قانداستارىمىزدىڭ كوشى-قون ماسەلەسىنىڭ تۇيتكىلدى ءتۇيىنىن شەشۋ ءۇشىن جارعاق قۇلاعى جاستىققا تيمەي جۇرگەن قوعام قايراتكەرى، اقىن اۋىت مۇقيبەككە قر پرەزيدەنتى نۇرسۇلتان ءابىشۇلى نازارباەۆ ريزاشىلىعىن ءبىلدىرىپ، ارنايى سالەم جولداپتى. بۇل تۋرالى اقىننىڭ ءوزى Abai.kz اقپاراتتىق پورتالىنا حابارلاسىپ، ءسۇيىنشى سۇرادى.

كەشە قازاقستان رەسپۋبليكاسى پرەزيدەنت كەڭسەسىنىڭ باسشىسى ماحمۋت قاسىمبەكوۆتىڭ كومەكشىسى اۋىت مۇقيبەككە حابارلاسىپ، ەلباسى اقىننىڭ Abai.kz اقپاراتتىق پورتالىندا جاريالانعان «ەكسپوعا» كەلىڭدەر، قانداستارىم!» اتتى ولەڭىن وقىپ ريزا بولعانىن، اقىنعا ارنايى ءوز سالەمىن جەتكىزۋدى تاپسىرعانىن ايتقان.

بۇل – ەلباسىنىڭ اقىنعا جولداعان ءۇشىنشى رەتكى سالەمى ەكەن. مۇنىڭ الدىندا «"كەلسىن" دەگەن ءبىر اۋىز ءسوزىڭ ءۇشىن... جانە «سەن قازاقشا سويلەدىڭ!» اتتى ولەڭدەرى ءۇشىن دە ريزاشىلىعىن ءبىلدىرىپتى پرەزيدەنت ن. نازارباەۆ.

قوش!

بۇل – اۋىت مۇقيبەك ءۇشىن دە، ءبىزدىڭ پورتال ءۇشىن دە قۋانىشتى وقيعا. سەبەبى، قازاق مەملەكەتى بۇكىل الەمدى ەلورداسىنا شاقىرىپ، حالىقارالىق كورمە وتكىزىپ جاتقان تاريحي ساتتە شەتتەگى اعايىندى ۇمىت قالدىرماعانىمىز دۇرىس! كورمە قازاقستاندى دۇنيە جۇزىنە تانىتىپ قانا قويمايدى، شەتتەگى اعايىننىڭ ەڭسەسىنىڭ كوتەرىلۋىنە دە ءوز سەپتىگىن تيگىزەدى.

تاريحي وتانى بەس قۇرلىقتىڭ ءبۇيىرىن قىزدىرىپ جاتقاندا جۇرەگى قازاق دەپ لۇپىلدەيتىن ءار ازامات استاناعا اسىعارى ءسوزسىز. اقىن اۋىت مۇقيبەكتىڭ جىرى اتاجۇتقا الىپ-ۇشقان كوڭىلگە قانات، جۇرەككە قۋانىش ءبىتىرىپ، قانشاما قانداسىمىزدىڭ ەلىمىزگە كەلۋىنە ىقپال ەتەرىن ەلباسى تولىق تۇسىنگەن بولۋى كەرەك. تۇسىنگەندىكتەن دە ريزا بولىپ، ارنايى سالەم جولداپ وتىر دەپ ويلايمىز.

«بولدى ۇقساسا قازاققا شىن ەسىمىڭ،

پاتەر بىتكەن اشقالى تۇر ەسىگىن.

تىرشىلىكتىڭ بايلانباي كۇيبەڭىنە،

وزگەلەردەن بۇرىن كەل ءبىر-ەكى كۇن!

قالدى الىستا زاماندار جەلى باسىم،

ەل تانىعان سالتىڭ بار بەرىپ اسىن.

«ەكسپونىڭ» تارتىلعان كەرمەسىنە،

ءبىرىنشى بوپ بايلانسىن سەنىڭ اتىڭ!

بەرسىن ەسىل ماڭگىلىك تۇنىق اعا،

كۋا بولىپ سىمباتىڭ، سىرىڭا دا...

سەندەرمەنەن كورىكتى قازاقستان،

سەندەرمەنەن ايباتتى ۇلى دالا!» دەپ، تۇيىندەيدى اقىن ءوز ولەڭىن.

شىنىمەن دە تاۋەلسىز قازاقستاننىڭ ءار جەتىستىگى ەڭ الدىمەن، باسقا ەمەس، قازاق ءۇشىن قۋانىش! قازاق ءۇشىن مارتەبە!! قازاق ءۇشىن جەڭىس!!!

