«وتانداس-ەل» رەسپۋبيليكالىق قوعامدىق بىرلەستىگى 2009 جىلدىڭ 18 ماۋسىمىندا قۇرىلىپ، ادىلەت مينيسترلىگىنە تىركەلگەن. 21 ادامنان قۇرالعان قۇرىلتايشىمىز، 9 ادامنان تۇراتىن تۇراقتى جوراسى بار. ءبارى تاۋەلسىزدىك جىلدارى ارعى بەتتەن ورالعان. كوبى كەزىندە جاۋاپتى قىزمەتتەر اتقارعان. كازىر ءبارى قازاقستان قوعامىنا ءسىڭىپ، ءوز ورنىن تاپقان وتانشىل ازاماتتار. قۇرىلتايشىلار قاتارى الدا تاعى دا وسىنداي بەلسەندى قىز-جىگىتتەرمەن تولىعا تۇسپەك.

«وتانداس-ەل» رەسپۋبيليكالىق قوعامدىق بىرلەستىگىنىڭ جارعىسىنى ساي، باستى ماقساتىمىز ورالمانداردىڭ جانە قازاق دياسپوراسىنىڭ ەكونوميكالىق، الەۋمەتتىك، مادەني جانە وزگە دە ومىرلىك ماڭىزدى پروبلەمالارىن شەشۋگە قاتىسۋ.

«نۇر وتان» – ەلباسىمىزدىڭ پارتياسى. كوشى-قون – قازاقستان رەسپۋبليكاسى تاۋەلسىزدىگىن جاريالاماي تۇرىپ جولعا قويىلعان تۇڭعىش پرەزيدەنتىمىزدىڭ تاريحي جانە ستراتەگيالىق ماڭىزى توتەنشە زور ۇلى ساياساتى. پارتيانىڭ قازىرگى تاڭدا الىستان ورالعان اعايىنداردىڭ ماسەلەلەرىن شەشۋدە اتقارىپ جاتقان قىزمەتىنە حالىق تا، بىزدە ءدان ريزامىز!

اتاپ ايتۋىمىز كەرەك، كوشىپ كەلگەن اعايىنداردىڭ شەشۋگە ءتيىستى پروبلەماسى از ەمەس. جاڭا كوشىپ كەلگەن جۇرت قازاقستان زاڭىنان حابارسىز. ولاردى جاڭا قونىسقا ولاردى ورنالاستىرۋ، جاڭا ورتاعا بەيىمدەۋ، ۇكىمەت تاعايىنداعان جەڭىلدىكتەردەن تولىق يگىلىكتەندىرۋ سىندى قىرۋار شارۋا بار. جاڭا زاڭنىڭ كەمەلدەنۋىنە بايلانىستى، كوشىپ كەلەتىندەردىڭ سانى دا جىل ساناپ كوبەي تۇسپەك.

«نۇر وتان» پارتياسى رەسپۋبليكالىق قوعامدىق قابىلداۋ بولمەسى  ارنايى «كوش كولىكتى بولسىن!» اتتى تۇجىرىمداما جاساپ، ۇستىمىزدەگى جىلدىڭ 14 شىلدەسىندە قازاقستان رەسپۋبليكاسىنىڭ ەڭبەك جانە حالىقتى الەۋمەتتىك قورعاۋ، ىشكى ىستەر، سىرتقى ىستەر، اۋىل شارۋاشىلىعى مينيسترلىكتەرىنىڭ جانە وبلىس دەڭگەيىندەگى جەرگىلىكتى اتقارۋشى ورگانداردىڭ وكىلدەرىنىڭ قاتىسۋىمەن پارتيانىڭ رەسپۋبليكالىق، ايماقتىق فيليالدارىنىڭ قوعامدىق قابىلداۋ بولمەلەرىندە اكتسيا وتكىزدى. وسى يگى شاراعا شاقىرىلعان ءۇش مەملەكەتتىك ەمەس ۇيىمنىڭ قاتارىندا «وتانداس-ەل» رەسپۋبيليكالىق قوعامدىق بىرلەستىگى دە بولىپ، الماتىدان قاتىستىق. سونداي-اق، اكتسيا اياسىندا كوشى-قون ماسەلەلەرى بويىنشا جەكە سۇراقتارمەن كەلگەن ازاماتتار تاقىرىپتىق قابىلداۋعا كىرىپ، ءوز وتىنىشتەرىنە جاۋاپتار الدى. اتالعان شارا الداعى ۋاقىتتا دا جوسپارلى تۇردە ءوز جالعاسىن تاباتىنىن ەستىپ، قاتتى قۋاندىق!

