وڭتۇستىك قازاقستان وبلىسىنىڭ اكىمدىگىندەگى كەزدەسۋ. "وبلىس اكىمى ءبىزدى جىلى قارسى الدى", - دەيدى گە دجەنسون مىرزا.  

«ەكسپو-2017» حالىقارالىق مامانداندىرىلعان كورمەسى ءوز دەڭگەيىندە ءوتىپ، ابىرويمەن اياقتالدى.  2 ميلليون تۋريست تاماشالايدى دەپ توپشىلاعان جارمەڭكەگە 4 ميلليون تۋريست كەلىپتى. بۇل اۋەلگى مەجەلەنگەن جوسپاردان ەكى ەسەگە كوپ كورسەتكىش. قىسقاسى، «ەكسپو-2017» كورمەسى الەم الدىندا ەلىمىزدىڭ مۇمكىندىكتەرىن پاش ەتكەن ايتۋلى شارا بولدى. ەلدىڭ دە، ەلباسىنىڭ دا مەرەيىن ۇستەم ەتتى.

ەندى ەلىمىزگە شەتەلدىك ينۆەستورلار توپىرلاپ كەلە باستاۋى، جاسىل ەنەرگيادان قۋات الاتىن جوبالار ءبىر-بىرلەپ ىسكە اسۋى كەرەك. مىنە، سونىڭ العاشقى قارلىعاشى  - «دجان سۋ نيۋ ەنەردجي تەحنولودجي» كومپانياسىنىڭ (http://www.jssunhui.com/about.php) ءدۇبىرى قازىنالى وڭتۇستىكتەن ەستىلدى. «وڭتۇستىك قازاقستان وبلىسىندا قىتايلىق كاسىپكەرلەر قۋاتتىلىعى 100 مۆت بولاتىن كۇن ەلەكتر ستانساسىن سالماق»-دەگەن جاعىمدى جاڭالىق تاراۋدا. سول جاعىمدى جاڭالىقتى جالپى جۇرتقا كەڭىنەن تاراتىپ جەتكىزۋ ماقساتىندا سايتىمىزدىڭ ءتىلشسى «دجان سۋ نيۋ ەنەردجي تەحنولودجي» كومپانياسىنىڭ وكىلى گە دجەنسون مىرزامەن (سۋرەتتە) كەزدەسىپ، سۇحبات قۇردى.

گە دجەنسون

- گە دجەنسون مىرزا، ءسىزدىڭ وڭتۇستىك قازاقستان وبلىسىنا كەلىپ، قۋاتتىلىعى 100 مۆت بولاتىن كۇن ەلەكتر ستانساسىن سالۋعا نيەت ءبىلدىرىپ جاتقانىڭىزدى ەستىدىك. ارينە، قازاقستان رەسپۋبليكاسىنا كەلىپ، قارجى سالىپ، بىرلەسكەن كاسىپورىن قۇرىپ جاتقان شەتەل كاسىپكەرلەرى از ەمەس. سونىڭ ىشىندە ءسىز سەكىلدى قىتاي قارجىگەرلەرىنىڭ دە قاراسى مول. ءبىزدى قىزىقتىرىپ وتىرعانى، «دجان سۋ نيۋ ەنەردجي تەحنولودجي» كومپانياسىنىڭ ءدال «ەكسپو-2017» كورمەسى كوتەرگەن تاقىرىپقا ساي جۇمىس ىستەيتىندىگى. ءسوز باستاماس بۇرىن ءوزىڭىز جانە كومپانياڭىز تۋرالى قىسقاشا ايتىپ وتسەڭىز. 

