جاقىندا پارلامەنت دەپۋتاتتارى جالاقىسىن قىسقارتپاۋ ءۇشىن ءبىر اۋىزدان داۋىس بەرىپ، قوعامدا ءبىراز داۋ تۋدىردى. مەنىڭشە، وسى تاقىرىپتى تەلەارناداعى ارىپتەستەرىمىز تارازىعا سالماي، جەڭىل ءوتىپ كەتكەن سياقتى. ال، كەز-كەلگەن دەپۋتاتتىڭ الەۋمەتتىك ماسەلەسى - سول ەلدىڭ ەكونوميكالىق الەۋەتىن، كۇش-قۋاتىن ءبىلدىرۋى ءتيىس. سوندىقتان، الدىمەن "باسقا مەملەكەتتەر دەپۋتات كورپۋسىن قالاي ۇستايدى؟ شىعىندارى قانشا؟" دەگەن سۇراققا جاۋاپ ىزدەپ كورەلىك. 
1. اقش كونگرەسسمەندەرى مەن سەناتورلارىنىڭ ايىنا الاتىن جالاقىسى 14,5 جانە 16,1 مىڭ دوللار. مۇنى دوڭگەلەكەتەسەك - اقش بويىنشا ورتاشا جالاقىدان 5 ەسە جوعارى ەكەن. سەناتورلار مەن كونگرەسسمەندەردىڭ زاڭگەر، ەكونوميست، كۇزەتشى سياقتى كومەكشىلەرىنىڭ ەڭبەكاقىسى زاڭ بويىنشا جىلىنا 50 مىڭ دوللاردان اسپاۋى ءتيىس. 
2. رەسەي فەدەراتسياسى مەملەكەتتىك دۋماسىنىڭ دەپۋتاتتارى ايىنا 420 مىڭ رۋبل الادى. سالىستىرمالى تۇردە الساق - بۇل جالاقى - رەسەيدەگى ورتاشا ايلىق تابىستان 14 ەسەگە كوپ. سونداي-اق، مەملەكەتتىك دۋما دەپۋتاتتارىنا ارنالعان تەگىن ەمدەلۋ، ۇشاقتارمەن ۇشۋ، ارنايى ساناتوريلەر سياقتى كوپتەگەن جەڭىلدىكتەر قاراستىرىلعان. كومەكشىلەرىنىڭ ءوزى سان جەتپەس تۇتاستاي ارميا دەرسىڭ!
3. ۋكراينا جوعارعى راداسىنىڭ دەپۋتاتتارى قازىرگى قيىن جاعدايدا بيۋدجەت شىعىنىن 1 ميلليارد گريۆەنگە قىسقارتتى. ءسويتىپ، قازىر قولدارىنا 6,1 مىڭ گريۆەن جالاقى الادى. ەلدەگى ورتاشا ايلىق-جالاقىمەن سالىستىرعاندا بۇل 6-7 ەسەگە كوپ. ال دەپۋتاتتاردىڭ كومەكشىلەرىنە ايىنا 20 مىڭ گريۆەن عانا بولىنگەن. سوندىقتان، قانشا كومەكشى ۇستايتىنىن ءار دەپۋتاتتىڭ ءوزى شەشەدى. 
4. قازاقستان ءماجىلىسىنىڭ دەپۋتاتتارى اي سايىن قولدارىنا 497 مىڭ تەڭگە الادى. بۇل ەلدەگى ورتاشا ايلىق-جالاقىدان 3,5-4 ەسە كوپ. قوس پالاتاداعى حالىق قالاۋلىلارىنا جىل سايىن جۇمسالاتىن شىعىن 15 ملرد تەڭگەنىڭ كولەمىندە. دەپۋتاتتارىمىزدىڭ كومەكشىلەرى رەسەيلىك ارىپتەستەرىنە قاراعاندا 5 ەسە از. 
ياعني، سالىستىرمالى تۇردە الساق - ءبىزدىڭ دەپۋتاتتارىمىزدىڭ جاعدايى ەكونوميكالىق جاعىنان السىزدەۋ، سوعىسىپ جاتقان ۋكراينا دەپۋتاتتارىمەن شامالاس. مەنىڭشە، حالىق قالاۋلىلارىنىڭ جالاقىسىن ەمەس، اپپاراتىن، كومەكشىلەرىن، ءتىپتى قاجەت بولسا سەناتتى قىسقارتقان دۇرىس سياقتى.

(جازبا اۆتوردىڭ facebookتەگى پاراقشاسىنان الىندى)