رۋحاني جاڭعىرۋ ايى – رامازان قۇتتى بولسىن!
اسا قامقور، ەرەكشە مەيىرىمدى اللانىڭ اتىمەن باستايمىن!
2017 جىلدىڭ 27-مامىرى – قاسيەتتى
رامازان ايىنىڭ ءبىرىنشى كۇنى!
قۇرمەتتى مۇسىلمان باۋىرلار، وتانداستار!
بارشامىزدى قاسيەتتى رامازان ايىنا امان-ەسەن جەتكىزگەن اللا تاعالاعا سانسىز شۇكىرلەر بولسىن. سىزدەردى كۇللى مۇسىلمان قاۋىمى اسىعا كۇتكەن مۇباراك رامازان ايىنىڭ كەلۋىمەن قۇتتىقتايمىن!
رامازان – ون ەكى ايدىڭ سۇلتانى، بەرەكەلى دە كەشىرىمى مول اي. قاسيەتتى ايدا ادام بالاسى كوبىرەك جاقسىلىق جاساپ، ىزگى امالداردى اتقارۋعا تىرىسادى. ورازا پەندەنى تاقۋالىققا تاربيەلەيدى.
رامازان – اللانىڭ مەيىرىمى توگىلىپ، جۇماقتىڭ ەسىگى ايقارا اشىلاتىن، يماندى كۇشەيتۋگە مۇمكىندىك بەرىلگەن بەرەكەلى اي. بۇل – جاراتۋشى يەمىزدىڭ ۇلى سىيى ءارى نىعمەتى.
ساۋاپتار ەسەلەنىپ جازىلاتىن ايدا جاسالعان قايىرلى ءىستىڭ قايتارىمى ادام بالاسى ءۇشىن قۇپيا-سىر. ءتىپتى، اۋىز بەكىتۋشىگە بەرىلەتىن سىي مەن ساۋاپ، قۇرمەت پەن ماراپات پايعامبارلار مەن پەرىشتەلەرگە دە بەلگىسىز.
قۇدسي حاديستە اللا تاعالا: «ورازا – تەك مەن ءۇشىن. ونىڭ سىيىن (ساۋابىن) ءوزىم عانا بەرەمىن...» – دەپ ورازانىڭ قادىرى مەن قاسيەتىن، ءمانى مەن ماڭىزىن بايانداعان.
شاراپاتى مەن شاپاعاتى مول ايدا ساۋاپ جيناۋعا، ىشكى دۇنيەمىزدى تازارتۋعا، جاراتۋشىنىڭ رازىلىعىنا بولەنۋگە اسىعايىق، اعايىن! ويتكەنى، مۇسىلماننىڭ وسى ايدا ۇستاعان ورازاسى، قوسىمشا قۇلشىلىقتارى، جاساعان قايىرىمدىلىعى، بارلىق ساۋاپتى امالدارى ەسەلەنىپ جازىلادى. ورازانى رۋحاني تۇرعىدان سەزىنگەن جان اللانىڭ تەڭدەسسىز سىيىنان شەت قالعىسى كەلمەيتىنى سوندىقتان.
ورازا – كۇندىز ءىشىپ-جەۋدەن ءوزىن شەكتەۋ دەگەن ءسوز ەمەس. رامازان – رۋحتىڭ ازىعى، ءتاننىڭ شيپاسى. ورازا جان مەن ءتاندى رۋحاني تازارتاتىن ۇلكەن سابىر مەكتەبى. اۋزى بەرىك جاندار ادەپ بىلمەس پەندەلەردىڭ وزىنە جاساعان كەيبىر وعاش ءىس-ارەكەتتەرىن كورىپ، تۇرپايى سوزدەرىن ەستىسە دە: «مەن ورازامىن»، – دەگەن ءبىر اۋىز سوزبەن ناپسىسىنە توقتاۋ سالىپ، سابىر ساقتايدى. ال سابىر يەسىنە بەرىلەتىن سىي – ءجاننات.
دەنساۋلىعىنا بايلانىستى نەمەسە كارىلىك جەتىپ ورازا ۇستاۋعا شاماسى جەتپەگەن ادامدار اۋىز بەكىتكەن كىسىلەرگە اۋىزاشار بەرسە، ول دا – ۇلكەن ساۋاپ. پايعامبارىمىز مۇحاممەد (وعان اللانىڭ سالاۋاتى مەن سالەمى بولسىن): «اللا تاعالا ەڭ بولماسا ءبىر ءتۇيىر قۇرما، ءتىپتى ءبىر ۇرتتام سۋمەن بولسا دا قامقورلىق جاساعانعا ساۋاپ جازادى…» – دەگەن.
قادىرلى جاماعات!