- مەن - قىتايدىڭ دجان سۋ ولكەcنىڭ تۋماسىمىن. ءنانجىڭ ۋنيۆەرسيتەتىن بىتىرگەم. ماماندىعىم – كاسىپورىن باسقارۋ. 2004-2007 جىلدارى «Panasonic» كومپانياسىندا ءوندىرىس ءبولىمىنىڭ باسشىسى بولىپ جۇمىس اتقاردىم. 2007 جىلى اقش-تىڭ اەروناۆتيكا جانە عارىش كەڭىستىگىن زەرتتەۋ جونىندەگى ۇلتتىق ورتالىعىنىڭ («NASA»)  كۇن ساۋلەسىن زەرتتەۋ بولىمشەسىندە ەكولوگيالىق تازا كابەلدىك تاقتالاردى ءوندىرۋ تۋرالى بىرلەسكەن زەرتتەۋ جۇمىسى جۇرگىزىلدى. مەن ارنايى ۇسىنىسپەن بارىپ، سونىڭ شەتەلدىك زەرتتەۋشىلەر توبىن باسقاردىم.

2009 جىلدان بەرى قىتايداعى «Jiangsu sunhui new energy technology co ltd» كومپانياسىندا قىزمەت اتقارام. قازىرگى تاڭدا اتالعان كومپانيانىڭ قازاقستانعا باعىتتالعان ينۆەستيتسيالىق جوبالارىن ىسكە اسىرۋ جولىندا ءجۇرمىن.

ال، «دجان سۋ نيۋ ەنەردجي تەحنولودجي» كومپانياسى 2009 جىلى قۇرىلدى. جياڭسۋ ولكەسى، ياڭجۋ قالاسىنداعى ينوۆاتتسيالىق ايماعىندا ورنالاسقان. بۇل – وسى ولكەدەگى تۇڭعىش جانە ەڭ ۇزدىك كومپانيا. كومپانيانىڭ باستى ءونىمى – كۇننۇرى كابەلدىك تاقتالارى (باننەر) بولىپ تابىلادى. كاسىپورىن قۇرىلعان كۇننەن باستاپ كۇننۇرىنان، جەل كۇشىنەن جانە سۋدان  اقىلدى، ءتيىمدى، فوليارلىق ساپالى ەلەكتر قۋاتىن وندىرەتىن ستانسالاردى  زەرتتەۋ، جوبالاۋ، وڭدەۋ جانە قۇرۋ جۇمىسىمەن اينالىسىپ كەلەدى. ءونىم شىعارۋدا NASA-دا زەرتتەلگەن تاجىريبەنى قولدانادى. سول سەبەپتى، كومپانيا تەحنيكالىق مانداندىرىلعان ۇجىمىمەن، جوعارى دەڭگەيدەگى جابدىقتارىمەن باسەكەلەستىككە توتەپ بەرەدى جانە سەنىمدى جۇمىس اتقارا الادى. قىسقاسى، ءبىزدىڭ كومپانيا ەرس (Engineering Procurement Construction) باس مەردىگەرلىگىمەن اينالىسۋعا تولىق قۋاتتى.

- ءسوز – ينۆەستيتسيا تۋرالى بولىپ وتىر. داۋ جوق، الەمدىك قاۋىمداستىقتا  قىتاي ەكونوميكالىق الەۋەتى ەڭ جوعارى ەلدەردىڭ قاتارىندا تۇرادى. اينالاسى وتىز جىلدىڭ ىشىندە قاراتابان كەدەيلىكتەن قۇتىلىپ، دۇنيەنىڭ الدىڭعى قاتارىنا وتۋدە، قىتاي ەلى دە، ارينە، شەتەل ينۆەستيتسيانىڭ ءرولى زور بولعانىن جوققا شىعارماسا كەرەك؟

- وتكەن عاسىردىڭ سوڭعى جارتىسىنداعى قىتاي تاريحىندا قىتايعا ينۆەستور تارتۋشى باسشىلاردىڭ باسىندا دەن سياوپين (邓小平) تۇرادى.

