بۇل كۇندەرى قوستاناي شەنەۋنىكتەرىنىڭ تايلى-تاياعى قالماي بوركىن اسپانعا اتىپ قۋانىپ ءجۇر. بەينە ءبىر اكەلەرى ءتىرىلىپ كەلگەندەي شاتتىق قۇشاعىندا. ويتپەگەندە قايتسىن. ولار وزدەرىنشە شاھار حالقىنا دۇنيەجۇزىنىڭ حالقى اۋزىن اشىپ، كوزىن جۇمىپ تاڭ تاماشا بولاتىنداي عاجايىپ ايالداما سالىپ بەرەتىن كورىنەدى. ونىسى از دا ەمەس، باقانداي - 45. «ۇرىستا تۇرىس جوق» دەگەندەي، ولار ايالداما قۇرىلىسىن باستاپ تا كەتىپتى.

قازىر باسىم كوپشىلىگى سالىنىپ تا ءبىتتى. جىلدامدىعى مەن شيراقتىعىندا ءمىن جوق. وسى قالپىنان تايماسا كوپ ۇزاماي ءبارىمىز دە سول ادام ەستىپ، كوز كورمەگەن ايالداماعا بارىپ راحاتتانا دەمالاتىن شىعارمىز. تەك ءبىر اتتەگەنى-اي، وسى كرەاتيۆتى ايالدامانى كەزىندە استانادا وتكەن ەكسپو جەتىستىكتەرىنىڭ ءبىرى رەتىندە جارنامالاي الماعاندىعى. ايتپەسە ءبارى قاتىپ كەتكەن دەگەندى ءجيى ايتادى ونىڭ اۆتورلارى.

مەن ەكسپو دەگەندى بوسقا، قالجىڭ رەتىندە ايتىپ وتىرعانىم جوق. جوبا اۆتورلارىنىڭ پىكىرلەرىنشە مۇنداي ايالدامانى ەشبىر ەلدەن تابا المايسىڭ. ەگەر ول وسىنشاما كەرەمەت بولسا، نەگە حالىقارالىق كورمەگە قاتىسپاي، كوپتىڭ نازارىنان تىس قالادى دەگەن جاناشىرلىق قوي بىزدىكى. وتىرىك ايتتى دەمەس ءۇشىن ءبىز الدىمەن وسىنداي ەلدەن ەرەكشە جوبا جاساپ، ونى جەڭىپ العان «الما-تاۋ ينجينيرينگ» (بىزدە فيرما اتاۋى وسىلاي كۇلدى-بادام جازىلا بەرەتىندەگىنە كوزىمىز ۇيرەنگەن. قايران قازاق ءتىلى) جاۋاپكەرشىلىگى شەكتەۋلى سەرىكتەستىگىنىڭ باسشىسى زۋلفيكور بەكتاەۆتىڭ بايقاماي بولسا دا ماقتانا ايتقان ءسوزى كوپتەگەن جايتى اشىپ سالدى.

الگى بيزنەسىمىز: «ءبىز بۇل ايالدامانىڭ نەگىزىن امەريكانىڭ نيۋ-يورك قالاسىنداعى بەسىنشى كوشەسىنەن الدىق. سول قالپىمەن ەمەس، الايدا وتە ۇقساس. مۇنىڭ ەڭ ارتىقشىلىعى - ولاردىڭ تەك اينەكتەن جاسالاتىندىعى»، - دەپ ايدى اسپانعا ءبىر-اق شىعاردى. جاراعان ەكەنبىز، حالقىمىزعا جاناشىر مىرزا قارىق قىلعان ەكەن. سوندا الگى ىزدەنگىش، تاپقىر بيزنەسىمىز تەك قالقيعان اينەكتەن عانا سالىنعان ايالدامانىڭ ءبىزدىڭ التاي قىس بولاتىن، سول مەزگىلدە بەت قاراتپايتىن قاقاعان قارا سۋىعى مەن وكپەك جەلى ءبىر باسىلمايتىن ولكەدە جۇپ-جۇقا شىنى كىمگە سەپ بولادى، كىمدى سۋىق پەن جەلدەن قورعايدى دەپ ويلايدى ەكەن؟ ايازدان قىراۋ ابدەن باسىپ قالعان ايالدامادان انادايدان كەلە جاتقان اۆتوبۋستى قايدان كورەسىڭ. ءسىرا، ءبىزدىڭ بيزنەسمەن امەريكانىڭ ماي توڭبايتىن جىلى تابيعاتىن ارقانىڭ قارا سۋىعىمەن شاتاستىرىپ العان بولار.