ەلباسى نۇرسۇلتان نازارباەۆ «بولاشاققا باعدار: رۋحاني جاڭعىرۋ» اتتى ماقالاسىندا حالقىمىزدى ۇلتتىق قۇندىلىقتاردى قۇرمەتتەۋگە، تۋعان جەردى كوركەيتۋگە، جاڭاشىل ويلاپ، قوعام ءۇشىن يگى ءىس جاساۋعا، ءون-بويىمىزداعى رۋحاني قۇندىلىقتى جاڭعىرتۋعا ۇندەدى. ەلىمىزدى رۋحاني جاڭعىرۋعا باستاعان ماقالا جۇرتىمىزعا پاراساتتى وي، پايىمدى پىكىر تاستادى. ال رامازان – رۋحاني جاڭعىرۋىمىزعا سەپتىگىن تيگىزىپ، يمانىمىزدى كۇشەيتۋگە مۇمكىندىك تۋعىزاتىن قادىرى مەن قاسيەتى مول اي.
ەندەشە، راقىم ايى – رامازان قۇتتى بولسىن! ۇستاعان ورازامىز، جاساعان دۇعا-تىلەكتەرىمىز، قۇلشىلىق-عيباداتتارىمىز، ءاربىر قايىرلى امالدارىمىز قابىل بولعاي! اللا تاعالا وتباسىمىزعا اماندىق، جۇمىسىمىزعا بەرەكە-بىرلىك ءناسىپ ەتكەي!
تاۋەلسىزدىگىمىز باياندى، ەلىمىز امان، جۇرتىمىز تىنىش بولعاي! جاراتۋشى يەمىز بارشامىزدى ورازادان ورازاعا دەيىن ايدان امان، جىلدان ەسەن جاقسىلىقپەن جەتكىزە بەرسىن دەپ تىلەيمىن! ءاۋمين!
قازاقستان مۇسىلماندارى ءدىني باسقارماسىنىڭ توراعاسى،
باس ءمۇفتي ەرجان قاجى مالعاجىۇلىنىڭ
قاسيەتتى رامازان ايىنا بايلانىستى حالىققا
ۇندەۋى
اسا قامقور، ەرەكشە مەيىرىمدى اللانىڭ اتىمەن باستايمىن!
قۇرمەتتى وتانداستار!
بارشاڭىزعا قاسيەتتى رامازان ايىنىڭ قارساڭىندا جىل سايىنعى ءداستۇرلى ۇندەۋىمدى جولدايمىن!
وزدەرىڭىزگە بەلگىلى، ەلىمىزدىڭ اقتوبە، اقمولا، سولتۇستىك قازاقستان وبلىستارىنداعى وتانداستارىمىز ايتىپ كەلمەيتىن تابيعي سۋ تاسقىنىنان ەداۋىر زارداپ شەكتى. قانشاما باۋىرلارىمىزدىڭ ءۇيى سۋ استىندا قالىپ، ماتەريالدىق شىعىنعا ۇشىرادى. وسىعان وراي، جومارت جاندار مەن قايىرىمدى كاسىپكەرلەر تابيعي اپاتتان ءۇي-كۇيسىز شاراسىز قالعان تۇرعىندارعا قولداۋ كورسەتىپ، كومەگىن اياماۋدا.
قازاقستان مۇسىلماندارى ءدىني باسقارماسى دا جاناشىر جاماعاتتىڭ دەمەۋشىلىگىمەن «قايىرىمدىلىق كەرۋەنى» اكتسياسى اياسىندا كيىم-كەشەك، ازىق-تۇلىك، تۇرمىسقا قاجەتتى بۇيىمدار جەتكىزدى. كاسىپكەر ازاماتتاردى وسى باعىتتاعى قايىرىمدىلىق جۇمىستارعا بەلسەنە اتسالىسۋعا شاقىرامىن.
قادىرلى باۋىرلار!
اسىل ءدىنىمىز يسلامدا «ساداقا جاريا» دەگەن قاسيەتتى ۇعىم بار. قوعامنىڭ، حالىقتىڭ يگىلىگى ءۇشىن جاسالعان ساۋاپتى ىستەردى، اتاپ ايتقاندا، مەشىت-مەدرەسە، اۋرۋحانا، بالا-باقشا، سپورت كەشەندەرىن تۇرعىزۋ، كوشە، كوپىر سالۋ، اۋىزسۋى جوق اۋىلدارعا سۋ تارتىپ، قۇدىق قازدىرتۋ، ت.ب يگى امالداردى «ساداقا جاريا» دەپ اتايمىز. مىنە، بۇل ىزگى ءىس-شارالار حالىقتىڭ يگىلىگى ءۇشىن جاسالعان ساۋاپتى امالدار. قازاقستان مۇسىلماندارى ءدىني باسقارماسى وبلىستاردا «قايىرىمدىلىق مەكەمەسىن» اشىپ، جەرگىلىكتى جاس بۋىنعا ءدىني ءھام زايىرلى ءبىلىم بەرىپ، يماندىلىققا تاربيەلەۋمەن قاتار تۇرمىسى تومەن وتباسىلارىنا الەۋمەتتىك كومەك كورسەتۋدە.