زاڭ دەگەننەن شىعادى، سوڭعى رەت 2015 جىلى قايتالاي وزگەرتۋلەر مەن تولىقتىرۋلار ەنگىزىلىپ، 2016 جىلدىڭ 1 قاڭتارىنان باستاپ قولدانىسقا ەنگەن «حالىقتىڭ كوشى-قونى تۋرالى» زاڭى شيرەك عاسىردان بەرى جالعاسىپ كەلە جاتقان قازاق  كوشىنە سونى لەپ اكەلدى دەپ ويلايمىز. قۇدايعا تاۋبە، قازاق توپاراعىنا تابانى تيگەن قازاقتىڭ تىركەۋگە تۇرىپ، قازاقستان رەسپۋبليكاسىنىڭ ازاماتتىعىن الۋىنا قاتىستى كەدەرگىلەردىڭ ءبارى جويىلدى. قازاقستان رەسپۋبليكاسى ۇكىمەتىنىڭ 2016 جىلعى 18 اقپانداعى №83 قاۋلىسىنا ساي، ورالماندار مەن قونىس اۋدارۋشىلاردى قونىستاندىرۋ ءۇشىن ارنايى وڭىرلەر ايقىندالدى. جەڭىلدىكتەر جەتكىلىكتى. ەندى بۇيىرسا، قازاق كوشىنىڭ ەكىنشى «التىن ءداۋىرى» باستالادى.

جاقىندا عانا وتكەن دۇنيەجۇزى قازاقتارىنىڭ V قۇرىلتايىندا ۇلت كوشباسشىسى نۇرسۇلتان نازارباەۆ «ەلىم، جەرىم دەپ ەڭىرەگەن ءاربىر قازاققا قازاقستاننىڭ ەسىگى ارقاشان اشىق، ايقارا اشىق. مەن ءۇشىن شەتتە جۇرگەن باۋىرلارعا جاناشىر بولۋ – ءار قازاقستاندىققا قامقورلىق جاساۋمەن بىردەي ماڭىزدى. «ءار قازاق – مەنىڭ جالعىزىم» دەگەن ولەڭ جولىن قۇرىلتاي مىنبەسىنەن الەمدەگى ءاربىر قازاققا جولدايمىن. قازاق بالاسى قاي ەلدە تۇرسا دا، ولار ۇلى دالادا ماڭگىلىك ەل قۇرىپ جاتقان بايتاق قازاقستاننىڭ اجىراماس بولشەگى بولىپ تابىلادى. جۇرەگىنىڭ تۇبىندە وسىنى ۇستاسىن!» دەپ، تاريحي ءسوز ايتتى.

ەلباسىمىزدىڭ وسناۋ «كوشى-قون» دەگەن ۇلى ساياساتىن ءوز دەڭگەيىندە جۇزەگە اسىرۋ، الىستا جۇرگەن اعايىندى وتان قۇشاعىنا ورالتۋ، ورالعانداردى ويداعىداي ورنالاستىرۋ ىسىنە قولعابىس جاساۋ، زاڭنىڭ جەرگىلىكتى اتقارۋشى بيلىك جاعىنان شىن مانىندە اتقارىلۋىن قاداعالاۋ – ۇكىمەتتىڭ عانا ەمەس، ۇكىمەتتىك ەمەس ۇيىمداردىڭ، قالا بەردى ءوزىن پاتريوت دەپ سانايتىن ءاربىر ازاماتتىڭ قاستەرلى بورىشى.

ءبىز «وتانداس-ەل» رەسپۋبيليكالىق قوعامدىق بىرلەستىگىنىڭ جورالارى مەن قۇرىلتايشىلارى اقىلداسىپ، «نۇر وتان» پارتياسىمەن سەلبەسىپ جۇمىس جاساۋدى، اسىرەسە، ءوزىمىز باستان كەشىرگەن، ءتارتىبىن جاقسى بىلەتىن كوشى-قون جۇمىسىندا سىزدەرگە قولعابىس بولۋدى ءبىر اۋىزدان كەلىسىپ، ماقۇلدادىق. سونىڭ العاشقى قادامى رەتىندە، كەزىندە جانە ۇستىمىزدەگى جىلى شەتەلدەن كوشىپ كەلىپ، الماتى وبلىسىنا قونىستانعان، اۋىلداردا بوس جەر تەلىمدەرى جوق بولعاندىقتان شارۋاشىلىق قۇرۋعا، جۇمىس تابۋعا مۇمكىندىگى شەكتەلگەن 58 وتباسىنىڭ ءتىزىمىن سىزگە ۇسىنىپ وتىرمىز.

سىزدەن بۇل وتباسىلاردىڭ كوشىپ كەلۋشىلەر مەن قونىس اۋدارۋشىلاردى قونىستاندىرۋ ءۇشىن ۇكىمەت ايقىنداعان وڭىرلەرگە كوشىپ بارۋىنا، زاڭ اياسىندا مەملەكەت بەلگىلەگەن جەڭىلدىكتەردى تولىق يگىلىكتەنۋىنە، ءسويتىپ جاڭا قونىسقا تۇراقتاپ قالۋىنا ىقپال ەتۋىڭىزدى سۇرايمىن.

«وتانداس-ەل» رەسپۋبيليكالىق

قوعامدىق بىرلەستىگىنىڭ

اتقارۋشى توراعاسى

ەركىنتاي مارالباي

Abai.kz