اشىلۋ راسىمىنە وڭتۇستىك كورەيانىڭ قازاقستانداعى توتەنشە جانە وكىلەتتى ەلشىسى جانە اتالمىش پاۆيلوننىڭ كوميسسارى كيم دە شيك، كوترا ديرەكتورى كيم دجە حونگ جانە تاعى باسقا قوناقتار قاتىستى.

وسى ورايدا كيم دجە حونگ قازاقستاننىڭ اۋماعى پايدالى قازبا بايلىققا تولى بولسا دا، جاڭا ەنەرگەتيكا سالاسىن يگەرۋگە جاساعان قادامىن جوعارى باعالادى.

«ەكسپو-2017» حالىقارالىق كورمەسى تمد اۋماعىندا العاش رەت ۇيىمداستىرىلىپ وتىر. كورمەنىڭ تاقىرىبى دا ەرەكشە. قازاقستاننىڭ جەرى قازبا بايلىققا تولى. الايدا 2013 جىلى ەلباسى نۇرسۇلتان نازارباەۆ جاسىل تەحنولوگيالار سالاسىنا باسا ءمان بەرەتىندىگىن مالىمدەدى. بۇل قادام وتە ماڭىزدى. سەبەبى، ءبىز مۇنايدىڭ ەنەرگيا كوزى رەتىندەگى ءرولى ازايعان داۋىردە ءومىر ءسۇرىپ جاتىرمىز. بىزگە بالامالى ەنەرگيانىڭ جاڭا كوزدەرىن تابۋ وتە وزەكتى. مەن «ەكسپو-2017» كورمەسىنىڭ «بولاشاق ەنەرگياسى» تاقىرىبىندا ءوتۋى ورىندى دەپ ويلايمىن»، - دەدى ول.

وڭتۇستىك كورەيا «ەكسپو» كورمەسىنە 19-رەت قاتىسىپ وتىر. پاۆيلوننىڭ اۋماعى – 1 804 شارشى مەتر. بۇل كورمەدەگى ەڭ ۇلكەن پاۆيلوننىڭ قاتارىنا كىرەدى. پاۆيلون تاقىرىبى – «بولاشاق ەنەرگياسى. اقىلدى ءومىر». كورەيا رەسپۋبليكاسى الەمنىڭ 115 مەملەكەتى قاتىسىپ جاتقان ماڭىزدى شاراعا تەك ۇزدىك جوبالارىن الىپ كەلگەن.

«ءبىزدىڭ پاۆيلوندا سىزدەر جاڭا ەنەرگيا كوزدەرىنە ساياحات جاساي الاسىزدار. سونداي-اق، ءبىز كۇن، جەل ەنەرگەتيكاسى سالاسىندا سوڭعى ۇلگىدە جاسالعان جوبالارىمىزدى الىپ كەلدىك. مۇندا ەنەرگيا كوزدەرىن ءتيىمدى ساقتاۋ تەحنولوگياسى مەن ساندىق تەحنولوگيالار دا بار»، - دەدى ول.

جالپى پاۆيلون 2 قاباتتان تۇرادى. 1-ءشى قاباتتا كورمەنىڭ ماڭىزدى بولىگى ورنالاسقان. ال 2-ءشى قاباتتا كورەي مەيرامحاناسى، مۇراجاي-دۇكەن بار.

كورەيانىڭ پاۆيلونىنا كەلگەن قوناقتار، الدىمەن، وڭتۇستىككورەيالىق تانىمال سۋرەتشى كيم دجونگ گي تۋىندىسىمەن تانىستى. كەيىن كورەرمەندەرگە ەرەكشە انيماتسيالىق شوۋ ۇسىنىلدى. وندا تابيعاتتى قۇتقارۋدا جاڭا بالامالى قۋات كوزدەرىنىڭ ماڭىزدى ەكەندىگى كورسەتىلەدى. ساحنالانعان كورىنىستە استان ەسىمدى جاس جىگىت ارا اتتى قىزدىڭ كومەگىمەن جاڭا ەنەرگيانىڭ قورشاعان ورتا ءۇشىن وزەكتى ەكەنىن تۇسىنەدى. بۇل ەرەكشە قويىلىم كورەرمەندەردىڭ كوڭىلىنەن شىقتى.

كەلەسى زالدا قازاقستاندىقتار ەنەرگەتيكالىق ورمانعا كىردى. قوناقتارعا ارنايى پلانشەت بەرىلدى. ولار سول ارقىلى بولاشاق ەنەرگيا كوزدەرىنە ارنالعان ارنايى ويىندار ويناۋعا مۇمكىندىك الدى. سونداي-اق، بۇل زالدا سۋمەن جۇرەتىن ماشينا، ەنەرگيا كوزىنەن قۋات الاتىن ۇشاقتىڭ ماكەتى قويىلعان.