مەتسەناتتار مەن كاسىپكەر ازاماتتاردى جالپى جۇرشىلىققا قاجەتتى نىسانداردى تۇرعىزۋ جۇمىسىنا بەلسەنە ارالاسىپ، جاناشىرلىق تانىتۋعا شاقىرامىن. ويتكەنى، رامازان – قايىرىمدى جاندار ءۇشىن مول مۇمكىندىكتەر ماۋسىمى. ورازادا جاسالعان ءاربىر قايىرلى ءىس – ۇلكەن ساۋاپ. بىردە پايعامبارىمىز مۇحاممەدتەن (وعان اللانىڭ سالاۋاتى مەن سالەمى بولسىن) ءبىر كىسى: «ۋا، اللانىڭ ەلشىسى، ەڭ جاقسى ادام كىم؟» – دەپ سۇراعاندا، ول: «ەڭ جاقسى ادام – قوعامعا، ەلگە پايداسى تيگەن پەندە», – دەپ جاۋاپ بەرگەن ەكەن.
جۋىردا ەلباسىمىز نۇرسۇلتان نازارباەۆ ەلىمىزدەگى باي-داۋلەتتى ازاماتتاردى جاعدايى تومەن تۇرعىندارعا كومەك كورسەتۋگە ۇندەدى. مەملەكەت باسشىسىنىڭ بۇل باستاماسىنا ءۇن قوسۋ بارشامىزدىڭ ازاماتتىق بورىشىمىزعا اينالۋى قاجەت دەپ ەسەپتەيمىن.
قۇرمەتتى قازاقستاندىقتار!
قوعامدا كىسى اقىسىن جەۋ، بالانى اياۋسىز ۇرۋ، پەدوفيليزم، نارەستەنى دالاعا تاستاۋ، ءوز-وزىنە قول جۇمساۋ، اجىراسۋ، كەيبىر ازاماتتار اراسىنداعى قاتىگەزدىك جاعدايلار، اراق-شاراپقا تاۋەلدىلىك، وتباسىنداعى كەلىسپەۋشىلىك، تەررورلىق وقيعالار سىندى جالپى ادامگەرشىلىك قۇندىلىقتارعا جات ارەكەتتەر كورىنىس تابۋدا. پەندەنى رۋحاني تۇرعىدان ازدىرىپ، ەلدىڭ تىنىشتىعىن بۇزىپ، قورشاعان ورتا مەن بۇكىل قوعامنىڭ تۇتاستىعىنا ۇلكەن زيانىن تيگىزەتىن مۇنداي جامان ارەكەتتەرگە جۇرت بولىپ جۇمىلىپ قارسى كۇرەسۋىمىز كەرەك. بۇگىنگىدەي بىرلىگىمىزدىڭ ارقاسىندا مۇنداي جاعىمسىز، جامان وقيعالاردىڭ جولىن كەسە الامىز.
ارداقتى اعايىن!
رامازان – مول ساۋاپ جينايتىن قاسيەتتى اي. ادام بالاسى ىزگى امالى ارقىلى جاراتۋشىنىڭ راقىمىنا، نىعمەتىنە كەنەلەدى. جومارت، جاناشىر ازاماتتاردى، كاسىپكەرلەردى كومەككە مۇقتاج ادامدارعا قامقورلىق كورسەتۋگە، تابيعي اپات سالدارىنان بۇزىلعان ۇيلەردى جوندەۋگە، جەتىم مەن جەسىرگە مەيىرىمدىلىك تانىتىپ، قاراۋسىز قالعان قارتتارعا كوڭىل بولۋگە شاقىرامىن.
زەكەت بەرۋ – جاعدايى كەلگەن (شاريعات بويىنشا نيساپ مولشەرىنە جەتكەن) مۇسىلمانعا پارىز. ال زەكەت بەرەكەلى رامازان ايىندا بەرىلسە، ونىڭ دا ساۋابى ەسەلەنىپ جازىلادى.
قاسيەتتى ايدىڭ قۇرمەتى ءۇشىن ازىق-تۇلىك، كوكونىس پەن تۇرمىستىق زاتتارعا جەڭىلدىك جاسالىپ، قۇدايى استار مەن ساداقالار اۋىزاشار ۋاقىتىندا ۇيىمداستىرىلسا، تويلار ىشىمدىكسىز وتكىزىلسە، جاماندىقتىڭ باستاۋى بولعان اراق-شاراپتىڭ ساتىلۋىنا بارىنشا جول بەرىلمەسە دەگەن تىلەگىمدى بىلدىرەمىن. وسىناۋ جاقسى امالدار رامازاننان كەيىنگى ايلاردا دا جالعاسىن تاپسا نۇر ۇستىنە نۇر.
ون ەكى ايدىڭ سۇلتانى بولعان قاسيەتتى رامازاندا جاساعان امالدارىمىز بەن ىزگى نيەتتەرىمىزدى اللا تاعالا قابىل ەتكەي! ەلىمىز امان، جۇرتىمىز تىنىش، تاۋەلسىز ەلىمىزدىڭ بولاشاعى جارقىن، ءاربىر يگى باستامالارىمىز باياندى بولعاي! ءاۋمين!
ەرجان قاجى مالعاجىۇلى، قازاقستان مۇسىلماندارى ءدىني باسقارماسىنىڭ توراعاسى، باس ءمۇفتي
Abai.kz
