بۇگىن ءبىز ەرەكەڭنىڭ، ەرلان ساعاديەۆتىڭ ەكى مالىمدەمەسى جايلى ءسوز قوزعايمىز. اتاپ ايتساق، بيۋدجەتتىڭ، ونىڭ ىشىندە ۇلتتىق قوردىڭ اقشاسىن 2018-2020 جىلدارعا ترانسفەرتتەۋ جونىندەگى ءماجىلىس جيىنىندا دەپۋتات سەرگەي ەرشوۆ دەگەن كىسى مينيستر ەرلان ساعاديەۆكە ەسكەرتۋ جاساپ، اعىلشىن كۋرستارىنا جۇمسالاتىن قارجىنىڭ ءتيىمدى يگەرىلۋىنە كۇمان كەلتىرىپتى. "Ratel.kz" سايتى سولاي دەپ جازادى.

"رەسپۋبليكالىق بيۋدجەتتەن 2018 جىلى بىلىكتىلىكتى ارتتىرۋ، ماماندار دايارلاۋ، پاندەردى ءۇش تىلدىلىككە وتكىزۋگە 6,9 ميلليارد تەڭگە قاراستىرىلعان. قازىردىڭ وزىندە وسىنداي كۋرستاردان وتكەن 16,5 مىڭ مۇعالىم حيميا، بيولوگيا، فيزيكا، ينفورماتيكا پاندەرىن ءۇش تىلدە بەرۋگە قاۋقارلى. ال، ەندى، شاعىن كۋرستاردان وتكەن مۇعالىمدەر اعىلشىن تىلىندە ساباق وتە الا ما؟ بۇل كۇماندى دۇنيە."

بۇل جاڭاعى دەپۋتات سەرگەي ەرشوۆتىڭ ءبىلىم جانە عىلىم ءمينيسترى ەرلان ساعاديەۆ مىرزاعا قاراتا ايتقاندارى.

ىلعي ءنوپىر سىننىڭ توپەسىندە جۇرەتىن باس ۇستاز ەرەكەڭ، ەرلان كەنجەعاليۇلى، اعىلشىن تىلىندە ساباق بەرىپ جاتقان مۇعالىمدەر تۋرالى رەسمي دەرەك ايتىپتى.

ء"بىز بيىل ۇلكەن ەكسپەريمەنتتى باستادىق. بيىلعى جۇرگىزىلىپ جاتقان جۇمىستاردىڭ قورىتىندىسى جىل سوڭىندا شىعادى. سوندا كەتكەن كەم-كەتىكتەردى ەسكەرىپ، كەلەر جىلى اعىلشىن تىلىنە ءوتۋدىڭ جاڭا گرافيگىن ازىرلەيمىز. ايتا كەتەيىك، قازىردىڭ وزىندە 1500 وقىتۋشى اعىلشىن تىلىندە ساباق بەرە باستادى".

بۇل ەرلان ساعاديەۆ مىرزانىڭ ءسوزى. ايتىلعان ۋاقىتى: 2017 جىلدىڭ 16-قاراشاسى.

ءبىر قىزىعى ەرەكەڭ بيىلعى جىلدىڭ ناۋرىزىندا ءدال وسى ماسەلەگە قاتىستى مۇلدە بولەك دەرەك ايتقان.

ء"تىپتى، بيىلعى كۇزدىڭ وزىندە 100-دەن اسا سىنىپ اعىلشىن تىلىنە اۋىسادى دەپ جوسپارلاپ وتىرمىز. قازىردىڭ وزىندە ەلىمىزدىڭ 120 مەكتەبىندە 2700 مۇعالىم اعىلشىن تىلىندە ساباق بەرىپ جاتىر".

بۇل دا ەرەكەڭنىڭ ءسوزى. ايتىلعان ۋاقىتى: 2017 جىلدىڭ 28-ناۋرىزى.

ءسويتىپ، ەرلان كەنجەعاليۇلى ايتقان 2700 مۇعالىم اينالدىرعان 8 ايدىڭ ىشىندە ەكى ەسەگە قىسقارىپ قالعان كورىنەدى. الدە، شاتىپ-پۇتىپ جۇرەتىن ەرەكەڭنىڭ كەزەكتى ستاتيستيكالدان جاڭىلىستى ما؟ جوق، الدە ساعاديەۆ باسقاراتىن مينيسترلىك ونسىز دا اعىلشىنشا سارناپ تۇرعان 1200 ۇستازدى اعىلشىنشا ۇيرەتتىك دەپ، ۇكىمەتتەن تاعى اقشا قارپىماق پا؟ باسقا-باسقا ەمەس، باس مۇعالىمنىڭ ەكى سويلەۋى، ساعاديەۆ ستاتيستيكاسى كەرى كەتىپ بارا جاتۋى جاقسىلىقتىڭ نىشانى ەمەس...

نۇرگەلدى ابدىعانيۇلى

Abai.kz