تالدىقورعان قالاسىندا «قازاقستان رەسپۋبليكاسى مەملەكەت باسشىسىنىڭ «بولاشاققا باعدار: رۋحاني جاڭعىرۋ» ماقالاسىنىڭ نەگىزگى ەرەجەلەرى ارنايى ۇيىمداستىرىلعان اشىق ديالوگ الاڭىندا ءتۇسىندىرىلدى.

شاراعا 15 جىلدىق تاريحى بار الماتى وبلىستىق ىشكى ساياسات باسقارماسىنىڭ نەگىزى قۇرىلعاننان باستاپ، بۇگىنگى كۇنگە دەيىن باسقارعان جەتى باسشى، 16 اۋدان جانە 3 قالا گازەتتەرىنىڭ رەداكتورلارى جانە جۋرناليستەر قاتىستى.

الماتى وبلىسىنىڭ ىشكى ساياسات باسقارماسىنىڭ نەگىزى 2002 جىلى  قۇرىلعانى تاريحتان بەلگىلى. سول كەزەڭنەن باستاپ  ءار جىلدارى ىشكى ساياسات باسقارماسىندا  ەڭبەك ەتكەن باسشىلار «رۋحاني جاڭعىرۋ» تاقىرىبىندا وزدەرىنىڭ ويلارىن ءوڭىردىڭ ءار اۋدانى مەن قالاسىنان كەلگەن ءبولىم باسشىلارى جانە گازەتتەردىڭ باس رەداكتورلارىمەن ءبولىستى. بۇل ەلباسى ماقالاسىندا كورسەتىلگەن قوعامنىڭ رۋحاني جاڭعىرۋىنداعى ۇرپاقتار ساباقتاستىعىنىڭ ايقىن كورىنىسى.

«ەلباسى ماقالاسى بويىنشا ءبىزدىڭ وڭىردە دە اتقارىلىپ جاتقان جۇمىس شاش ەتەكتەن. ەل ماقتانىشىنا اينالعان ايگىلى تۇلعالارمەن كەزدەسۋ، تاريح پەن ءتىل تاعدىرىن كوتەرگەن جيىندار، اسىرەسە، لاتىن قارپىنە كوشۋ مىندەتىن تالقىلاعان باسقوسۋلار «رۋحاني جاڭعىرۋ» باستاماسى اياسىندا وتۋدە»، - دەدى ەرەكشە دوڭگەلەك ۇستەلدى ۇيىمداستىرعان وبلىستىق ىشكى ساياسات باسقارماسىنىڭ باسشىسى رۋستام الپىسباەۆ.

«ەڭ العاش وڭىرلەردە ىشكى ساياسات دەپارتامەنتى قۇرىلعاندا الماتى وبلىسىنىڭ باسىندا تۇرىپ، يدەولوگيا سالاسىن ءدال وسى جەتىسۋدا قۇرعانىمدى ماقتان ەتەمىن. تالدىقورعان ارقاشان مەنىڭ جۇرەگىمدە»، -دەدى وبلىستىق ىشكى ساياسات باسقارماسىنىڭ نەگىزىن قالاعان گۇلسارۋار جاكۋباەۆا.

«الماتى وبلىسىندا ىشكى ساياسات باسقارماسىنىڭ دامۋ قارقىنىنا قاراپ وتىرسام، مەرزىم بويىنشا 7 جىل قىزمەت ەتىپ، ەڭ كوپ باسقارعان مەن ەكەنمىن. بۇل فاكت مەن ءۇشىن ابىروي. ءبىز باسقارعان ۋاقىت ەڭ ءبىر كۇردەلى، تاريحي كەزەڭ بولعانىمەن وزىندىك قىزىقتارى دا بولدى. ەڭ العاش وبلىستا جاستار ماسەلەسىن ءبىز قولعا العان ەدىك. بيىلعى ۇلت كوشباسشىسى «بولاشاققا باعدار: رۋحاني جاڭعىرۋ» اتتى باعدارلامالىق ماقالاسى جاستارعا ارنالعانى انىق. ويتكەنى، بولاشاق - جاستاردىڭ قولىندا. قوعامدىق سانانى جاڭعىرۋدىڭ باستى باسىمدىعى ۇلتىمىزدىڭ جاھاندىق قوعامداستىقتا باسەكەگە قابىلەتتى بولۋى ەكەندىگى ءسوزسىز. بۇل رەتتە ءوزىمىزدىڭ بىرەگەيلىگىمىزدى، قۇندىلىقتارىمىز بەن ءداستۇرىمىزدى ساقتاۋعا ءتيىسپىز. وتانىڭدى سۇيمەي سالت-ءداستۇرىڭدى ساقتاي المايتىندىعىڭدى دا جەتە تۇسىنگەن ءجون»، - دەپ 2008 - 2014 جىلدارداعى وبلىستىق ىشكى ساياسات باسقارماسىنىڭ باسشىسى - سۇلەيمەنوۆا گۇلجيان اتاپ ءوتتى.

ال، 2015-2016 جىلدارى وبلىستىق ىشكى ساياسات باسقارماسىنىڭ باسشىسى بولعان، بۇگىنگى كۇنى وبلىستىق «نۇر وتان» پارتياسى توراعاسىنىڭ ءبىرىنشى ورىنباسارى عالياسقار سارىباەۆ: «ءبىلىم – بۇگىنگىنىڭ باستى قاجەتتىلىگى. دۇنيەتانىمى كەڭ ادام عانا باسەكەگە توتەپ بەرەدى. كوشباسشىمىزدىڭ وسكەلەڭ ۇرپاقتى بىلىمگە قۇشتار بولۋعا ۇندەۋىنىڭ سىرى وسىندا. ءبىلىم الۋدى كۋلتكە اينالدىرۋ، باسىمدىققا اينالدىرۋ ءبىزدىڭ قوعام ءۇشىن وتە قاجەت. ساۋاتتى ەل عانا دامىعان 30 ەلدىڭ قاتارىندا بولماق. سوندىقتان رۋحاني باي ادام – كەز كەلگەن اقپاراتتى تەز قابىلداپ، زامان تالابىنا ساي جىلدام مەڭگەرىپ، كوش ىلگەرى ءجۇرىپ وتىرماق»، - دەدى.

اشىق ديالوگ الاڭىندا ەلباسىنىڭ ماقالاسى قازاق حالقىن جارقىن كەلەشەككە باستايتىن ءبىلىم، عىلىم، رۋحانيات، تۋعان جەر، ءتىل ماسەلەسىنە قاتىستى ايتىلعان ناقتىلى مىندەتتەر ەلدىڭ ۇلتتىق كودىن ايقىنداپ، ۇلتتىق بولمىسىن ساقتاپ قالۋعا جول اشاتىنى جونىندە ءسوز قوزعالدى. قاتىسۋشىلار تاراپىنان «رۋحاني جاڭعىرۋ» قازىرگى قازاقستانعا قاجەت ەكەنى ايتىلىپ تالقىلاندى.

Abai.kz