارتىپ كەلەدى. ساراپشىلار قازاقستاننىڭ ەكونوميكالىق قۋاتىنىڭ قورى مول ەكەنىن اتاپ ءوتتى. وعان، ەڭ الدىمەن، «نۇرلى جول» جاڭا ەكونوميكالىق ساياساتى كەپىل بولا الادى.

كەزدەسۋ قاتىسۋشىلارى قازاقستاننىڭ ۇدەمەلى يندۋستريالىق-يننوۆاتسيالىق دامۋ باعدارلاماسىن ىسكە اسىرۋ بويىنشا، سونداي-اق شاعىن جانە ورتا بيزنەستى قولداۋ سالاسىنداعى ءساتتى تاجىريبەسىنە ەرەكشە توقتالدى.

جالپى، جيىندا «قازاقستان-2050» ستراتەگياسىن ودان ءارى ىسكە اسىرۋ قازاقستانعا ەكونوميكاسىنىڭ دامۋ قارقىنىن ساقتاپ، ەڭ دامىعان 30 ەلدىڭ قاتارىنا قوسىلۋعا مۇمكىنىدك بەرەدى دەگەن ورتاق پىكىر ايتىلدى.

اباي-اقپارات.

زيالىلار فورۋمىن قۇرۋ تۋرالى قارار

(استانا قالاسى، 30 ناۋرىز 2015 جىل)

ءبىز، عىلىم، ءبىلىم، مادەني قاۋىمداستىق، ازاماتتىق قوعام ينستيتۋتتارىنىڭ وكىلدەرى،

قازاقستان مەن رەسەيدىڭ تاريحي قالىپتاسقان بەرىك بايلانىسىن نازارعا الىپ،

قازاقستاندىق-رەسەيلىك گۋمانيتارلىق-مادەني ىنتىماقتاستىق ماڭىزدى ءوزارا ءتيىمدى الەۋەتكە يە دەگەن نىق سەنىممەن،

مادەنيەت، ءبىلىم، عىلىم، اقپارات جانە بۇقارالىق كوممۋنيكاتسيا، سپورت، تۋريزم جانە جاستارمەن جۇمىس سالاسىنداعى گۋمانيتارلىق ىنتىماقتاستىقتى دامۋتى مەن نىعايتۋدىڭ ماڭىزدىلىعىن سەزىنىپ،

مەملەكەتتەرىمىزدىڭ ۇلتتىق داستۇرلەرىن، تىلدەرى مەن مادەنيەتتەرىن ءوزارا بايىتۋ جانە ەركىن دامىتۋدىڭ جوعارى ماڭىزدىلىعىن ءتۇسىنىپ،

بىرلەسىپ كۇش سالۋ ارقىلى بارشا ەۋرازيالىق كەڭىستىكتە ەكونوميكالىق جانە الەۋمەتتىك ىلگەرىلەۋدى، ۇلتارالىق كەلىسىم مەن تۇراقتىلىقتى قامتاماسىز ەتۋگە دەگەن ۇمتىلىسپەن،

تۇراقتى جۇمىس ىستەيتىن پىكىرالماسۋ الاڭى رەتىندە قازاقستان مەن رەسەي زيالىلارىنىڭ فورۋمىن قۇرۋ تۋرالى شەشىم قابىلدادىق.

قارار استانا قالاسىندا (قازاقستان رەسپۋبليكاسى) 2015 جىلعى 30 ناۋرىزدا قازاق جانە ورىس تىلدەرىندە قابىلداندى.