جارايدى، گەوگرافيادان مۇلدەم حابارى جوق بيزنەسمەندى قويا تۇرالىق، (وندايلار بىزدە جەتىپ ارتىلادى) ال وسى وبەكتىنى قابىلداپ العان قالا باسشىلىعىنىڭ ماماندارى قايدا قاراعان؟ الدە ولار جىل ون ەكى اي مەرزىمىن نيۋ-يوركتە وتكىزەدى مە ەكەن؟ مۇمكىن، الگى بيزنەسمەن مەن قالا شەنەۋنىگى ەگەر بىزدەر ەشكىمگە بىلدىرمەي ايالدامانىڭ ەسكيزىن شەتەلدەن جىمقىرىپ كەتسەك، جاڭاشىل اتانىپ مۇمكىن كوزگە تۇسەرمىز دەگەن قيالىنا ەرىك بەرگەن شىعار. ولاي بولسا بۇل قيالى قالا حالقىنا اسا اۋىر تيگەلى تۇر. ءبىزدىڭ ەسەپتەۋىمىز بويىنشا شاھاردا سالىناتىن 45 ايالداماعا بيۋدجەتتەن تۋرا 45 ميلليون تەڭگە ءبولىنىپتى. نە دەگەن مىرزالىق؟ ءتورت قابىرعاسىنا ءتورت-اق اينەك كەتەتىن بۇل ايالداما-سىماققا اتتاي ءبىر ميلليون تەڭگە بەرە سالۋ قانداي جومارتتىققا جاتادى؟ مۇنىڭ ءوزى ەسەبىن تاۋىپ ەكى جەپ، بيۋدجەتتىڭ اقشاسىن بىلدىرمەي جىمقىرۋ ەمەس پە دەگەن وي كەلەدى. مۇمكىن مۇنى ءتيىستى جەمقورلىققا قارى كۇرەس ۇيىمدارى نازارعا الار.

ايالدامانىڭ تاعى ءبىر وسال جاعى بار. قالا جاستارىنىڭ كوبىسى تۇندە ەرمەك ىزدەپ كوشەدە ساندالىپ جۇرەدى. سوندايدا اناۋ اينەگى جارقىراپ تۇرعان، قاسىندا ەشبىر جان جوق جىلتىراق دۇنيە قىزىقتىراتىندىعى ءسوزسىز. سودان سوڭ ارينە ويلارىنا نەشە ءتۇرلى بۇزاقى دۇنيەلەر كىرەدى. بۇل ويىمىزدى زۋلفيكور بەكتاەۆتىڭ ءوزى دە مويىندايدى.

- جاقىندا سۋ جاڭا پاۆيلون سالدىق. ال ارادا ەكى-اق كۇن وتپەستەن اينەكتەرىن ىسكە العىسىز ەتىپ بىت-شىت قىلىپ كەتىپتى. ەندى قايتتىك. مۇمكىن ونىڭ جانىنا ءبىر-بىردەن پوليتسيا قويارمىز.

يا، ەندى قالعانى ونسىز دا شارۋاسى موينىنان اسىپ جاتقان پوليتسياعا تاپسىرۋ شىعار مۇنى. مۇمكىن، ءمانسىز-ماعىناسىز قيالدان ارىلىپ، شىنى-مىنى دەگەندى قويىپ، مىنا پاۆلودار، قىزىلجار، كوكشەتاۋ سەكىلدى قالالاردا ادەمى كىرپىشتەن ءورىلىپ، ادامدارعا جايلى دا پانا بولارلىق ءساندى دە قولايلى ايالدامالارعا كوز سالماسقا. سوندا مۇمكىن حالىقتان العىس الارسىز. ايتپەسە ءبارىمىز بىردەي نيۋ-يورككا بارىپ ءومىر سۇرە المايمىز عوي.

جايبەرگەن بولاتوۆ، قوستاناي

Abai.kz