ءوزىڭىز ايتىپ وتىرعان الەمدىك قاۋىمداستىقتان ءبولىنىپ، ەسىك-تەرەزەنى تۇمشالاپ، توماعا-تۇيىق ءومىر سۇرۋگە ابدەن بەكىپ، كونىپ قالعان جۇيەنى وزگەرتۋ،  «شەتەل»، «كاپيتاليزم»، «كاپيتاليست» دەسە توبە شاشى تىك تۇراتىن كۇيگە تۇسكەن ميلليارد حالىقتى نارىقتىق ەكونوميكاعا بۇرۋ دەن اقساقال ءۇشىن وڭايعا تۇسكەن جوق.  ول جۇمىستى الدىمەن «يدەيانى ازات ەتۋدەن»، «سىرتقا ەسىكتى اشىق ۇستاۋدان» باستادى. «كاپيتاليزم قورقىنىشتى نارسە ەمەس. كەرەك بولسا، ونى جۇرەكتىلىكپەن پايدالانۋ كەرەك!» دەگەن ۇران تاستادى.       20 جىل بويى ساياسي كۇرەسپەن ابدەن بىلىققان ەلگە شەتەل كاسىپكەرلەرىنىڭ سەنىپ كەلە قويۋى دا قيىن شارۋا ەدى.

قىتايعا الدىڭعى كەزەكتە كەلىپ، كاسىپورىن اشقان ەتنيكالىق قىتاي كاسىپكەرلەرى بولدى. مەملەكەت ولارعا بارىنشا قولايلى جاعاداي جاساپ باقتى. تەڭىز جاعالاۋىنداعى قالالاردى ارنايى ينۆەستيتسيالىق ايماق ەتىپ بەلگىلەپ بەردى. ءسويتىپ، تۇتىنۋشىسى كوپ، ەڭبەككۇشى ارزان ورتاعا وزگە دە شەتەلدىك ينۆەستورلار بىرتىندەپ كەلە باستادى. ينۆەستيتسيا قۇيامىن دەپ توپ-توبىمەن كەلگەن شەتەل كاسىپكەرلەرىن كۇن قۇرعاتپاي دەن سياوپين ءوزى قابىلداپ، كەڭەسىپ، كەپىلدىك بەرىپ وتىرعانىن باسا ايتىپ وتكىم كەلەدى. دەن ولكە، قالا، ءتىپتى اۋدان باسشىلارىنىڭ ەڭبەگىن ءوزى باسقاراتىن وڭىرلەرگە تارتقان ينۆەستيتسياسىنىڭ كولەمىنە قاراي باعالاپ، سىياقى بەرۋ ءتارتىبىن جولعا قويدى. ءسويتىپ، شەنۋنىكتەر اراسىندا باسەكە ءجۇرىپ، قىزمەت ىستەۋ بەلسەندىلىگى ارتتى.

سونىڭ ارقاسىندا، ءوزىڭىز دە جاقسى بىلەسىز دەپ ويلايمىن، بۇگىندە قىتاي ءوز ءونىمىن شەتەلدەرگە ەكسپورتتاۋشى ەلگە اينالدى. قىتاي كاسىپكەرلەرى بەس قۇرلىقتى تۇگەل كەزىپ ءجۇر. قىتاي بىرلەسكەن كاسىپورىندارى الەمنىڭ بارلىق ەلدەرىندە قۇرىلدى دەۋگە بولادى.

-اقش-تا جۇمىس ىستەپ كەلدىم دەپ، ءوزىڭىز ايتىپ وتىرسىز. سالىستىرمالى تۇردە ايتقاندا، قازاقستان رەسپۋبليكاسى ينۆەستورلار ءۇشىن قولايلى ما؟ قازاق كاسىپكەرلەرىمەن جۇمىس ىستەۋ سىزگە قيىن ەمەس پە؟

- ينۆەستورلار ءۇشىن ءۇشىن كەرەگى – تۇتىنۋشى مەن ارزان ەڭبەككۇش. ودان دا ماڭىزدى تاعى ءبىر فاكتور بار. ول – سول ەلدىڭ ساياسي تۇراقتىلىعى.

