قوستاناي وبلىسىنا جۇمىس ساپارى اياسىندا قر پرەمەر-ءمينيسترى جاستار ۇيىمدارىنىڭ كوشباسشىلارىمەن جانە ءوڭىردىڭ ستۋدەنتتەرىمەن كەزدەسىپ، ولارمەن باسەكەگە قابىلەتتىلىكتى ارتتىرۋ جانە ەلىمىزدە زاماناۋي ءبىلىم بەرۋ جۇيەسىن قۇرۋ ماسەلەلەرىن تالقىلادى.

باقىتجان ساعىنتاەۆ قۇزىرەتتىلىك جاڭا ەكونوميكانى قالىپتاستىرۋدىڭ باستى فاكتورىنا اينالاتىنىن، سول سەبەپتى كاسىبي ماماندار بازالىق سالالاردى دامىتۋ، سونىمەن قاتار ەلىمىزدە بەلسەندى دامىپ كەلە جاتقان قىزمەت كورسەتۋ سالالارىنا دا قاجەت ەكەنىن اتاپ ءوتتى. مەملەكەت كاسىپتىك ءبىلىم بەرۋ سالاسىنا كەشەندى قولداۋ كورسەتىپ كەلەدى.

اعىمداعى جىلى «بارشاعا ارنالعان تەگىن كاسىپتىك-تەحنيكالىق ءبىلىم بەرۋ» جوباسى ىسكە قوسىلادى. سونىمەن قاتار، ۇكىمەت ءونىمدى جۇمىسپەن قامتۋ جانە جاپپاي كاسىپكەرلىك، جاستار ءىس-تاجىريبەسى، «سەرپىن» جانە باسقا باعدارلامالار ارقىلى بارلىق وقۋعا نيەتتى ادامدارعا كەڭىنەن قولداۋ كورسەتىپ كەلەدى. جۇمىس بەرۋشىلەردىڭ تالاپتارى مەن جاستاردىڭ سۇرانىستارىنا جاۋاپ بەرەتىن ماماندىق الۋدىڭ يكەمدى جۇيەسى قالىپتاستىرىلۋدا.

كەزدەسۋ اياسىندا «بالالار مەن جاستار ۇيىمدارى قاۋىمداستىعى» زتب توراعاسى ت.انتونينوۆا «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى ەلباسى جولداۋى بويىنشا اقپاراتتىق-ءتۇسىندىرۋ جۇمىستارى تۋرالى ايتتى، قوستاناي مەملەكەتتىك پەداگوگيكالىق ينستيتۋتىنىڭ ستۋدەنتى ە.جاقسىباەۆ «تۋعان جەر» باعدارلاماسى اياسىندا «ۇلى دالا» ءموبيلدى قوسىمشاسىن تانىستىردى، جاستار كوشباسشىسى ز.كوكجانوۆا جاستار كاسىپكەرلىگىن دامىتۋ ماسەلەلەرىنە توقتالدى، قوستاناي مەملەكەتتىك پەداگوگيكالىق ينستيتۋتىنىڭ ستۋدەنتى ت.سيتنيكوۆا قازاق ءتىلىنىڭ لاتىن ارپىنە كوشۋىنىڭ ارتىقشىلىقتارى تۋرالى ايتتى، جاستار كوشباسشىسى م.مۇحتاروۆا مۇمكىندىگى شەكتەۋلى ادامدارعا قولداۋ كورسەتۋ تاقىرىبىندا بايانداما جاسادى، قوستاناي قۇرىلىس كوللەدجىنىڭ ستۋدەنتى ۆ.پيناەۆا تەحنيكالىق ءبىلىم بەرۋ مۇمكىندىكتەرى تۋرالى اڭگىمەلەدى، قوستاناي مەملەكەتتىك پەداگوگيكالىق ينستيتۋتىنىڭ ستۋدەنتى ءا.الىباەۆا جاستاردى «نۇرلى جەر» باعدارلاماسى بويىنشا تۇرعىن ۇيگە ۇمىتكەر تۇلعالاردىڭ ساناتىنا جاتقىزۋ تۋرالى ماسەلەنى كوتەردى.

مامانداردى وقىتۋدا جاڭا تاسىلدەردىڭ قولدانىلۋىنىڭ جانە «بارشاعا ارنالعان تەگىن كاسىپتىك-تەحنيكالىق ءبىلىم بەرۋ» باعدارلاماسىنىڭ جۇزەگە اسىرىلۋ بارىسىنىڭ مىسالى رەتىندە باقىتجان ساعىنتاەۆقا قوستاناي اۆتوموبيل كولىگى كوللەدجىنىڭ قىزمەتى تانىستىرىلدى.

قر پرەمەر-مينيسترىنە تەگىن كاسىپتىك-تەحنيكالىق ءبىلىم بەرۋ اياسىندا كوللەدج بيىل 315 ادامدى وقۋعا قابىلدايتىنى تۋرالى ايتىلدى، ونىڭ ىشىندە 100 ادام ءونىمدى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسى اياسىندا قابىلدانادى. كاسىپتىك دايارلاۋ 7 ماماندىق جانە 10 بىلىكتىلىك بويىنشا جۇرگىزىلەدى. سونىمەن قاتار، 2017 جىلدىڭ 10 ساۋىرىنەن باستاپ كوللەدجدە قىسقا مەرزىمدى كاسىپتىك كۋرستار باستالعان، وندا 4 ماماندىق بويىنشا 196 ادام قامتىلعان.

ەسكە سالايىق، مەملەكەت باسشىسىنىڭ قازاقستاننىڭ ءۇشىنشى جاڭعىرۋى جولداۋىندا ادامزات كاپيتالىن دامىتۋ ەكونوميكالىق ءوسىمنىڭ جاڭا مودەلىن قالىپتاستىرۋدا باسىمدىقتاردىڭ ءبىرى رەتىندە اتالعان. وسى جۇمىس اياسىندا ۇكىمەت الدىندا ءبىلىم بەرۋدى ونىڭ نەگىزگى بۋىنىنا اينالدىرۋ مىندەتى تۇر. وسى ماقساتتا قازىر قولجەتىمدى جانە ساپالى ءبىلىم بەرۋدى دامىتۋ بويىنشا كەشەندى جۇمىستار اتقارىلۋدا.

اباي-اقپارات