كەشە ۋرۋگۆايدىڭ ايگىلى "ەڭ كەدەي پرەزيدەنتى" حوسە مۋحيكا ءوز ەركىمەن بيلىكتەن كەتىپ، پرەزيدەنتتىك تىزگىندى ءىزباسارىنا تابىس ەتتى. الەم ءباسپاسوزى پرەزيدەنتىن ءدال وسىلاي شىعارىپ سالعان ەل تاريحتا بولماعان دەسەدى. شىنىمەن دە، باق كوز جاستارى كول بولعان،قىزمەتىنە ەرەكشە ريزا بولعانداردىڭ العىسىن كورسەتىپ جاتىر. 

ەڭبەكاقىسىنىڭ باسىم بولىگىن قايىرىمدىلىق ماقساتىنا جۇمساپ كەلگەن ول ەلدىڭ ەرەكشە سۇيىسپەنشىلىگىنە يە بولدى. حالىق قاتتى قۇرمەتتەيدى. كەيبىر ەلدەردەگىدەي جالعان ەمەس، شىن جۇرەكتەن شىققان ماداق يەسى.
حالقى ونى جاي عانا پەپە دەيدى ەكەن. ءىزىن باسقان تابارە ۆاسكەس تە پەپەنىڭ جولىن قۋىپ، ەلدى گۇلدەندىرە تۇسەدى دەپ سەنەدى ۋرۋگۆاي حالقى. ەۋرونيۋسقا سۇحبات بەرگەن جەرگىلىكتى تۇرعىننىڭ ءبىرى بىلاي دەيدى: 
"بۇل ەكەۋىنە دەيىنگى پرەزيدەنتتەر ەلدى قيىن جاعدايعا تىرەپ، بىت-شىتىن شىعاردى. حالىق اش بولاتىن. بارلىعى جۇمىسسىز قالدى. مىنە، نەبارى 15, ءتىپتى 10 جىلدا وسى ەكى باسشى كەلىپ الدىڭعىلارىنىڭ بارلىعى ىستەي الماعان يگىلىكتى ىستەردى جاسادى. پەپە مەن تابارە - كەرەمەت جاندار!".
پارتيزاندىق قوزعالىستىڭ بۇرىنعى مۇشەسى مۋحيكا پرەزيدەنت بولعان سوڭ دا كۇندەلىكتى ءومىر سالتىن وزگەرتپەگەن. قاراپايىم كيىنىپ، 1987 جىلى شىققان ەسكى "فولكسۆاگەن قوڭىز" ماشيناسىمەن جۇرگەن. ءتىپتى پرەزيدەنت سارايىندا دا تۇرماي، ءوزىنىڭ ەسكى فەرماسىندا عۇمىر كەشىپتى. ال جۋرناليستەردىڭ سۇراعىنا: "مەن كەدەي ەمەسپىن، تەك ومىرگە شىنايى كوزقاراسپەن قارايمىن. مەندە ءبارى بار، بايلىق پەن دۇنيەگە ەركىندىگىمدى ۇرلاتپاي، ءومىر جولىمدا جەڭىل قىدىرىستاعىم كەلەدى", -دەپ جاۋاپ قاتىپتى. قانداي كەرەمەت كىسى! قازاق بيلىگىنىڭ باسى-قاسىندا جۇرگەن بەيباقتاردان وسىنداي ەرلىك ىستەگەن بىرەۋدى كورىپ پە ەدىڭىز؟ دۇنيە قۋعان بەيشارالار بيلىك پەن مانساپ، اقشا مەن اتاق ءۇشىن ادام ءولتىرىپ، قىلمىستىڭ نەشە اتاسىن جاساپ، قاشىپ-پىشىپ، ار-ۇجدانى مازا بەرمەي جۇيكەسى جۇقارىپ ولەدى. وسىنى پەپە جاقسى تۇسىنگەن. ءبىزدىڭ دە كوڭىلىمىزدە ءجۇرۋى ءتيىس ونەگە ەكەن...

داۋرەن ءابدىرامانوۆ

(جازبا اۆتوردىڭ facebookتەگى پاراقشاسىنان الىندى)