قازاقستاندا وسى فاكتورلاردىڭ ءبارى بار. مەن جاقسى بىلەم، رەسەيدەن جاڭا ءبولىنىپ شىققان قازاقستان ءۇشىن دە شەتەلدەن ينۆەستيتسيا تارتۋ وڭايعا سوققان جوق. بىراق پرەزيدەنتتەرىڭىز ۇلكەن ەرلىككە باردى، ەسىكتى بىردەن اقش-قا اشتى. مەن بىلگەندە، قازاقستانعا ەڭ العاش كەلگەن شەتەلدىك كومپانيا – تەڭىزشەۆرويل. سولاي ەمەس پە؟ جاڭىلماسام، 1993 جىلى  نۇرسۇلتان نازارباەۆ پەن كەننەت دەرر الماتى قالاسىندا «تەڭىزشەۆرويل» بىرلەسكەن كاسىپورنىن قۇرۋ تۋرالى 40 جىلدىق كەلىسىمگە قول قويدى. قازاقستان-امەريكا مۇناي كەلىسىم-شارتىنىڭ جاسالۋى – بۇكىل دۇنيەجۇزى ءۇشىن ەكونوميكالىق قانا ەمەس، ساياسي دا ماڭىزى زور باستاما بولدى. ءسويتىپ، قازاقستان ورتا ازيادا ءبىرىنشى بولىپ، الەم نازارىن وزىنە جالت قاراتتى.

دەمەك، جاس مەملەكەت بولۋىنا قاراماستان، بۇگىندە قازاقستان  – ينۆەستيتسيا تارتۋدا، ينۆەستورلارمەن جۇمىس ىستەۋدە مول تاجىريبەگە يە ەلدەردىڭ الدىڭعى قاتارىندا تۇر.  ايتپەسە، ەلدەرىڭىز از عانا جىلدىڭ ىشىندە وسىنشالىق ناتيجەگە قول جەتكىزە الماس ەدى. دالەل كەرەك بولسا، ءبىر عانا «ەكسپو-2017» حالىقارالىق كورمەسىن ايتساق، جەتكىلىكتى بولماق.

قازاق كاسىپكەرلەرگە كەلسەك، ولارمەن جۇمىس ىستەۋ قيىن ەمەس. ويتكەنى ءبىزدىڭ ارامىزعا دانەكەر بولىپ جۇرگەن بىلىكتى ازامات بار. ول – مەنىڭ وتانداسىم مۇحامەتكوكسەگەن حاميتۇلى. سىزدەردىڭ تىلمەن ايتقاندا، «ورالمان» قازاق. مۇحامەتكوكسەگەن كاسىبي ەنەرگەتيك، ءتورت پاتەنت تاپقىرلاعان عالىم، ديپلومات ادام. مەنىڭ قازاقستاندىق كاسىپكەرلەرمەن تانىسۋىما، قورىقپاي ينۆەستيتسيا سالۋىما سەبەپكەر بولعان سول كىسى.

ال، قازاقستاندىق ارىپتەستەرىم تۋرالى ايتسام، «دجان سۋ نيۋ ەنەردجي تەحنولودجي» كومپانياسى اتالعان جوبالاردى ىسكە اسىرۋ ءۇشىن شىمكەنتتىك «اتامەكەن-قۋات» جشس-مەن كەلىسىم جاساپ وتىر.

كەلىسىم جاساماس بۇرىن، ارينە، بولاشاق ءارىپتسىڭنىڭ جاعدايىن جاقسى ءبىلۋىڭ شارت. قازاقستاندىق «اتامەكەن-قۋات» جشس كۇن ەنەرگياسى ستانساسىن سالۋمەن  اينالىسادى ەكەن. 2013 جىلى ونتۇستىك قازاقستان وبلىسى، سايرام اۋدانى، اقباي اۋىلىنا «اكسۋەنەرگو» جشس-نىڭ ۇسىنىسىمەن قۋاتتىلىگى 1 مۆت كۇن نۇرى ەلەكترستانساسىن iسكە كوسىپ بەرىپتى. سونداي-اق، 2016 جىلى «كازاتومپروم-Sauran» مەكەمەسىنىڭ ونتۇستىك قازاقستان وبلىسى، سوزاق اۋدانى، تاۋكەنت اۋىلىنا سالعان قۋاتتىلىعى 225 كۆت ەنەرگيا وندىرەتىن  ەلەكترستانساسىنىڭ دا iسكە قوسۋ جۇمىستارىن دا (ينجينيرينگ جۋمىستارى) وسى سەرىكتەستىك جۇرگىزىپ بەرىپتى. 2017 جىلى «ساۋتسويل» كومپانياسىنا وڭتۇستىك قازاقستان وبلىسى، تولەبي اۋدانى، بىركولىك دەمالىس ايماعىنداعى قۋاتتىلىگى 150 كۆت كۇن ەلەكترستانساسىن ورناتىپ بەرۋ جۇمىسى دا وسى جشس-نىڭ قولىمەن ىستەلىپتى.

