قازاق پەن قىرعىزدىڭ ورتاسىنداعى شەكارادا ماسەلەسى شەشىلگەن جوق. قوس ەلدىڭ بيلىگى ءبىر-بىرىنە تالاپ قويىپ، ساياسي ريتوريكادان ءارى اسا الماي وتىر.

داۋدىڭ باسى - اتامباەۆتىڭ (قىرعىزدىڭ ءتورتىنشى پرەزيدەنتى - رەد.) ايتقان بەيساياسي ءام بەيساۋات سوزدەرى ەدى. ءيا، الدەكىمدەر الگىنىڭ دەگەندەرىن "شىندىقتىڭ شىرقاۋ شەگى" دەپ، تابانىن سۇيە، تامسانىپ جاتسا دا، بۇل ساياساتتىڭ شەڭبەرىنەن شىققان، گەوساياسي ساۋاتسىز مالىمدەمەلەر ەدى.

ءسويتىپ، نە كەرەك، تالاس-تارتىس كۇشەيگەن ۇستىنە كۇشەيە ءتۇستى. كۇنى بۇگىنگە دەيىن ەكى ەلدىڭ بيلىگى اراسىندا تۋىنداعان ماسەلە شەشىلگەن جوق.

جەڭىشبەك جۇماقادىر دەيتىن قىرعىزدىڭ اقىنى بار. سول جاقىندا بەينە ۇندەۋ جاساپ، الەۋمەتتىك جەلىگە جاريالاپتى. وندا قازاق پەن قىرعىزدىڭ ورتاسىنداعى ماسەلەلەرگە توقتالىپ، پرەزيدەنت نازارباەۆتان شەكاراداعى شەكتەۋدى الىپ تاستاۋدى سۇراپتى.

ءوز پرەزيدەنتى الماسبەك اتامباەۆتىڭ ايتقاندارى ءۇشىن كەشىرىم سۇراعان. "قازاقتىڭ بار عوي نارقىندا، قىرعىزدىڭ بار عوي سالتىندا. ءىنىسى قويسا ەركەلەپ، اعاسى قويادى كەشىرىپ.، قۇشاعىن جايىپ كەلسە دەپ...", دەپ توككەن جەڭىشبەكتىڭ ايتقاندارى بۇل.

قىرعىز اقىنى اعىنان جارىلا ايتتى. جەڭىشبەك جۇماقادىر بەينە جازبا جاساپ، پرەزيدەنت نازارباەۆتان كەشىرىم سۇراپ، شەكارانى اشۋدى ءوتىندى. جەڭىشبەكتىڭ بۇل قادامىنا ءبىزدىڭ جاقتان ءالى رەاكتسيا بايقالمادى دەپ ەدىك.

جاقىندا قازاقتىڭ ايتىس اقىنى - بالعىنبەك يماشەۆ جەڭىشبەككە جاۋاپ قاتىپتى.

…اياعى جامان ءتور بۇلعايد،

اۋزى جامان ەل بۇلعايد،

وسىلاي ايتقان شوڭ بابام.

…ەكى دە دوستىڭ اراسىن،

ايىرادى ەكەن – وڭباعان! – دەپ ءسوز باستاعان بالعىنبەك، قىرعىز پرەزيدەنتىنىڭ كەم-كەتىگىن ايتىپتى.

بالعىنبەكتىڭ ءسوزى - بيلىكتىڭ ءسوزى ەمەس. كەزىندە، "قامقورشىمىز نۇر وتان، وزدەرىڭە سەنەدى" دەپ جىرلاعان بالعىنبەك اقىننىڭ اۋزىنداعى ءسوز شەكارا داۋىن شەسپەسى انىق، دەگەنمەن، ەل مەن ەلدىڭ اراسىنداعى احۋالدى رۋحاني جاعىنان دەمەيتىنى انىق.

نۇرزات توعجان

Abai.kz