«نۇر وتان» پارتياسىنىڭ «اۋىل تۇرعىندارىن جۇمىسپەن قامتۋ» اتتى ارنايى جوباسى جۇزەگە اسۋدا. وسى رەتتە اتالعان پارتيا  وبلىستىق فيليالى توراعاسىنىڭ ءبىرىنشى ورىنباسارى عالياسقار سارىباەۆ كوكسۋ اۋدانىنىڭ بىرنەشە شارۋا قوجالىعىنا بارىپ، ونداعى مال بورداقىلاۋ الاڭدارىنىڭ جۇمىسىمەن تانىستى، - دەپ حابارلايدى وبلىستىق "جەتىسۋ" گازەتى.

عالياسقار تولەندىۇلى الدىمەن ەڭبەكشىقازاق اۋىلىندا ورنالاسقان «جانات» شارۋا قوجالىعىنا باردى. ۇجىم وتكەن جىلى «جۇمىسپەن قامتۋ جول كارتاسى – 2020» مەملەكەتتىك باعدارلاماسى ارقىلى جەكە شارۋا قوجالىق بولىپ تىركەلىپ، مال بورداقىلاۋعا 6 ملن. تەڭگە نەسيە العان. قازىردە 28 باس ءىرى قارا بورداقىلاۋ الاڭىندا باعىلۋدا. بۇل تۋرالى كەزدەسۋدە اتالمىش قوجالىق باسشىسى اسحات قاپشاعاەۆ ايتىپ،  پارتيالىقتارعا ءوز العىسىن جەتكىزدى.

– مەملەكەتتىك باعدارلامانىڭ كومەگى زور، وسىنداي قوماقتى قاراجات الۋىمىزعا پارتيالىقتاردىڭ اقىل-كەڭەسى سەبەپكەر بولدى. بۇگىندە ويعا العان شارۋامىز ىلگەرى باسۋدا، – دەيدى كاسىپكەر ازامات.

وسىعان وراي عالياسقار سارىباەۆ  تا مال بورداقىلاپ، ودان تابىس تابۋدىڭ وڭاي شارۋا ەمەس ەكەنىن تىلگە تيەك ەتىپ، شارۋالارعا «اۋىل تۇرعىندارىن جۇمىسپەن قامتۋ» اتتى پارتيالىق جوبانىڭ ماقساتىن تانىستىردى.

– جوبا اياسىندا وڭىرلەردە مال، ەگىن شارۋاشىلىعىمەن اينالىساتىن كاسىپكەرلەرگە قولداۋ كورسەتۋىمىزدىڭ باستى سەبەبى – اۋىلدىڭ ءال-اۋقاتىن كوتەرۋ، جاڭا جۇمىس ورىندارىن اشىپ، جاستاردى كاسىپ يگەرۋگە ۇمتىلدىرۋ، – دەيدى «نۇر وتان» پارتياسى  وبلىستىق فيليالى توراعاسىنىڭ ءبىرىنشى ورىنباسارى.

ءوز كەزەگىندە كوكسۋ اۋداندىق جۇمىسپەن قامتۋ ورتالىعىنىڭ ديرەكتورى جانار بايۇزاقوۆا اتالمىش پارتيالىق جوبا اياسىندا اۋداندا 29 ازامات نەسيە العانىن، كاسىپكەرلىك نەگىزدەرىنە وقىتۋعا 21 ادام جىبەرىلگەنىن اتاپ ءوتتى.

بۇدان سوڭ جۇمىس توبى كوكسۋ اۋدانى، بالپىق بي كەنتىندە تۇراتىن نۇركەلدى مازماقىننىڭ جەكە شارۋاشىلىعىنا ات باسىن بۇرىپ،  ونداعى شارۋاشىلىقتى كورىپ قايتتى.

قوزىباي قۇرمان

Abai.kz