ءبىز بارىپ، سونىڭ ءبارىن  ءوز كوزىمىزبەن كورىپ قايتتىق. اتالعان ستانسالار تۇگەلدەي جوعارى دەڭگەيدە ورناتىلعان جانە اقاۋسىز ءجۇمىس ىستەپ تۇر.

ال، «اتامەكەن-قۋات» جشس جاساعان 1 مۆت/ساع قۋاتتاعى كۇن ەلەكتر ستانتسياسىنىڭ جوباسى  استانادا وتكەن «ەكسپو-2017» حالىقارالىق كورمەسىنە وڭتۇستىك قازاقستان وبلىسى اتىنان ۇسىنىلىپ، قازاقستان پاۆيلونىنا قويىلىپتى...

- بىرىگىپ اتقاراتىن جوبالاراڭىزعا قىتاي جاعىنان دا ماماندار كەلە مە؟

- ەكى-ءۇش مامان عانا ۋاقىتشا كەلۋى مۇمكىن. «اتامەكەن-قۋات» جشس-نىڭ ءوزىنىڭ دە بىلىكتى، كاسىبي ماماندارى بار. ولار وزدەرى دە بۇل جۇمىستى اتقارا الدى.

- سونىمەن جۇمىتى باستادىڭىزدار عوي؟

- ءيا، العاشقى ءبىربولىم جوبالار ىسكە اسا باستادى.

14 قىركۇيەكتە وڭتۇستىك قازاقستان وبلىسىنىڭ اكىمى جانسەيىت تۇيمەباەۆتىڭ قابىلداۋىندا بولدىق. وبلىس اكىمى ءبىزدى وتە جىلى قابىلدادى. قابىلداۋدا مەنىمەن بىرگە مۇحامەتكوكسەگەن حاميتۇلى، «اتامەكەن-قۋات» جشس-نىڭ ديرەكتورلار كەڭەسىنىڭ مۇشەسى باقىت الىمقۇلوۆ، «نۇر وتان» پارتياسىنان ومىرۇزاق مەلداحانوۆ، وبلىستىق ينۆەستيتسيا، دامۋ جانە تۋريزم باسقارماسىنىڭ باسشىسى باتىرحان قۇرمانسەيىتوۆ بىرگە بولدى.

كەزدەسۋدە جانسەيىت قانسەيىتۇلى «جوبالارىڭىز كوڭىلگە قونىمدى. ويتكەنى، ءبىزدىڭ ءوڭىردىڭ تابيعاتى كۇن ساۋلەسىنەن ەلەكتر جارىعىن وندىرۋگە وتە قولايلى. سوندىقتان ەكى تاراپقا دا ءتيىمدى جوبانى تەزدەتىپ ىسكە اسىرۋ قاجەت. قاجەتتى جەر تەلىمىن ءبولىپ بەرىپ، قاجەتتى قولداۋلاردى كورسەتۋگە ءازىرمىز»، – دەدى اعىنان جارىلىپ.

ءبىز توقپەن جۇرەتىن موتوتسيكلدەردىڭ قۇرال-جابدىقتارىن الىپ كەلىپ، شىمكەنتتە قاجەتتى قۇجاتتارىن راسىمدەپ جاتىرمىز. اكىم ايتقانىن ورىنداپ، «اتامەكەن-قۋات» جشس-نە زاۋات قۇراتىن ورىندى بىردەن شەشىپ بەردى. ەندى اتالعان موتوتسيكلدەردى سول زاۋاتتا قۇراستىرىپ، بازارعا شىعارامىز. ونىڭ قۇنى 30 ميلليون اقش دوللارىن قۇرايدى.

ەگەر جوسپارىمىز ءساتتى ىسكە اسىپ جاتسا، توقپەن جۇرەتىن جەڭىل كولىك پەن قوعامدىق كولىكتەردى دە وسىندا قۇراستىرۋ ويىمىزدا بار.

