قر مادەنيەت جانە سپورت ءمينيسترى ارىستانبەك مۇحامەديۇلى تۇركىتىلدەس مەملەكەتتەردىڭ ىنتىماقتاستىق كەڭەسىءنىڭ باس حاتشىسى راميل گاسانوۆپەن كەزدەستى. كەزدەسۋدە سپورت جانە تۋريزم سالاسىنداعى ماسەلەلەر تالقىلاندى.

كەزدەسۋ بارىسىندا تاراپتار ىنتىماقتاستىققا بايلانىستى  ماسەلەلەر بويىنشا جان-جاقتى پىكىر الماسىپ، تۋريزم، مادەنيەت جانە سپورت سالاسىنداعى كوپتەگەن سۇراقتاردى تالقىلادى.

تۇركىتىلدەس مەملەكەتتەردىڭ ىنتىماقتاستىق كەڭەسى شەڭبەرىندە وتكىزىلەتىن شارالارعا توقتالعان راميل گاسانوۆ سوڭعى ەكى جىلدا تۋريزم سالاسىنداعى بايلانىستاردىڭ كەڭەيگەندىگىن اتاپ ءوتتى.

ونىڭ پىكىرىنشە، ۇلى جىبەك جولىن تارتىمدى تۋريستىك باعىتقا اينالدىرۋ ءۇشىن تۇركىتىلدەس مەملەكەتتەردىڭ ءوزارا كۇش-جىگەرى قاجەت. «زاماناۋي ۇلى جىبەك جولى» اتتى تۇرىك كەڭەسىنىڭ تۋريستىك ءونىمى وسى سالا ىنتىماقتاستىعىنداعى كۇن ءتارتىبىنىڭ ماڭىزدى ءبولىمى بولىپ تابىلادى.

اڭگىمە بارىسىندا، تۇركىتىلدەس مەملەكەتتەردىڭ مادەنيەت، ءتىل مەن تاريح ورتاقتىعىنىڭ ارقاسىندا، تۇرىك كەڭەسى ايماقتىق ءوزارا بايلانىستىڭ بىرەگەي ۇلگىسىنە اينالعاندىعى اتاپ ءوتىلدى. مىسالى، تاريح سالاسىنداعى ناقتى ناتيجە XV عاسىرعا دەيىنگى تۇركىتىلدەس حالىقتاردىڭ تاريحىنا ارنالعان جالپى تۇرىك تاريحى وقۋلىعىن ازىرلەۋ بولىپ تابىلادى. جاستار مەن سپورت تاقىرىبى دا ىنتىماقتاستىقتىڭ ماڭىزدى سالاسى بولىپ وتىر. وسىنداي ءوزارا ءتيىمدى جۇمىس قورىتىندىسى – قىرعىزستان رەسپۋبليكاسىندا وتكىزىلگەن دۇنيەجۇزىلىك كوشپەندىلەر ويىنى.

تۇركىتىلدەس مەملەكەتتەردىڭ ىنتىماقتاستىق كەڭەسىنىڭ باس حاتشىسى راميل گاسانوۆ تۇرىك كەڭەسى قىزمەتىنىڭ قورىتىندىلارى مەن الداعى جۇمىستار تۋرالى ايتىپ ءوتتى. ول قازاقستاندىق ارىپتەستەرىنە تۇركىتىلدەس مەملەكەتتەر ىنتىماقتاستىعىن دامىتۋعا قوسىپ جاتقان ۇلەستەرى ءۇشىن العىس ءبىلدىردى.

ارىستانبەك مۇحامەديۇلى قازاقستان تۇرىك كەڭەسىنىڭ جان-جاقتى دامۋى مەن نىعايۋىنا نيەتتى ەكەندىگىن، قازاقستاندىق تاراپتىڭ ونىڭ قىزمەتىنە قاجەتتى كومەكتى كورسەتۋگە دايىن ەكەندىگىن اتاپ ءوتتى.  ءتيىستى ايماقتىق جانە حالىقارالىق ۇيىمدارمەن تىعىز ارىپتەستىك قاتىناستى ورناتۋ ارقاسىندا تۇرىك كەڭەسى  تۇركىتىلدەس مەملەكەتتەردىڭ تۇراقتىلىعى مەن دامۋىنا ءوز ۇلەسىن قوسۋدا.

ەستەرىڭىزگە سالاساق، 2009 جىلعى 3 قازاندا ناحچىۆان قالاسىندا (ازەربايجان رەسپۋبليكاسى) وتكەن تۇركىتىلدەس مەملەكەتتەر باسشىلارىنىڭ 9-شى سامميتىندە قر پرەزيدەنتى ن.ءا.نازارباەۆتىڭ باستاماسىمەن تۇركىتىلدەس مەملەكەتتەر ىنتىماقتاستىعى كەڭەسىن قۇرۋ تۋرالى كەلىسىمگە قول قويىلدى.

اتالمىش كەلىسىمنىڭ قابىلدانۋى تۇركى حالىقتارىنىڭ بىرلىگىن نىعايتۋدى كوزدەگەن ايماقتىق ەلارالىق بىرلەستىكتى قۇرۋعا نەگىز قالادى.

تۇركى كەڭەسىنىڭ مۇشە-مەملەكەتتەرى ازەربايجان، قازاقستان، قىرعىزستان جانە تۇركيا بولىپ تابىلادى. تۇركى كەڭەسىنىڭ حاتشىلىعى قۇرىلىپ، وعان كەڭەستىڭ سامميتتەرى بارىسىندا قابىلدانعان شەشىمدەردىڭ ورىندالۋ بارىسىن زەردەلەۋ، جوعارى دەڭگەيدەگى كەزدەسۋلەر مەن ساراپشىلار وتىرىستارىن دايىنداۋ جانە باسقا مىندەتتەر جۇكتەلدى.

اباي-اقپارات