قازىر قازاقستان جازۋشىلار وداعىنىڭ ازۋىن ايعا بىلەگەن سەگىز جۇزدەن اسا مۇشەسى بار. وعان وداققا مۇشە ەمەس مىڭداعان اقىندى جانە قوسىڭىز. «ەكسپو-2017» كورمەسى سىندى الەمدىك دەڭگەيدەگى تاريحي ماڭىزى توتەنشە زور شارا وزگە ەمەس، ءوزىمىزدىڭ ءتول استانامىزدا ءوتىپ جاتقاندا سول قالامگەرلەردىڭ  بىرەۋىن دە شەتتەگى قانداستارىمىزدى ەلگە شاقىرۋدىڭ ءدال وسى ولەڭدەگىدەي ۇلگىسىن تابا العان جوق. اۋىت مۇقيبەك سەكىلدى اقىندىعىمەن ەلگە پايدالى ءىس جاساي العان كىمى بار سولاردىڭ بۇگىن؟ بۇل سۇراققا جاۋاپ بەرۋ ازىرگە قيىن.

اۋىت مۇقيبەك شەتتەگى قازاقتى ەلگە اكەلۋ جولىندا مىڭ ۇيىمنىڭ جاسايتىن ءىسىن جالعىز ءوزى اتقارىپ جۇرگەن تۇلعا. اتان تۇيەگە جۇك بولار اۋىر مىندەتتى قينالماي كوتەرىپ جۇرگەن اقىنعا باسقا ەمەس، ەلباسىنىڭ ءوزى ريزاشىلىعىن ءبىلدىرۋى اسقاق شابىت سىيلارى حاق.

ولەڭنىڭ ومىرشەڭدىگى سول، ءبىزدىڭ پورتالدا وسى ولەڭ جاريالانا سالىسىمەن ونى ەل ءىشى-سىرتىنداعى بۇكىل قازاق باسىلىمدارى كوشىرىپ باستى. ءسوزىمىز دالەلدى بولۋى ءۇشىن «ەكسپوعا» كەلىڭدەر، قانداستارىم!» جارىق كورگەن باستى باسىلىمداردىڭ ينتەرنەت الەمىنەن كوزىمىز شالعان ءبىر توپ سىلتەمەسىن ۇسىنا كەتۋدى ءجون ساناپ وتىرمىز.

http://abai.kz/  (قازاقستان رەسپۋبليكاسى);

https://baq.kz/ (قازاقستان رەسپۋبليكاسى);

https://egemen.kz/  (قازاقستان رەسپۋبليكاسى);

xalhar.net (قىتاي قازاقتارىنىڭ سايتى);

http://kyzyk.times. (قازاقستان رەسپۋبليكاسى);

http://arman-ako.com/ (قازاقستان رەسپۋبليكاسى);

http://www.abdulvahapkara.net/ (تۇركيا قازاقتارىنىڭ سايتى);

http://kaznews.mn/ (ماڭعوليا قازاقتارىنىڭ سايتى);

http://adebiportal.kz/kz/news/view/3272 (قازاقستان رەسپۋبليكاسى);

«Atatek» ءۇنحات تەكشەسى (قىتاي قازاقتارىنىڭ سايتى);

http://www.dalanews.kz/26005 (قازاقستان رەسپۋبليكاسى);

http://chyndyk.kg/ (قىرعىز رەسپۋليكاسىنىڭ سايتى);

http://argument.kg/ (قىرعىز رەسپۋليكاسىنىڭ سايتى);

http://qasym.kz/ (قازاقستان رەسپۋبليكاسى);

http://cbsorda.kz/ (قازاقستان رەسپۋبليكاسى);

http://www.akjolgazet.kz/ (قازاقستان رەسپۋبليكاسى) ;

https://www.facebook.com/...

سونىمەن، نۇرسۇلتان ءابىشۇلى بۇگىن ءبىزدىڭ پورتالىمىزدا جارىق كورگەن اقىننىڭ ولەڭىن وقىدى. ەرتەڭ ءار ماقالاسىن نازاردا ۇستايتىن بولادى. اۋىت مۇقيبەك ايتسا ەلدىڭ جايىن، شەتتەگى اعايىننىڭ مۇڭىن ايتادى. ول ماسەلەنىڭ ءبارىن پرەزيدەنت ءبىلىپ وتىرار بولسا، قازاققا ولجا ەمەس پە؟

قانات بىرلىكۇلى

Abai.kz