قۇنى 20 ميلليون اقش دوللارىن قۇرايتىن تاعى ءبىر جوبا – كۇن نۇرىمەن ىستەيتىن فوتوەلەكتر پانەلدەرىن شىعاراتىن زاۋىتتى وسىندا ىسكە قوسۋ. ونىڭ دا جۇمىستارى ءجۇرىپ جاتىر. جانسەيىت قانسەيىتۇلى وعان قاجەتتى جەر ماسەلەسىن دە شەشۋگە تاپسىرما بەردى. شارۋا شەشىلۋ الدىندا تۇر.

جوسپارعا سايكەس، قوماقتى جوبامىز – وڭتۇستىك قازاقستان وبلىسىنىڭ وتىرار اۋدانى اۋماعىندا قۋاتتىلىعى 100 مۆت بولاتىن  كۇن ەلەكتر ستانساسىن سالۋ. بۇل ءوڭىردى تاڭداعان سەبەبىمىز، وڭتۇستىكتە ءبىر جىلدىڭ 300 كۇنىندە كۇن ساۋلەسى توگىلىپ تۇرادى. وعان 150 ملن. اقش دوللارىن قۇيۋعا دايىنبىز. وبلىس اكىمى قاجەتتى جەردى بەلگىلەپ، قۇجاتىن بەردى. وسى قازان ايىندا قۇرىلىس جۇمىستارىن باستاۋدى جوسپارلاپ قويعامىز. بىراق كەشىگىڭكىرەپ جاتىرمىز. سەبەبى، بۇل جوباعا مەملەكەتتىڭ كەپىلدىگى كەرەك. ناقتىلاپ ايتسام، اتالعان جوبانى ىسكە اسىرۋ ءۇشىن، ەلەكترستانسا ىسكە قوسىلعان سوڭ، ودان وندىرىلگەن ەلەكتر قۋاتىن ۇكىمەتكە ساتىپ الۋ تۋرالى قازاقستان رەسپۋبليكاسى  ەنەرگەتيكا مينيستيرلىگىنىڭ كەپىلدىگى كەرەك.

ەگەر، ەنەرگەتيكا مينيستيرلىگى ەلەكتر قۋاتىن ساتىپ الۋ تۋرالى كەپىلدىك بەرسە، ءبىزدىڭ «دجان سۋ نيۋ ەنەردجي تەحنولودجي» كومپانياسى قىتاي حالىق رەسپۋبليكاسىنىڭ «ءبىر جول ءبىر بەلبەۋ» قىزمەت توبىنا كىرەدى دە قازاقستانعا قارجى بىردەن اۋدارىلادى.

- سوندا ءبىزدىڭ ەنەرگەتيكا مينيستيرلىگى «ەلەكتر قۋاتىن ساتىپ الامىز» دەپ، كەپىلدىك بەرمەي وتىر ما؟

