تالدىقورعان قالاسىندا «ايبىن» اسكەري-پاتريوتتىق جيىننىڭ جەڭىمپازدارىن سالتاناتتى تۇردە قارسى الدى

قازاقستان رەسپۋبليكاسى قارۋلى كۇشتەرىنىڭ 25 جىلدىعىنا ارنالعان «ايبىن» حالىقارالىق اسكەري-پاتريوتتىق جاستار جيىنىندا 1 ورىندى يەلەنگەن «جەتىسۋ تارلاندارى» كومانداسىن تالدىقورعان قالاسىنىڭ «جاستار» ساياباعىندا سالتاناتتى تۇردە  قارسى الدى.

الماتى وبلىسى قورعانىس ىستەرى جونىندەگى دەپارتامەنتى  قىزمەتكەرلەرى ۇيىمداستىرعان ۇلتتىق وركەستردىڭ اۋەنىمەن «جەتىسۋ تارلاندارى» كومانداسىنىڭ مۇشەلەرىن «جاستار» ساياباعىندا تۋعان-تۋىستارى، دوستارى مەن جاقىندارى سالتاناتتى تۇردە قارسى الدى.

«قازاقستان رەسپۋبليكاسىنىڭ قارۋلى كۇشتەردىڭ 25 جىلدىعىنا وراي ۇيىمداستىرىلعان «ايبىن» جاستار جيىنى وسى جىلى حالىقارالىق دارەجەدە ءوتتى.  جيىنعا 600 رەسپۋبليكالىق «جاس ۇلان» اسكەري مەكتەپتەرىنىڭ، وڭىرلەردەگى اسكەري-پاتريوتتىق كلۋب مۇشەلەرى مەن  رەسەي فەدەراتسياسىنىڭ  ورەنبۋرگپرەزيدەنت كادەت ۋچيليششەسىنىڭ تاربيەلەنۋشىلەرى قاتىستى.  ۇيىمداستىرىلعان جارىستار وڭاي بولمادى، الايدا قىزىقتى ءوتتى. فيزيكالىق كۇشتى، رۋحى  بيىك، بىلىكتى جاستاردان قۇرالعان ءبىزدىڭ كوماندا حالىقارالىق دەڭگەيدە وزدەرىن جوعارى دارەجەدە كورسەتە ءبىلدى. الداعى ۋاقىتتا ءبىز جوعارى جەتىستىكتەرگە جەتەتىنىمىزگە سەنەمىز»، - دەدى الماتى وبلىسى قورعانىس ىستەرى جونىندەگى دەپارتامەنتى باستىعىنىڭ تاربيە جانە يدەولوگيا جۇمىستار جونىندەگى ورىنباسارى قۋاندىق ادىلبەكوۆ.

ەسكەرتە كەتەيىك، قاراعاندى وبلىسىندا «ايبىن» حالىقارالىق اسكەري-پاتريوتتىق جاستار جيىنى ءوز مارەسىنە جەتكەن بولاتىن.  الماتى وبلىسىنىڭ اتىنان شىققان «جەتىسۋ تارلاندارى» كومانداسى 16 وڭىردەن شىققان اسكەري-پاتريوتتىق كلۋب اراسىنان جۇلدەلى 1 ورىندى يەلەندى. كوماندانىڭ ءار مۇشەسى ارنايى ديپلوممەن، مەدالمەن جانە باعالى سىيلىقپەن ماراپاتتالدى.

اباي-اقپارات