«ەلباسى 8 ناۋرىز – حالىقارالىق ايەلدەر كۇنىنە ارنالعان «جۇرەگىمنىڭ جىرى» اتتى مەرەكەلىك كونتسەرتتى تاماشالادى»، دەپ حابارلايدى اقوردانىڭ ءباسپاسوز قىزمەتى.

قازاقستان پرەزيدەنتى ەلىمىزدىڭ نازىك جاندى ايەلدەر قاۋىمىن كەلە جاتقان مەرەكەمەن قۇتتىقتاپ، حالقىمىز ايەل زاتىن ءاردايىم ايرىقشا قۇرمەتتەگەنىن اتاپ ءوتتى.

– زاۋالى كوپ زاماندا قازاق قىزدارى قيىندىققا ءتوزىپ، ۇنەمى قايسارلىق تانىتتى. اياۋلى ارۋلار تاۋەلسىزدىك العان جىلدارى دا اۋىرتپالىقتى قايىسپاي كوتەردى. جاس مەملەكەتىمىزدىڭ كەرەگەسىن كەڭەيتىپ، ىرگەسىن نىعايتۋعا ايرىقشا ۇلەس قوستىڭىزدار. سىزدەردىڭ ەسەلى ەڭبەكتەرىڭىز ەڭسەلى ەلىمىزدىڭ دامۋىنا ەرەكشە سەرپىن بەردى، – دەدى مەملەكەت باسشىسى.

نۇرسۇلتان نازارباەۆ ايەلدەر ءاربىر وتباسىنىڭ باق-بەرەكەسى جانە قازاقستاننىڭ باسەكەگە قابىلەتتىلىگىنىڭ نەگىزى ەكەندىگىنە توقتالدى.

– بۇگىنگى زاماندا ايەلدىڭ قوعامدا اتقاراتىن رولدەرى اراسىنداعى ايىرما قارقىندى ۇلعايىپ كەلەدى. ءبىر ءپوليۋستىڭ باسىندا – ايەلدەرى وتباسى توڭىرەگىندە شەكتەلگەن ەلدەر، ال ەكىنشى پوليۋستە – كەرىسىنشە، ايەلدەرى بالالارىنا، ۇرپاق جالعاستىعىنا دەگەن سەزىمدەرىنەن ايرىلىپ، وتباسىنان جەدەل الىستاپ بارا جاتقان مەملەكەتتەر تۇر. وسى ەكى پوليۋس ورتاسىنداعى ءبىزدىڭ ەلىمىزدىڭ جاعدايى – ناعىز «التىن ارالىق». بىزدەگى ايەلدەر جۇمىستا، شىعارماشىلىقتا، سپورتتا، عىلىمدا تابىستارعا جەتۋدە. سونىمەن قاتار وتباسىنىڭ دا ساقتاۋشىسى بولىپ قالىپ وتىر. مۇنىڭ قانشالىق قيىن ەكەنىن تۇسىنە وتىرىپ، مەملەكەت سىزدەرگە جاردەمدەسۋگە تىرىسادى، اۋىرتپالىقتىڭ ءبىر بولىگىن وزىنە الادى. بۇل قولداۋ جالعاسا بەرەتىن بولادى، – دەدى قازاقستان پرەزيدەنتى.

مەملەكەت باسشىسى قازاقستان ارۋلارى ايەل-انا جانە ايەل-مامان بەينەسىن ۇيلەستىرە الىپ كەلە جاتقانىنا نازار اۋداردى.

– قازاقستاندىق ايەلدەردىڭ قايتالانباس وسى ەرەكشەلىگى – قوعامىمىزدىڭ سونداي مىقتى تىرەگى ءارى ءبىزدىڭ ەتنوسارالىق جانە دىنارالىق كەلىسىم ۇلگىسى سياقتى تانىمال برەندىمىز. ءبىزدىڭ ايەلدەر وتباسىلىق قارىم-قاتىناستى ءاردايىم باتىل قورعادى. وسى زالدا وتىرعان جانە قازاقستان قوعامىنىڭ بارلىق نازىك جاندى قاۋىمى وكىلدەرىنە ايتارىم: ەش اسىرەلەۋسىز ايتساق،  ءبىزدىڭ ۇلتتىق بايلىعىمىز – سىزدەرسىزدەر، – دەدى نۇرسۇلتان نازارباەۆ.

قازاقستان پرەزيدەنتى ايەلدەردىڭ تۋمىسىنان سەنىمدى تىرەك ىزدەۋگە بەيىم ەكەنىن، ونى تاپقان سوڭ دا مىنسىزدىككە قاراي ۇمتىلۋىن توقتاتپايتىنىن ايتتى. مەملەكەت باسشىسى مۇنداي ۇستانىم قارقىندى ءارى ۇيلەسىم تاپقان قازاقستان جولىنىڭ تۇپكى ارقاۋى ەكەنىن اتاپ ءوتتى.

نۇرسۇلتان نازارباەۆ ەلىمىزدىڭ باسىمدىعىنىڭ ءبىرى لايىقتى ۇرپاق تاربيەلەۋ بولىپ سانالاتىنىنا توقتالدى.   

– بۇل ىستە انانىڭ عالامات قاجىر-قۋاتىن ەشتەڭە الماستىرا المايدى. ەگەر ءاربىر وتباسىندا انا ماحابباتى جالىنداپ تۇرسا، وندا بۇكىل ەل كەلىسىم مەن ءوسىپ-وركەندەۋدىڭ ارايلى شۋاعىنا بولەنەتىن بولادى. جىنىسقا، دىنگە، ۇلتقا قاراماستان، ءبىزدىڭ ءبارىمىزدىڭ ورتاق قازاقستاندىق ارمانىمىز بار. ءبىزدىڭ ارمانىمىز – باسىندا باسپاناسى بار، بالالارعا جاقسى ءبىلىم بەرە الاتىن جانە ولاردىڭ بولاشاعىنا سەنىمدى ۇلكەن ءارى بەرىك وتباسى. بۇل رەتتە ايەلدەردىڭ ەڭبەگىنە باعا جەتپەيدى، مەن سىزدەردىڭ ارقايسىڭىزعا ريزامىن، – دەدى مەملەكەت باسشىسى.

قازاقستان پرەزيدەنتى كەلە جاتقان مەرەكەمەن تاعى دا قۇتتىقتاپ، ءاربىر ايەل زاتى مەن قازاقستاندىق وتباسىعا جىلىلىق، شاتتىق جانە كەلىسىم تىلەدى.

مەملەكەت باسشىسى كونتسەرت باستالماس بۇرىن «جاسامپاز استانا» فوتوكورمەسىن ارالاپ كوردى، سونداي-اق وسى جوباعا قاتىسۋشى ايەلدەرمەن اڭگىمەلەستى.

كونتسەرتتە بەلگىلى وتاندىق ارتىستەر مەن شىعارماشىلىق ۇجىمدار ونەر كورسەتتى. قويىلىم ءتۇرلى مۋزىكالىق جانردى قامتىدى، ولاردىڭ كەيبىرى حورەوگرافيالىق نومەرلەرمەن سۇيەمەلدەندى.

اباي-اقپارات.