وسىدان ءبىراز جىل بۇرىن استراحان جاقتا بولىپ قايتتىق. جولداعى اسحانادا الماتىلىق شەشەن جىگىتىمەن تانىسىپ قالدىق. شەشەنستانعا ءبىرىنشى رەت بارا جاتقان بەتى ەكەن. قازاقستاندا تۋعان عوي.

ولاردىڭ دجوحار دۋداەۆتان باستاپ، احماد قادىروۆقا دەيىنگى تۇتاس ءبىر ەليتاسى قازاق جەرىندە دۇنيەگە كەلگەن. ەكى مىڭىنشى جىلدارى بارماقشى بولىپ، سوعىس باستالىپ كەتكەن دە، كەيىنگە قالدىرىپتى. سودان كەيىن ەندى عانا جولى تۇسكەن.

استراحانداعى تۋىستارىن ارالاپ، ارى قاراي اتامەكەنىنە باراتىنىن ايتتى. «مەنىڭ ءبىر تۇسىنبەگەنىم»،- دەيدى، - استراحاننىڭ ماڭىنداعى ەلدىمەكەندەردىڭ ءبارىنىڭ اتى قازاقشا ەكەن. سوندا بۇل قازاقستاننىڭ جەرى مە؟» دەپ تاڭ قالىپ سۇرادى. استراحاننىڭ كەزىندە قازاق حاندىعىنا قاراعانىن، قازاق جەرى ەكەنىن، ال ورىنبوردىڭ قازاقستاننىڭ استاناسى بولعانىن ايتتىم. سوسىن قالجىڭداپ، «ورىستار ونى بىزدەن «ارەنداعا» العان. اعىلشىندار گونكونكتى قىتايلارعا قايتاردى عوي، تۋرا سول سياقتى ۋاقىتى كەلگەندە قايتارىپ بەرەدى» دەپ ەدىم، كۇلىپ جىبەردى.

تاريحي تاعدىر دەگەن قىزىق نارسە. استراحاننىڭ ماڭىنداعى ەلدىمەكەندەردىڭ ءبارى - قۇرمانساي، اششىبۇتاق، قارابۇتاق، ەستەمىس دەپ قازاقشا اتالادى دا، وزىمىزدەگى قوستانايدىڭ ماڭىنداعىلارى – دەنيسوۆكا، ەليزاۆەتينكا، انتونوۆكا، يۆانوۆكا دەپ ءالى سىرەسىپ تۇر. ورىستىڭ جەرى بولسا ءبىرسارى، ءوز جەرىمىزدەگى وسىنداي كەلىمسەك اتاۋلاردان ءالى قۇتىلا الماي جاتقانىمىز جانىڭا باتادى. ونى دا قوستانايعا بارعاندا كوردىم. ءبىر جەردە بىرنەشە جىل بويى اكىم بولىپ وتىرىپ، تۇك بىتىرمەي كەتەتىندەر بار. اكىمدەرىمىز ەڭ قۇرىعاندا ءوزى باسقارعان ءوڭىردىڭ جەر-سۋ اتاۋلارىن قازاقشالاپ كەتىپ وتىرسا عوي، ءبىراز جۇمىس بىتەتىن ەدى...

جولىمبەت ماكىش

Facebook-تەگى پاراقشاسىنان