- جوق، ولاي دەپ ءۇزىلدى كەسىلدى ايتا المايمىن. قازاقستان باسشىسىنىڭ ەلگە ينۆەستورلار شاقىرۋ، ينۆەستيتسيا تارتۋ تۋرالى ۇكىمەت مۇشەلەرىنىڭ دۇرىستاپ سويلەسۋى كەرەكتىگى جايلى ۇنەمى ايتىپ وتىراتىنىن مەن جاقسى بىلەم. مەملەكەتتىك ساپارمەن بارعان ەلدەرىندە دە كاسىپكەرلەرمەن كەزدەسىپ، قازاقستانعا شاقىرىپ جاتادى. پرەزيدەنت نۇرسۇلتان نازارباەۆتىڭ وتكەن جىلى قىركۇيەك ايىندا قىتايداعى ەلەكتروندى ساۋدا سالاسىنىڭ كوشباسشىسى بولىپ سانالاتىن جانە سول باعىتتا زور جەتىستىككە جەتكەن «Alibaba Group» ديرەكتورلار كەڭەسىنىڭ توراعاسى دجەك مامەن (ما يۋنمەن) ارنايى كەزدەسۋى سونىڭ دالەلى. پرەزيدەنتتەرىڭىزدىڭ ينۆەستور تارتۋداعى تالعامى وتە جوعارى. شىنىن ايتۋ كەرەك، سوڭعى وتىز جىلعا تاياۋ ۋاقىتتىڭ ىشىندە قازاقستان تمد ەلدەرىنىڭ ىشىندە ينۆەستيتسيا تارتۋدا الدىنا ەشكىمدى وزدىرا قويعان جوق. ەندىگى جەردە قازاق ەلىمەن بۇل سالادا باسەكەگە تۇسەتىن ءبىر-اق ەل بار دەپ ويلايمىن. ول – وزبەكستان. ءوزىڭىز بىلەسىز، وزبەكستان  ورتا ازيادا جابىق ەل بولدى. قازىر وزبەكتىڭ جاڭا باسشىسى شاۆكات ميرزيەەۆتىڭ تەبىنى كۇشەيىپ بارادى. ءتىپتى، «كاسىپكەرلىكتى جەدەلدەتىپ دامىتۋدى، جەكە مەنشىكتى جانجاقتى قورعاۋ مەن ىسكەرلىك احۋالدى ساپالى جاقسارتۋدى قامتاماسىز ەتۋ جونىندەگى قوسىمشا جەڭىلدىكتەر تۋرالى» ارنايى جارلىق شىعاردى. ونىڭ ۇستىنە، تۇتىنۋشىنىڭ كوپتىگى، ەڭبەككۇشتىڭ ارزاندىعىمەن بىرگە، وزبەكستاننىڭ كليماتى كۇن ەلەكتر ستانساسىن سالۋعا ءتىپتى دە قولايلى. ەگەر، وزبەكستان وسى بەتالىسىنان تايماسا، تمد ەلدەرى «ينۆەستيتسيالار تۋرالى» زاڭدارىن قايتا قاراۋعا ءماجبۇر بولۋى مۇمكىن.

-قىسقاسى، «ەكسپو»-نى قازاقستان وتكىزىپ، قىزىعىن وزبەكستان كورمەسە بولدى  دەيسىز عوي؟

- كاسىپكەرلەر ءۇشىن قاي ەلدە دە جوعارى دارەجەلى باسشىلارمەن كەزدەسۋ وڭايعا تۇسپەيدى. «اتامەكەن-قۋات» جشس-نىڭ جىگىتتەرى ءبىر جىلدان بەرى بارىن سالىپ، جۇگىرىپ جاتىر. قر ينۆەستيتسيالار جانە دامۋ ۆيتسە-ءمينيسترى ت. توقتاباەۆتا بولىپتى. وبلىس اكىمى قابىلداۋىنان كەيىن، 6 قازاندا «نۇر وتان» پارتياسىنىڭ قوعامدىق قابىلداۋ بولمەسىندە قر ەنەرگەتيكا مينيسترلىگىنىڭ سول كەزدەگى ۆيتسە-ءمينيسترى اسەت ماعاۋوۆ مىرزامەن جولىعىپ قايتتىق. ارىپتەستەرىم قر ەنەرگەتيكا ءمينيسترىنىڭ اتىنا جازىلعان وتىنىشتەرىن تاپسىردى. وكىنىشكە وراي، اسەت ماراتۇلى قىزمەتتەن بوساتىلىپ كەتتى. «اتامەكەن-قۋات» جشس وزىمەن ارىپتەس «دالا سولار» جشس-ءنىڭ اتىنان ەندى قر ەنەرگەتيكا ءمينيسترى قانات بوزىمباەۆ مىرزاعا حات جازىپ، قابىلداۋىن سۇراپ جاتىر. ءبىز دە سونىڭ ناتيجەسىن كۇتۋدەمىز. مينيستر ءبىزدى قابىلداپ قالار دەگەن ويدامىز.

- گە دجەنسون مىرزا, ۋاقىت ءبولىپ، سۇحبات بەرگەنىڭىزگە راحمەت!

سۇحباتتاسقان داۋرەن قاسەنۇلى

تىلماشتىق قىزمەت جاساعان م. حاميتۇلى

Abai.kz