قىزىلاعاشقا قىس قايعى
كوكتەمدە قارا جامىلعان قىزىلاعاش اۋىلى ەندى قىستى قالتىراي كۇتىپ وتىرعان جايى بار. سۋ تاسقىنىنان كەيىن ۇكىمەتتىڭ قايتا سالىپ بەرگەن جاڭا ۇيلەرىنىڭ قابىرعاسى شىتىناپ، توبەسىنەن سۋ سورعالاپ، كۇزدىڭ قارا سۋىعىندا ونسىزدا قامكوڭىل اعايىندى سارى ۋايىمعا سالىپ تۇر. قىر استىنداعى قىسقا قورقا قاراپ، كىمگە مۇڭ شاعارىن بىلمەي جىلارمان كۇي كەشكەن قايران قىزىلاعاش تۇرعىندارى قاقاعان قىستا قايتىپ كۇن كورەر ەكەن؟
كوكتەمدە قارا جامىلعان قىزىلاعاش اۋىلى ەندى قىستى قالتىراي كۇتىپ وتىرعان جايى بار. سۋ تاسقىنىنان كەيىن ۇكىمەتتىڭ قايتا سالىپ بەرگەن جاڭا ۇيلەرىنىڭ قابىرعاسى شىتىناپ، توبەسىنەن سۋ سورعالاپ، كۇزدىڭ قارا سۋىعىندا ونسىزدا قامكوڭىل اعايىندى سارى ۋايىمعا سالىپ تۇر. قىر استىنداعى قىسقا قورقا قاراپ، كىمگە مۇڭ شاعارىن بىلمەي جىلارمان كۇي كەشكەن قايران قىزىلاعاش تۇرعىندارى قاقاعان قىستا قايتىپ كۇن كورەر ەكەن؟
قىزىلاعاش قارا جامىلعاندا الاش جۇرتى ءبىر اتانىڭ بالاسىنداي بىرلىك تانىتىپ، اۋزىنداعىسىن جىرىپ وتىرىپ جىلۋ جيناپ بەرگەن ەدى. ۇكىمەتتە اقشا ءبولدى. سودان نە كەرەك، قىزىلاعاشقا جاڭا ءۇي سالۋعا قىرىق شاقتى كومپانيا قاتىسىپتى. ىلدىم-جىلدىم ءۇي سالعان قۇرىلىس كومپانيالارىنىڭ باسى قاسىندا وبلىستىڭ قۇرىلىس باسقارماسىنىڭ شەنەۋنىكتەرى دە جۇرگەنىن بىلەمىز. ەندى، مىنە، كەرەمەت دەپ بەرگەن ۇيلەرىنىڭ كەتەۋى كەتىپ جاتىر. اڭقىلداعان اۋىل تۇرعىندارىنا ءۇيدى تەكسەرىپ وتكىزىپ الدىق دەپ قول قويدىرىپ العان كومپانيالار بۇگىندە ۇشتى-كۇيلى جوق. ال، وبلىستىڭ قۇرىلىس باسقارماسىنىڭ شەنەۋنىكتەرى قىزىلاعاشتىڭ ۇيلەرىنىڭ توبەسىنەن سۋ اعىپ، قابىرعالارى جارىلىپ تۇر دەگەندى ەستىگەن، كورگەن جوقپىز دەپ وتىرعان كورىنەدى. ءىستىڭ ءبىتىپ، قۋدىڭ قاشىپ كەتكەنى وسى بولار. كەز كەلگەن قۇرىلىستىڭ سىرتىن جارقىراتىپ، ءىشىن قالتىراتىپ بەرىپ تايىپ وتىرۋ، ودان كەيىن ايتقانىنان تايقىپ شىعۋ بيلىك پەن قاپتاعان قۇرىلىس كومپانيالارىنىڭ سۇيەككە ءسىڭدى ادەتى مە؟ قايران، قازاق تاعى دا شيتتەي قارادومالاقتارىن باۋىرىنا قىسىپ، قارا سيىرىنا قاراپ، تاعدىرىمەن بەتپە-بەت قالدى. ال، حالىقتى زار يلەتىپ، الداپ كەتپەسە ىشىنە اس باتپايتىن قۇرىلىس كومپانيالارى، وبلىستىق شەنەۋنىكتەردىڭ ەسەبى تۇگەل. التاي قىس بولسا دا مۇرتتارىن بالتا شاپپايدى. قازاق توڭىپ سەكىرسە، شەنەۋنىك تويىپ سەكىرەتىن زامان بولدى عوي.
كىم كىنالى؟ كىم جازىقتى؟
«اباي-اقپارات»
