2017 جىلعى 3 شىلدەدە قازاقستان رەسپۋبليكاسىنىڭ ۇلتتىق  مۇراجايىندا قر مەملەكەتتىك حاتشىسى گ.ابدىقالىقوۆا حالىقارالىق «ەكسپو-2017» مامانداندىرىلعان كورمەسىنە ورايلاستىرىلعان «شىعىس پەن باتىس: مەملەكەتتىك ەرميتاج قورىنان كونە قارۋ-جاراق» اتتى كورمەنىڭ سالتاناتتى اشىلۋىنا قاتىستى.  

وعان سونداي-اق مادەنيەت جانە سپورت ءمينيسترى ا.مۇحامەديۇلى، رف-نىڭ قر-داعى ەلشىسى م.ن.بوچارنيكوۆ، مەملەكەتتىك ورگانداردىڭ، ديپلوماتيالىق كورپۋستىڭ، ەتنومادەني بىرلەستىكتەردىڭ وكىلدەرى، ەكسپو-2017 كورمەسىنە كەلگەن شەتەلدىك قوناقتار، عىلىمي زيالى قاۋىم جانە باق وكىلدەرى قاتىستى.

ءىس-شارانى اشقان مەملەكەتتىك حاتشى گ.ابدىقالىقوۆا قارۋ-جاراق جاساۋ ونەرىنىڭ ەرميتاج قورىنان جيناقتالعان كورمەسى ەكسپو-2017 اياسىندا ۇيىمداستىرىلىپ وتىرعانىن ايتتى. حالىقارالىق مامانداندىرىلعان كورمە اياسىندا بارلىعى 6 مىڭنان استام ءىس-شارا وتەدى. بۇكىل دۇنيە جۇزىنە ايگىلى، الەمدە كورۋشىلەر ەڭ كوپ باراتىن 20 مۋزەيدىڭ ءبىرى بولىپ سانالاتىن ەرميتاجدىڭ كەلۋى – قازاقستان مەن رەسەي اراسىنداعى شىنايى دوستىق قارىم-قاتىناستىڭ ايعاعى.

ودان سوڭ گۇلشارا ابدىقالىقوۆا ادامزاتتىڭ بۇگىندە، ساراپشىلاردىڭ پىكىرىنشە، جاڭا سوعىس قاتەرى الدىندا تۇرعانىن اتاپ ءوتتى. سوندىقتان قازاقستان پرەزيدەنتى نۇرسۇلتان نازارباەۆ ءوزىنىڭ «الەم. XXI عاسىر» اتتى مانيفەسىندە: «وتكەن عاسىرلاردىڭ قاسىرەتتى قاتەلىكتەرىن قايتالاۋعا جول بەرمەي، الەمدى سوعىس قاتەرىنەن تۇپكىلىكتى ارىلتۋ ءۇشىن بۇكىل الەم ۇكىمەتتەرىنىڭ، ساياساتكەرلەرىنىڭ، عالىمداردىڭ، بيزنەسمەندەردىڭ، ونەر قايراتكەرلەرىنىڭ جانە ميلليونداعان ادامداردىڭ كۇش-جىگەرىن جۇمىلدىرۋ قاجەت» دەگەن بولاتىن.

كورمە مۇراجايعا كەلۋشىلەرگە قارۋ-جاراق جاساۋ ونەرىنىڭ قىر-سىرىن ۇعىنىپ، شىعىس پەن باتىستاعى ونەردىڭ تاريحى مەن وركەندەۋى، قارۋدىڭ الۋان ءتۇرى، ولاردى جاساعان ورتالىقتار مەن ايگىلى قارۋ-جاراق شەبەرلەرى جونىندە بىلە تۇسۋگە مۇمكىندىك تۋعىزادى.

جادىگەرلىكتەر قورى قارۋ-جاراق جاساۋ ونەرىنىڭ XV  عاسىردان XIX عاسىردىڭ سوڭىنا دەيىنگى ەلەۋلى تاريحي دامۋ كەزەڭىن قامتيدى.

كورمەگە قارۋ-جاراق جاساۋ ونەرىنىڭ 70 شاقتى ۇلگىسى قويىلعان، ولاردىڭ قاتارىندا گەرمانيادان، تۇركيادان، جاپونيادان، فرانتسيادان، ءۇندىستاننان، يتاليادان، يسپانيادان، يراننان جانە الەمنىڭ وزگە دە ەلدەرىنەن كەلگەن اسكەري، اڭشىلىق جانە سالتاناتتى قارۋ-جاراق تۇرلەرى بار.

Abai.kz