3 ساۋىردە سانكت-پەتەربۋرگ مەتروسىنداعى جارىلىستان 11 ادام قازا تاپتى. بۇل مالىمەتتى ۇلتتىق تەرروريزمگە قارسى كۇرەس كوميتەتى تاراتتى. 45 ادام زارداپ شەككەن. تەرگەۋ كوميتەتى قىلمىستىق ءىس قوزعادى.

اق ءۇي پەتەربۋرگتەگى شابۋىلدى سىناپ، رەسەيگە كوڭىل ايتتى. بۇعان دەيىن اقش پرەزيدەنتى دونالد ترامپ مەتروداعى جارىلىستى "جان تۇرشىگەرلىك" دەپ سيپاتتاعان ەدى. باتىس ەلدەرى مەن ساياسي قايتاركەرلەر رەسەيگە كوڭىل ايتتى.

پەتەربۋرگ مەتروسىنداعى جارىلىس تۇسكى ساعات ءۇش شاماسىندا "تەحنولوگيچەسكي ينستيتۋت" جانە "سەننايا پلوششاد" ستانتسيالارى اراسىندا كەلە جاتقان پويىز ۆاگوندارىنىڭ بىرىندە تىركەلدى. كەيىن "پلوششاد ۆوسستانيا" ستانتسياسىندا تاعى ءبىر جارىلعىش زات تابىلىپ، زالالسىزداندىرىلدى. بۇل ۋاقىتتا رەسەي پرەزيدەنتى ۆلاديمير پۋتين پەتەربۋرگ شەتىندە بەلارۋس پرەزيدەنتى الەكساندر لۋكاشەنكومەن كەلىسسوزدەر جۇرگىزىپ جۇرگەن.

4 ساۋىردە سانكت-پەتەربۋرگتە ءۇش كۇندىك ازا تۇتۋ جاريالاندى. بۇگىن الەۋمەتتىك جەلىلەردە تەراكتىنى جاساعان ازاماتتىڭ قازاق بولۋى مۇمكىن ەكەنى جايلى جازبالار جاريالانا باستادى.

قازاقستان سىرتقى ىستەر مينيسترلىگى سانكت-پەتەربۋرگ مەتروسىنداعى جارىلىسقا قازاقستاندىق ستۋدەنت ماكسيم ارىشەۆتى قاتىسى بار دەۋگە ءالى ەرتە دەپ مالىمدەدى. مينيسترلىكتىڭ ءباسپاسوز قىزمەتىنىڭ جەتەكشىسى ءانۋار جايناقوۆ بۇگىن تاڭەرتەڭگى مالىمەت بويىنشا، اتى-ءجونى انىقتالعان جارىلىس قۇرباندارى اراسىندا ارىشەۆتىڭ جوعىن ايتادى.

ال، كەيبىر بەلسەندىلەر "رەسەي ميتينگىلەردىڭ الدىن-الۋ ءۇشىن لانكەستىك ارەكەتتى وزدەرى ۇيىمداستىردى" دەگەندى ايتادى.

اباي-اقپارات