رەسەيدەگى تاجىكستان ەلشىلىگىنىڭ حابارلاۋىنشا، اقسارايدا قازىر 130 ميگرانت بار. استراحان وبلىسى كراسنويار اۋداندىق سوتى رەسەيدەن 60 تاجىك ازاماتىن شىعارۋ جونىندە شەشىم شىعارعان. ولارعا ءۇش جىل بويىندا رەسەي اۋماعىنا كىرۋگە تىيىم سالعان. ال قالعاندارى سوت شەشىمىن كۇتىپ وتىر.

رەسەي فەدەرالدى قاۋىپسىزدىك قىزمەتىنىڭ شەكارا باسقارماسى قاراشا ايىنىڭ باسىندا «ماسكەۋ-دۋشانبە» پويىزىندا رەسەي زاڭىن بۇزعان 200-گە تارتا ادامنىڭ ۇستالعانىن حابارلاعان. ولاردىڭ ءبارىن اقساراي شەكارا بەكەتىنەن ءتۇسىرىپ العان.

ەندى "تاجىكستاننىڭ تەمىر جول" ۇلتتىق كومپانياسىنىڭ ءباسپاسوز حاتشىسى انۆار لاتيفزودا ۇكىمەتتەن شەكارا بەكەتىندە ءتۇسىپ قالعان ازاماتتاردىڭ ءبارىن ەلگە تەگىن الىپ كەلۋ جونىندە بۇيرىق العانىن حابارلادى.

«ءبىزدىڭ ەلشىلىك استراحان وبلىسىنداعى جاعدايعا الاڭدايتىنىن ءبىلدىرىپ، رف ءسىم-گە نوتا جولدادى»، - دەدى رەسەيدەگى تاجىكستان ەلشىلىگىنىڭ ءباسپاسوز حاتشىسى سارۆار باحتي.

Abai.kz